呢款T-ARTS出嘅NTT公共電話扭蛋，之前好多人想買但已經斷晒貨，最近又有機會嘞，嚟緊12月會推出增補版，有3款電話係舊款，但就多咗3樣新嘢，包括 MC-5BP公衆電話機、公眾電話機專用嘅座地鐵架，以及Hello Kitty拎住電話筒筒入嘅扭蛋，全部都好吸引，12月推出，記住留意返！

有無人同我一樣，每次經過雪櫃就好想打開，搵吓有無嘢好食？為咗減肥要戒吓呢個壞習慣，日本呢款扭蛋「冷蔵庫の見張り番」可以幫到手，磁石嚟嘅可以貼雪櫃，每次開雪櫃就會發出警告，款式方面有85公斤嘅磅、變咗肥仔嘅紅綠燈，全部都好正，12月推出，有需要嘅記住留意返。

之前推出過嘅「動物露營」系列扭蛋大受歡迎，嚟緊12月將會推出第二彈！由日本動物原型師朝隈俊男創作，佢擅長將動物擬人化，今次參加露營嘅有釣緊魚嘅鱷魚、飲緊汽水嘅袋鼠、煮緊嘢食嘅熊貓、坐扁咗帳篷嘅大象同埋睇緊書嘅獅子，全部都超可愛，好想儲齊一套！入嚟有得睇返第一彈，未買嘅可以追返。

有無發覺最食多咗，成日飽到唔想企起身？日本Bandai最近公佈推出呢款扭蛋「たべすぎまして…」，全部都係食得過飽嘅動物，包括肥豬、喵、狗狗、熊貓，每隻都肥到肚腩漲起跌坐喺地下，超可愛！預計9月推出，鍾意嘅記住留意返嘞。

日本奇譚啲扭蛋一向好有創意，最近佢哋喺Twitter公佈即將推出兩款同貓有關嘅扭蛋，兩款都係之前喺網上熱傳過嘅meme，分別係口罩貓同多士貓，暫定2月推出，好想儲！到時記住留意返。

又係「熊貓之穴」呢個「長下巴動物」系列扭蛋，早排推出過特別版白色系列，全部動物變晒白色，估唔到咁快又有特別版，最新公佈嘅動物全部進化成黑色，有黑獅、黑馬、黑狼、黑豬、黑企鵝、黑兔，全部變晒黑色睇落好型！今個月推出，鍾意呢個系列嘅記住留意返。

呢個彊屍貓系列之前奇譚都推出過，最近公佈推出第二彈，套衫由藍色換咗做紅色，對貓手向前伸，額頭張符都係可以拎走嘅，不過隻貓就唔會好似彊屍咁向前撲。一式五款，預計11月推出，鍾意嘅記住留意返嘞。

好可愛！最近日本扭蛋公司奇譚同人氣模型創作師「船橋つとむ」合作，將佢嘅作品「火柴貓」實體化，推出系列扭蛋。一打開個火柴盒，超萌嘅喵頭就會彈出，入嚟有片睇，貓奴好難抗拒！一式四款，預計11月推出，記住留意返。

唔經唔覺，呢個「触手☆パラダイス」系列扭蛋已經嚟到第4彈，將佢配搭喺不同玩具可以有好奇妙嘅效果，今次有六個款式，仲加長咗，除咗普通條狀，仲有荊棘版、顆粒版，好細緻。每款都配有六條觸手同一個底座，日本網民用佢嚟創作過好多作品，入嚟有得參考吓。

有打機打睇動漫，都成日會喺啲科幻作品度見過呢類容器啦？可以係培植可以用嚟回復或者升級……嚟緊Takara Tomy就會推出呢set「ガチャぶんのいちシリーズ 培養ポッド」扭蛋，內置LED燈，而且幾個可以駁高佢，8月中旬，全6種，扭1回300円。扭一列番嚟放書枱或做玩具背景都幾有型。

喵星人身體柔軟度好高，之前網上都流傳唔少「液體貓」嘅相片，最近台灣扭蛋公司路遙圓創推出呢款「貓體力學」扭蛋，一式五款，除咗經典嘅液體貓造型，仲有喺玻璃盤內不同嘅貓造型，超可愛，今年12月推出，鍾意嘅記住留意返。

東京奧運因為疫情要延期，本來傳話會做吉祥物嘅《哆啦A夢》又無咗影，不過Bandai就會喺今個月推出一式四款嘅《哆啦A夢》扭蛋，全部都係以運動做主題，有空手道、乒乓球、籃球同接力賽跑，全部都好可愛，每抽一次300円，fans記住留意返。

《蠟筆小新》嘅扭蛋一向好受歡迎，今次Bandai呢個游水兵團「みずあそび隊」應該好多人想儲，小新戴住泳鏡泳帽坐喺水泡上面好得意，仲有阿呆坐香蕉船、風間拎水槍、妮妮玩沙灘波、正男坐橡皮艇，全部都好可愛，好想儲齊一套，今個月推出，fans記住留意返。

終於到恐龍系列嘞！講緊係日本「パンダの穴(熊貓之穴)」呢個長下巴動物系列扭蛋，官方最新公佈推出一式五款恐龍，包括暴龍、三角龍、劍龍、翼龍同迅猛龍，全部都有個特長下巴，配埋個樣變得好搞笑，預計今個月推出，記住留意返！

日本扭蛋公司奇譚最近同台灣嘅RBen Studio合作，推出呢款超肥仔動物系列扭蛋「アニマルフィギュアマスコット」，每款動物都頂住一個大肚腩，有北極熊、大象，連平時好惡嘅鱷魚都變咗肥肚腩版本，超可愛。預計9月發售，鍾意嘅記住留意返嘞。