Post Tagged with: "李健良"

李健良買十本《天使的微笑》畫集 做善事免費送書
by / on 18/09/2017 at 9:28 pm

李健良買十本《天使的微笑》畫集 做善事免費送書

人好,心地好,畫公仔好,係我對李健良嘅印象。擒日參觀《天使的微笑》畫展偶遇佢,有幸地佢認得我呢個小小讀者,熱情地打招呼兼握手,感覺好Warm,佢走之後,我聽到工作人員話:「李健良頭先一口氣要咗十本畫集。」嗰時心諗,買咁多畫集做乜?後瀏覽面書,明晒,原來佢話佢「準備」咗十本《天使的微笑》慈善畫集,簽完名打算免費送畀人,呼籲大家踴躍捐款,叫想要畫集嘅讀者PM佢云云。「準備」?但斷估即係自掏腰包真金白銀買喇,係,畫集不過每本$150,十本亦不過$1500,唔係甚麼大數目,但呢份熱心,呢份真關懷,看在眼裡確實有少少感動。

Read more ›

網圖分享:港漫人出圖望颱風快快走
by / on 28/08/2017 at 8:38 pm

網圖分享:港漫人出圖望颱風快快走

呢排打風打到人都悶,都九月喇,仲邊得嚟咁多颱風架?對上一次香港一年內掛四次八號風球,原來已經係2008年嘅事。今年2017年,已經先後有「苗柏」、「洛克」、「天鴿」同「帕卡」四個八號或以上颱風襲港,「天鴿」仲打到上十號波添。天災帶畀香港同澳門嘅經濟同人命損失,係無人想見到嘅,為此,一班港漫人都作畫寄予同情,睇完畫,希望大家都平平安安,健健康康喇。

Read more ›
睇李健良展覽 免費教小朋友畫恐龍
by / on 03/08/2017 at 10:00 am

睇李健良展覽 免費教小朋友畫恐龍

我睇咗李健良《恐龍彩稿漫畫插圖香港首展》,係好正嘅,如果啲畫再大幅啲就更加正。你未睇?8月8日係好時機,事關展覽場地「悠閑藝舍」舉辦「古生命恐龍一家親」活動,到時會既可睇展覽,仲可以玩親子遊戲兼有導師教畫恐龍,費用全免。Remind番,既云親子,呢個活動係唔受工人玩架,必須父母陪同參加,收到未?

Read more ›
入堅尼地城搵李健良 買親筆簽名《紅樹林‧香港濕地生態》
by / on 27/07/2017 at 11:00 pm

入堅尼地城搵李健良 買親筆簽名《紅樹林‧香港濕地生態》

我喺書展買咗李健良《紅樹林‧香港濕地生態》畫集,睇埋添,啲用色真係靚到一絕,幅幅都係嘔心瀝血之作,呢舊零水抵到爛。無去書展想買書又想搵李健良影番張相的話,呢個禮拜六同日仲有機會,不過就遠咗啲,要去到堅尼地城,即場買書或帶書,李健良都會替新書簽名,算係迷你簽名會咁喇。拿,我估呢次真係最後機會喇,要珍惜。

Read more ›
複製油畫/油畫集Folder/水晶畫板+N 李健良精品必屬佳品
by / on 14/07/2017 at 9:30 am

複製油畫/油畫集Folder/水晶畫板+N 李健良精品必屬佳品

今年書展,數推出精品之多,我諗非李健良莫屬,除咗重頭《紅樹林‧香港濕地生態》畫集外,仲有之前嘅《古生命》一至三期、複製油畫、油畫集Folder、水晶畫板、書籤、明信片、貼紙、恐龍填色卡、熊貓杯墊、環保袋同海報畫。如果有選擇困難症嘅,都將會好頭痕吓,想免煩 嘅,咁我幫良哥賣廣告,買晒佢喇喂。而我呢,就睇中咗一套20張恐龍卡,必入之選是也。

Read more ›
李健良《紅樹林‧香港濕地生態》 書展入貨必然之選
by / on 10/07/2017 at 10:00 am

李健良《紅樹林‧香港濕地生態》 書展入貨必然之選

人心地好,望落都靚仔啲嘅,講緊嘅係李健良,今年書展佢會推出《紅樹林‧香港濕地生態》,「野士創工」仲幫佢拍咗條宣傳片添。出書為乜?資本主義社會梗係為賺錢,但賺錢以外,佢更想喚醒香港人保育意識,希望大家多啲關注香港濕地公園同米埔自然保護區,所以透過連環圖介紹香港呢啲珍貴生態環境。另,呢條片仲有個亮點,就係李健良即席表演畫恐龍,好勁,構圖固然誇啦啦,仲要落色奇準,工多藝熟就係呢亭嘞。熱烈推介入貨,啱睇嘅,買埋之前嘅《古生命》一至三都唔過份。

Read more ›

恐龍出沒元朗注意 撐李健良首個香港個展
by / on 13/06/2017 at 9:45 pm

恐龍出沒元朗注意 撐李健良首個香港個展

有謂「金筆精鑄火麟現,遠古生命見巨龍」,一見呢兩句Slogan,我知有靚畫睇嘞,無錯,彩稿大師李健良下個月會喺「悠閑藝舍」開《恐龍彩稿漫畫插圖香港首展》,將會展覽過百幅複製原畫,現場有大型恐龍Backdrop畀大家呃Like,睇啱嘅,即場買油畫同精品亦得。喺屋企睇三期《古生命》已經睇到我嘩嘩聲,睇大大幅複製原畫,感覺肯定更加震撼,開心!

