fbpx

Tag: 書展

Felix Ip《香港重機》 7月書展推出

Felix Ip《香港重機》 7月書展推出

仲記唔記得之前介紹過Felix Ip充滿香港元素嘅可變形機械人系列畫作?家陣又好消息,就係畫作將會輯錄成畫集《香港重機》,喺嚟緊7月推出。正喇喂,隔住Mon得個齋聞同拎上手睇完全係兩回事,逐頁揭逐頁慢慢欣賞先係王道嘛。建議Felix Ip將畫集出得大Size啲,賣貴啲都唔係問題,我話嘅。

Read more ›

如果《火鳳燎原》出廁紙 你撐唔撐?

如果《火鳳燎原》出廁紙 你撐唔撐?

係喎,時間過得好快,家陣已經係5月中,講吓講吓又就快書展。面書專頁「火鳳燎原」剛剛出Post,話惆悵緊唔知今年出乜精品好,原因係「《火鳳》讀者群年齡層比較大,所以精品種類唔可以太年輕化,加上佢哋有一定嘅消費力,又鍾意實際,所以每次都要搞盡腦汁去諗特別嘢」云云,之後反問讀者:「如果今年出司馬防次子廁紙同孫堅次子廁紙,有無得諗?」仲登咗張惡搞相出嚟畀大家睇睇辦。係呢,大家又想買乜精品?有乜好意見不妨PM佢哋喎。

Read more ›
余兒完全版《那年五月他和她遇上了》 書展見街

余兒完全版《那年五月他和她遇上了》 書展見街

利申,認識余兒全因《九龍城寨》,跟住嘅《今晚打喪屍》就更加Like,黑社會與喪屍呢兩瓣,就係我認識余兒之全部。之所以當知道佢N年前原來寫過本《那年五月他和她遇上了》,我當堂打咗個突。喂?愛情小說呢瓣都寫得掂?呢本小說將會推出完全版,余兒話:「內文完全版內文超過50%修改,比2010年版更感人更精彩更細膩。」嗯,我真心想知佢寫成點,7月書展檔期出版,必撐。

Read more ›
網圖分享:Cuson親筆畫相贈 讀者感動喊出嚟

網圖分享:Cuson親筆畫相贈 讀者感動喊出嚟

書展曲終人散,成績如何都好,好多有份出書嘅港漫人,都喺面書登同讀者嘅合照或寫感謝文,識睇梗係睇留言,勉勵之言彼彼皆是,令人相當開心鼓舞,惟獨Cuson面書卻滲出淡淡哀愁。事緣Cuson作四格漫畫一幅,交代有讀者買書要求親筆畫,將自己同娘親畫埋入書,因為娘親喺醫院長唞,唔可以出嚟行書展,講講吓該讀者仲感動到喊埋出嚟添,搞到Cuson都好Sad,只好邊安慰邊用心畫。呢啲咪人間有情囉,Cuson心地好,抵佢娶個靚靚老婆,所話千其唔好睇小一幅畫,簡單一幅畫足以帶畀人好多正能量,相信該讀者之娘親見到親筆畫會好開心,祝佢早日康復。

Read more ›
阿塗書展出《圖解廣東話Cantonese.jpg》 留意簽名會

阿塗書展出《圖解廣東話Cantonese.jpg》 留意簽名會

阿塗啲公仔不嬲Cute,估唔到連書名都改得咁過癮,今年書展佢有新書出,名為《圖解廣東話Cantonese.jpg》,連「jpeg」都用埋,好諗頭呀。書名OK嘞,咁內容呢?佢面書有內容簡介曰:「本書以插圖為要,附以中英註解,九淺一深,全宇宙首本七彩伊士曼粵語研習繪本!以漫畫人視角,為大家揭開廣東話俚語、諺語、歇後語 ……之神秘面紗。」一樣咁抵死啜核。想搵佢簽名嘅,唔該記得以下日期及時間──今晚周五8:00pm至9:00pm、聽日周六5:00pm至6:00pm,報告完畢。

Read more ›
利志達書展出《刻毒》 收錄11個短篇故事

利志達書展出《刻毒》 收錄11個短篇故事

「利志達」三個字係信心保證,所以無需多廢話,今個書展佢有新書出,名為《刻毒》,收錄咗11個短篇故事,128頁,每本$100。佢喺面書登咗封面相,有讀者話有啲丸尾末廣Feel,唔知大家有點睇?

Read more ›

書展撐牛佬!撐《赤軀隨遇》!

書展撐牛佬!撐《赤軀隨遇》!

好喇,牛佬已經喺《古惑仔》賣咗兩三期廣告,都唔爭在我呢個死忠Fans賣埋一份,今個書展牛佬會推出新書《赤軀隨遇》,內容係輯錄番《古惑仔》專欄內文再加修飾而成。牛老手字公認港漫界第一,書名《赤軀隨遇》固然係型,簡介亦唔弱:「白雲蒼狗,幻變無常,人生路程,從來不由自己操控,一半由人,一半由天,隨遇隨緣隨行。」有板有眼兼有Feel,委實好過好多所謂才子才女多多聲。係Fans的話,盡撐喇。

