Post Tagged with: "手機"

手機鏡頭放大器   橡筋設計超方便
by / on 01/12/2013 at 5:01 pm

手機鏡頭放大器 橡筋設計超方便

聖誕節無人送禮物比自己?自己買囉!呢個叫Easy-Macro嘅手機鏡頭,簡單一條橡筋綁喺手機嘅鏡頭位置前,就可以將鏡頭4倍放大,之前推出過反應好好,最新呢款進化咗,鏡頭無咁易刮花,仲可以將幾條綁埋一齊加倍放大,Kickstarter有得賣,美金$15,帶出街夠晒方便,而家訂應該聖誕節收到,送比自己啱啱好。

Read more ›

Saturn/Game Gear手機機殼   懷舊機迷俾錢吧
by / on 28/11/2013 at 8:22 am

Saturn/Game Gear手機機殼 懷舊機迷俾錢吧

懷舊機迷注意!仲記唔記得當年世嘉帶比你嘅打機回憶?最近外國廠商Tommo Mobile宣佈會推出一系列世嘉手機配件,包括一套四款嘅iPhone5/5s機殼,有齊Saturn、Game Gear、Sega Genesis同埋Mega Drive,係無我哋最鐘意嘅Dreamcast,點解呢?講返個殼,像真度高鋼水靚,賣$24.99美金真心覺得唔貴。Android友都唔駛失望,可以買佢另外兩款手機尿袋,9000mAh輸出好夠用,都唔啱?仲有一款Sega Genesis嘅藍牙speaker賣,呢個我推介唔落,大大舊個樣有啲古怪,仲要賣美金$89.99,不過百貨應百客,鐘意嘅都可以上去預訂。預計今年內發售。

Read more ›
餐廳熄手機半價優惠   鼓勵低頭族抬起頭來
by / on 27/11/2013 at 7:29 am

餐廳熄手機半價優惠 鼓勵低頭族抬起頭來

有無人堅持同朋友食飯時唔會拎部手機出嚟篤?為咗鼓勵大家專心享受美食、同身邊人溝通多啲,耶路撒冷郊區嘅一間餐廳最近實施熄手機全單半價優惠,成效點?有著數係唔同啲,基乎全部顧客都會熄手機嚮應,唔知香港會唔會有餐廳效法呢?我可以好守法o架,如果麥記KFC都參加嘅話。

Read more ›
史萊姆手機叉電器  今日e-store開賣
by / on 22/11/2013 at 1:00 pm

史萊姆手機叉電器 今日e-store開賣

《勇者鬥惡龍》部特別版3DS我無乜興趣,不過呢款史萊姆手機叉電器我真心覺得幾得意。賣1980円,睇見佢個可愛樣我就想買返屋企,雖然明知佢唔荒多電。除咗立體淚滴型,仲有一款扁口扁面嘅史萊姆,都係藍色,想實用啲,之前都介紹過一歡老實款式黑色火牛咁款嘅史萊姆叉電器,男用家可能會鐘意,入嚟有回帶。

Read more ›
多士爐叉電器   專叉iPhone
by / on 20/11/2013 at 8:20 am

多士爐叉電器 專叉iPhone

叉電器見得多,呢個專為廚房而設嘅多士爐叉電器Foaster,得意得嚟又幾實用。十足多士爐咁有兩個窿位,可以同時叉兩部電話,將部手機插入去就用得,不過只限iPhone5、5C同5S,好自私。我欣賞佢唔叫iToaster,加咗少少分。另外佢可以單手完成整個充電動作,有乜用?型囉。Kickstarter集資中,美金$79有交易。

Read more ›
買bra專用apps    影相量呎吋唔怕外洩?
by / on 17/11/2013 at 2:51 pm

買bra專用apps 影相量呎吋唔怕外洩?

作為online shopping多過行街嘅新女性,有樣嘢點都唔會上網埋,就係內衣褲,因為呎吋真係話唔埋,除非自己著開嘅牌子啦。偏偏外國品牌ThirdLove試圖開闢呢片藍海,推出專為女士量度bra呎吋嘅apps,裝咗佢之後對準自己上半身影張相(當然係著住緊身衫或者戴住bra啦),佢就會自動幫你計算呎吋,然後揀選合適嘅bra比你。擔心啲相會流出喺討論區見返自己?官方聲稱用上128-bit加密系統,保證安全,不過係咁意影張相就話計算倒呎吋,身為女士用家,我覺得都係信唔過,當開吓眼界算喇。