Read more ›
睇《古生命》複製原畫 李健良開首個香港展覽
by / on 27/05/2017 at 6:30 pm

睇《古生命》複製原畫 李健良開首個香港展覽

無吹水,我買齊《古生命》一至三期,所以當知道彩稿大師李健良準備同香港循理會社企「悠閑藝舍」合作舉辦第一個香港個人展覽,我係非常興奮嘅。梗係喇,畫集當然係好,但幾好都一定唔及兜口兜面睇複製原畫咁震撼。之前佢喺檳城動漫館搞展覽,只好慨嘆自己無眼福,所以今次我一定捧場。展覽詳細資料暫時未知,請留意本網站報導喇喂。

Read more ›
李健良最新水晶畫板 包腳架每幅$120
by / on 19/04/2017 at 9:43 pm

李健良最新水晶畫板 包腳架每幅$120

畫得靚,仲要畫得密,每次出品都維持到水準,真係要寫個服字畀李健良嘅!最新水晶畫板有兩款,分別係「旗魚‧馬林」同「水虎魚(食人倉)」,各售$120,包腳架一個,有興趣可以WhatsApp佢,報告完畢。

Read more ›
《七彩古生命‧李健良手彩漫畫插畫展》場刊 怪獸屋免費派發
by / on 06/04/2017 at 2:15 pm

《七彩古生命‧李健良手彩漫畫插畫展》場刊 怪獸屋免費派發

之前李健良喺大馬開《七彩古生命‧李健良手彩漫畫插畫展》,港漫迷無眼福,好Sad呀呵?唔好Sad喇,可以攞番張精美場刊留念又點睇?家陣喺「怪獸屋」免費派贈,數量有限,每人限攞一張,手快有心慢無呀喂。

Read more ›
李健良2017油畫開售 有埋Folder方便收藏
by / on 21/02/2017 at 4:45 pm

李健良2017油畫開售 有埋Folder方便收藏

Good吖,彩稿大師李健良2017首批油畫正式發售,今次有棘龍、群龍同鯨頭鸛三款選擇,有辦你睇幅幅都係精品中的精品,全部A3 size,各售$100。另外,為免下下都要買個畫框鑲起佢,李健良窩心地提供埋油畫Folder,Folder有20頁,同樣係A3 size,Fit晒你收藏油畫,每個$100,兼送數碼印刷百獸圖黑稿一大幅。買得畫,唔爭在買埋Folder,我話嘅。

Read more ›

撐李健良精品系列 相架+海報書+油畫+微畫集
by / on 06/12/2016 at 1:15 pm

撐李健良精品系列 相架+海報書+油畫+微畫集

好消息,彩稿大師李健良又有精品推出,包括內有16張精選舊畫嘅微畫集($200);透明相架(分暗黑武士同戰‧象版,各大學$150、中$100、$70);海報書(分暗黑武士同戰‧象版,各$170)同油畫(分暗黑武士同戰‧象版,齋畫$100,連畫框$170)。望過啲相,我就最鍾意戰‧象油畫,隻戰象昂首大叫,遞高隻腳好似想踩扁隻馬咁,好威武。連埋畫框兩舊水唔使,抵買之選,我Like。

Read more ›
李健良神獸系列五合一珍藏套裝開訂 獨一無二手繪封套$1200
by / on 29/09/2016 at 9:45 pm

李健良神獸系列五合一珍藏套裝開訂 獨一無二手繪封套$1200

之前咪報導過李健良會推出神獸漫畫精品嘅,依家終於聞到樓梯響嘞。神獸系列五合一珍藏套裝分兩個版本,一,普通版,包神獸麒簡介一張、復刻原畫四張、水晶畫板一幅、熨銀封圖,售$600;二,特別版,售$1200,點解貴一倍?因為封套會有李健良親筆手繪神獸,保證個個封套都獨一無二。正唔正先?正就早早落訂啦老友。最後,有個問題想問良哥,畫完麒麟之後,仲有無不死鳥呀、靈龜等等其他神獸出場?

Read more ›
李健良10月出神獸漫畫精品 黑白宣傳海報靚絕
by / on 12/09/2016 at 9:45 pm

李健良10月出神獸漫畫精品 黑白宣傳海報靚絕

《古生命》好賣,證明畫飛禽走獸一樣有出路,李健良乘勢添食,打算喺10月推出神獸系列漫畫精品。乜類型精品暫時未有詳細資料,但剩係張宣傳海報已經值得大家Save做Wallpaper,唔落顏色一樣咁靚,而照海報睇,神獸應該有神龍、鳳凰、老虎、靈龜、麒麟等等,真心拭目以待。同場加映靚畫一張,漫畫人一日唔畫過公仔係會手痕,李健良都唔例外,畫咗幅疑似King Kong小習作,又係靚到啪啪聲啫。

Read more ›
想學畫恐龍嗎?李健良開班授徒!
by / on 04/08/2016 at 9:00 am

想學畫恐龍嗎?李健良開班授徒!

  三集《古生命》,我依家只係睇到《古生命I》唔夠一半,Nothing to say,真真值得用「嘆為觀止」四個字形容,幅幅都咁嘔心瀝血,李健良手畫有幾強勁,睇完包你O晒嘴。好喇,如果你有心投身漫畫行業,又或諗緊幫小朋友報乜暑期班的話,不妨參加由佢親自督導嘅《李健良‧基礎漫畫彩圖繪畫班》或《李健良‧暑期兒童漫畫繪畫班》。我都好想報名,可惜唔得,唔係因為無錢,而係要返工無時間,如果可以抽空見見偶像,唔好多,淨係學懂畫番隻翼龍,你話有幾好呢!

Read more ›