Read more ›
書展推硬皮別注版《今晚打喪屍》漫畫 送Tote Bag+Game Card

書展推硬皮別注版《今晚打喪屍》漫畫 送Tote Bag+Game Card

今日書展開鑼,雖然已經買咗平裝版,但都心郁郁想買埋呢個硬皮別注版《今晚打喪屍》漫畫,係,我認我貪心,因為現場購買即送電影Tote bag同顏卓靈‧真一Game Card。每本$100,無話貴唔貴,只有值唔值,睇過封面相,我就覺得好值。

Read more ›
盧敬羽書展出《殺手名冊》 係人都有壞嘅一面

盧敬羽書展出《殺手名冊》 係人都有壞嘅一面

曾經講過我好期待小說《殺手名冊》,今年書展終於見街嘞,開心!作者盧敬羽,尤其鍾意佢改嘅「卷一」名字──「時薪$34.5的死神」,殺手殺人以時薪計,都算型到啪啪聲。睇故事簡介,講大學生郭陶做咗冷血殺手,捲入黑幫鬥爭萬劫不復,有對白云:「好人壞人,都有壞的人面,我又何必自命正義,只殺壞人?」人人都有壞嘅一面,所以抵殺,又講得好啱喎。殺殺殺殺殺,好想睇主角點殺人,我係咪好變態?

Read more ›
鄭立書展出《光輝歲月》小說 王一心惡戰小志強

鄭立書展出《光輝歲月》小說 王一心惡戰小志強

好搶眼嘅封面,我個人就好Like呢隻畫風,講緊嘅係由網絡遊戲衍生出嚟嘅小說《光輝歲月》,作者鄭立。睇面書故事簡介,場景係1988年深水埗關雲長第一紀念學校,主題係傾唔埋欄即以比武解決,簡單善惡二分,邪惡一方以惡霸小志強為首,善良一方以轉校生王一心為帥,拳來腳往一決高下咁話喎。唔知呢種小說啱唔啱你睇?我就OK受落嘅,如無意外書展應該會入手。

Read more ›
上官小洪出立體漫畫相架 「小洪與哨牙珍」最正

上官小洪出立體漫畫相架 「小洪與哨牙珍」最正

有新意!我鍾意!上官小洪喺書展期間,將會推出三款各限量30個嘅立體漫畫相架,分別為尚餘23個嘅「小洪與哨牙珍」、尚餘22個嘅「黐洪神探」同尚餘11個嘅「西遊老友記」,各售$100。佢嫩人家講明由於製作成本高昂,所以絕不會有第二版,有買趁手,有興趣嘅唔該快快落訂。我呢,就比較鍾意「小洪與哨牙珍」版,哨牙珍拎起裙襬個Pose真係畫得好頂癮,見到已經想笑。

Read more ›

書展再版推出 港漫大百科《香港漫畫圖鑑1867-1997》

書展再版推出 港漫大百科《香港漫畫圖鑑1867-1997》

唔講大話,真係唔知有《香港漫畫圖鑑1867-1997》呢本書,亦唔識作者楊維邦同黃少儀。睇番資料,此書喺1999年初版,隔18年至今年書展再版,睇封面幾Sharp醒吓,或者你會覺得好老土,但我幾鍾意呢種大堆頭元祖味。內容圍繞1867年至1997年港漫發展,賣點係有過千幅極珍貴的漫畫封面、書刊出版年份及扼要內容、香港漫畫及連環圖作家列表、漫畫出版大事年表,售$190.4,非凡出版社出版,估計屬磚頭書一類,鍾意咪字嘅朋友,當Revision好,當細味昔日睇港漫美好回憶又好,值得考慮一下。

Read more ›
曹志豪《方新俠》第二期 書展開賣

曹志豪《方新俠》第二期 書展開賣

記得4月尾《方新俠》創刊,好刁鑽咁限量賣1023本,每本$388,既係漫畫,亦係名家投資心得云云。以為就咁完,No喇,曹志豪報料,《方新俠》第二期將於書展開賣,價錢幾多限量賣幾多本,暫時資料欠奉,不過就有封面相睇住先,曹志豪Fans記得捧場。

Read more ›
李健良《紅樹林‧香港濕地生態》 書展入貨必然之選

李健良《紅樹林‧香港濕地生態》 書展入貨必然之選

人心地好,望落都靚仔啲嘅,講緊嘅係李健良,今年書展佢會推出《紅樹林‧香港濕地生態》,「野士創工」仲幫佢拍咗條宣傳片添。出書為乜?資本主義社會梗係為賺錢,但賺錢以外,佢更想喚醒香港人保育意識,希望大家多啲關注香港濕地公園同米埔自然保護區,所以透過連環圖介紹香港呢啲珍貴生態環境。另,呢條片仲有個亮點,就係李健良即席表演畫恐龍,好勁,構圖固然誇啦啦,仲要落色奇準,工多藝熟就係呢亭嘞。熱烈推介入貨,啱睇嘅,買埋之前嘅《古生命》一至三都唔過份。

Read more ›
麥天傑《逆戰國策》書展推出

麥天傑《逆戰國策》書展推出

書展又有書要入,麥天傑《逆戰國策》是也,全書196頁,包16頁彩圖,其餘全部係黑白漫畫、草圖同插圖,另有文字。睇麥天傑面書得知,如果無意會錯的話,此書應該係有彩色封套Cover喺面,但我就認為書套下面嘅黑白跨封面搶眼得多,Anyway,此書售$188,記得捧場。

Read more ›