「小計呀小計呀……」、「多惠呀多惠呀……」諗番起玄野計點樣拼死救小島多惠，即時毛管都戙埋。文化傳信3月26日推出奧浩哉《Gantz殺戮都市》典藏版一，之前出過「大阪篇」，今次出番個頭「蔥星人篇」，B5雜誌Size，售$128。「蔥蔥，給你兩根蔥蔥……」由第一章「蔥星人篇」開始睇番起，應該好過癮，我心郁郁想買番了。

又炒冷飯，又來夜神月，又來L，印象中出過好多版本了，之前套書都唔知借咗畀邊個了，但家陣文化傳信推出《死亡筆記》特裝版，我又唔爭氣地想買番。第一期4月初出見街，Sell重新封面包裝，每期內容有接近300頁，買全7期封面可以當一幅合併畫咁睇，隨書附送珍藏卡1張，售$85。唉，買喇，買喇……

黃玉郎同文化傳信傾掂數了？點都好，嚟緊1月28日，文化傳信將會推出《小流氓經典珍藏紀念套裝》，分兩輯，第一輯包第1至8期《小流氓》，第二輯包第9至16期，個硬盒包裝大黑大橙都幾搶眼吓，每輯$100，「至Goal Club」有售。買就如無意外買硬的了，但問題係，會唔會繼續推第三輯先？最驚睇到第16期之後無影，會好無癮的。

幾經辛苦終於買到了，文化傳信推出嘅《小流氓經典封面紀念畫集》終於到手了，無估計過居然咁大本，拎上手好有份量，但亦無諗過隨書附送嘅《小流氓》會咁細本，雖則宣傳廣告已經寫明「珍貴復刻《小流氓》創刊號」屬「珍藏小書號」，但都唔使細本成咁呀？Size細過啤牌，理論上係無可能睇到內容嘅，除非你好有心機，逐頁用手機影低，再逐頁放大番嚟睇喇。不過細還細，但奇怪地公仔線條卻實淨過黃玉郎隨《龍虎5世3世仇》奉送嘅《復刻小流氓》創刊號，感覺黑白分明得多，整體觀感無咁濛查查。你鍾意邊本？我就兩本都買晒珍藏了。

鬧雙胞？這邊廂，文化傳信宣佈11月5日推出《小流氓經典封面紀念畫集》，隨書附送《復刻小流氓》創刊號，售$88；那邊廂，黃玉郎卻失驚無神喺今期第23期《龍虎5世3世仇》隨書附送《小流氓》第一期復刻版，兼出廣告話會喺10月31日推出《正宗小流氓封面集》，售$48。呢鋪真係好睇過戲，出書早又早過你，送創刊號又早送過你，賣書平又平過你，黃玉郎擺明對著幹，截你糊。唔通版權問題已經再唔成問題？又唔知文化傳信會唔會出律師書呢？大家會買邊本？我就鐵了心兩本都買。港漫界好久無如此爆炸性話題了，As一個港漫死忠，始終認為個市熱鬧啲好，一池死水邊有癮？係時候買定花生半噸。

下個月，書報攤又多一本關於《龍虎門》嘅港漫了，今次由文化傳信出品，有請《小流氓經典封面紀念畫集》出場。一睇封面龍虎三皇條起角Nike眉、雞蛋咁大隻眼睛、滲水式滴汗，古早味濃得化不開，昔日睇公仔書美好回憶返晒嚟。11月5日見街，每本$88，隨書附送《復刻小流氓》創刊號，買一得二，又係開心啫。

呢鋪真係要買定花生半噸了，點解《龍虎5世3世仇》未能隨書附送《小流氓》，文化傳信喺面書專頁出Post畀咗答案，因為「小流氓」商標同版權屬於文化傳信囉。此Post一出，好多讀者都話文化傳信無情，唔明點解要將黃玉郎趕盡殺絕，此聲明對港漫界係「弊多於利」云云。又為此，文化傳信揸Fit人杜比再出Post話：「對於近日我司刊登的《龍虎門、小流氓》『版權及商標聲明』是公司作為版權持有人希望保護版權的一個舉動，並沒有對任何人有任何不必要的敵意。」仲話同玉皇朝關係一向友好，同黃玉郎傾緊合作計劃添。法律嘅嘢，作為讀者嘅我識條鐵，誰是誰非唔識講，我淨係想睇書啫。希望兩間公司可以傾掂數，出得成書，搞番旺個市，先係港漫迷之福，對不？

甚麼黃玉郎畀唔起版權費所以要摺《新著龍虎門》，跟住又話邊個邊個主筆接手，啲風吹到天花龍鳳都唔知堅定流，搞到我上兩周嘅心情就如吞服千刀萬蟻丸，籮籮攣唔知點算好。家陣好咯，隨住文化傳信出Post鐵定話「龍虎門精神仍在延續，漫畫傳奇並未完結」，我個心終於安靜下來。停一個禮拜啫，6月5日《龍虎門》會繼續出版，仲可以見到龍虎三皇，我開心到想哭。

唔出得街，睇漫畫喇。文化傳信剛剛開咗個漫畫文化網店「Citicomics shop」，方便大家上網補購日本漫畫，暫時可補購Item唔算好多，不過全單購物滿$60就免港澳運費。

想當年我書櫃都有完整一套《亂馬1/2》，不過唔記得邊個朋友問我借兼有借無還，今趟文化傳信出特裝版，好有衝動買番套儲。4月18日，第一、二期同步推出，每本$68。除有新專欄〈亂馬格鬥家烈傳〉同作者訪問稿〈亂馬的元素〉外，我覺得隨書附送嘅香港中文版限定雷射閃卡都係賣點。

真係咁新不如舊？搞到要復刻復刻又復刻，今次到高橋留美子嘅《亂馬1/2》，文化傳信喺面書專頁透露話攞到特裝版《亂馬1/2》嘅香港中文版版權，暫定2019年春推出喎。係，確實係有啲復刻到悶，但一諗起「猛虎落地勢」呢個經典畫面，我又忍唔住笑咗。睇個勢，我都係會撐的。

「文化傳信微電影創作大賽」已經塵埃落定，金獎由以《可惡教主》為藍本嘅《可愛惡主》奪得，導演呂珮琳、梁慧賢。之前，我睇晒所有參賽短片，雖然金獎得主唔係我心水，但都算實至名歸。迄今港漫尚係一潭死水，多啲漫畫公司搞呢類周邊搞作，絕對係好事，恭喜晒。

實在係太久遠前嘅事，差啲唔記得文化傳信搞咗個以旗下漫畫為創作藍本嘅《微電影創作比賽》，而入圍作品剛剛出爐。擒日，由於返工實在太悶，我唔覺意Click咗其中一套《可愛惡主》睇，點知睇吓一條睇吓又一條，唔覺唔覺居然睇晒吳冠亨《百分百感覺外傳》、梁紫姍《十乘十》、古耀強《女招待》、羅海兒同馬啟堯《再見100長女孩》、丘栢樑《死人化妝師》、何振東《執骨》、黃鈞創《輪迴》共8套微電影。好老實，唔好指望好高質，話好好好好好睇就呃你嘅，但絕對唔會睇到中途熄機。主辦單位呼籲話鍾意邊套電影就唔該俾Like，遲啲仲有有獎問答遊戲玩喎。我呢，就最鍾意《百分百感覺外傳》，話晒本地創作，支持吓喇喂。

撈過界定點？唔好理喇，如果你都有志於電影事業的話，咁不妨考慮參加「文化傳信」舉辦嘅「微電影創作比賽」，內容要圍住以下五本漫畫嚟拍──《Feel 100%》、《72行鬼禁忌》？《實況足球》、《菓醬》同《可惡教主》，咁當然要原創啦，長度喺10至20分鐘之內。獎金獎品呢？金獎現金獎$100,000、銀獎現金獎$50,000、銅獎現金獎$30,000，金銀銅獎都有一份文化傳信影視管理有限公司製作網絡微電影合約，另設優異獎同YouTube人氣大獎，各得現金獎$10,000。望落都幾吸引，鍾意拍吓片嘅，不妨認真度度。

由文化傳信授權，上年尾已經賣定廣告嘅經典漫畫預付卡，依家正式喺指定售賣店發售，適用於全港63000間貼有「銀聯」嘅商店，用完可以珍藏，諗得過喎。