Read more ›

《Star Wars》再乘Moleskine     2014潮人筆記本
by / on 16/11/2013 at 3:52 pm

《Star Wars》再乘Moleskine 2014潮人筆記本

《Star Wars》繼續出,第7集2015年12月18日先上映,同佢一直friend底嘅潮人筆記本Moleskine亦宣佈繼續出《Star Wars》嘅2014年簿仔,今次有尤達大師、黑武士、Luke Skywalker同埋Han Solo四個款,今個月底有得賣,照舊都係限量供應,買嚟都預咗唔用齋儲。其實不如考慮出個Star Wars手機版Notepad啦,實用啲。

Read more ›
太陽能手機叉電椅   邊休息邊快叉
by / on 15/11/2013 at 10:21 am

太陽能手機叉電椅 邊休息邊快叉

智能手機經常無電,見倒叉電器有時仲開心過見倒男朋友。上網發現美國波士頓最近喺街裝咗兩張太陽能充電椅Seat-e,坐上去休息之餘仲可以幫部手機叉叉電,真心覺得香港嘅手機品牌可以考慮整幾張放喺街當宣傳,效果應該好過周街放啲上網熱點站,不過到時會唔會長期比人霸佔一邊叉電一邊打機Whatsapp呢?同埋張椅點解設計得咁高身?女仔著短裙仔好尷尬噃。

Read more ›
38%兩歲以下小童玩手機   篤芒當食奶咀
by / on 12/11/2013 at 7:10 am

38%兩歲以下小童玩手機 篤芒當食奶咀

我認我保守,每次見倒小朋友拎住部手機或者平板電腦起勢篤,我都有啲擔心。外國網common sense研究發現,今時今日兩歲兒童用手機打機睇片嘅數字已經達到38%,即係每十個就有接近四個小朋友篤芒,你無聽錯,係兩歲!我當堂嚇一跳。研究仲話8歲以下嘅有成72%!睇完呢個數字,只可以話而家真係數碼年代,但係兩歲小朋友篤芒我真心接受唔倒,亦想勸吓家長們,唔好每次個仔喊就質部智能電話比佢玩,比啲耐性陪佢玩吓,手提電話唔可以吓吓當奶咀咁用o架!

Read more ›
光頭叔叔突入貓世界 動物潛力圖任惡搞
by / on 07/11/2013 at 7:21 am

光頭叔叔突入貓世界 動物潛力圖任惡搞

呢幾日漫畫app「Bitstrips」突然紅到開巷,facebook狂洗版,好切合香港人嘅個性。講到漫畫公仔,呢位韓國網友nu1t一定要識,佢設計咗一個有啲似小丸子爺爺嘅光頭叔叔,再將迷迷key入唔同嘅貓相入面,再後期加工令到光頭叔叔猶如同嘅巨貓玩緊傾緊瞓緊咁款。佢最厲害係搵倒啲樣貌表情好有潛力嘅貓貓圖比佢任改,睇完由心開心返出嚟,唔知有朝一日會唔會揀中忌廉哥呢?

Read more ›
尋犬手機應用程式   樣貌辨識全民緝犬
by / on 01/11/2013 at 8:58 am

尋犬手機應用程式 樣貌辨識全民緝犬

貓仔狗仔天生鐘意自由自在嘅生活,萬一唔好彩走失,主人真係傷心到極。外國公司Philip Rooyakkers最近推出咗一個叫PiP嘅手機應用程式,可以透過容貌辨識技術紀錄底寵物外貌,令主人可以更易搵返走失嘅寵物。應用程式免費下載,下載完幫寵物影相同埋輸入基本資料,走失咗時就可以即時通知附近嘅診所、動物收容站或者其他Pip用家,有人見倒疑似走失嘅狗仔亦可以上載到Pip,不過要登記自己嘅寵物就要每年比$150港幣左右,貴過用晶片或者牌仔。

Read more ›

12生肖骷髏手機吊飾    馬年擋煞
by / on 26/10/2013 at 5:13 pm

12生肖骷髏手機吊飾 馬年擋煞

玩具嚟講,我覺得呢款幾有創意,仲好啱中國人o忝。日本海洋堂又有新扭蛋出,今次玩12生肖,不過係骷髏頭骨版,睇落像真度高,又幾醜樣,每個仲有條繩跟比你當手機吊飾用,預計今年底推出,聽聞遲啲仲會推出金色、銀色嘅隱藏版,好認真。如果下年馬年犯太歲,買隻骷髏吊飾掛身擋擋煞都唔錯,不過唔知阿媽會唔會發脾氣呢。

Read more ›
的士大哥請安裝   手機專用「駕駛模式」
by / on 18/10/2013 at 12:00 pm

的士大哥請安裝 手機專用「駕駛模式」

今朝搭的士,司機有幾部電話不特止,仲一邊揸車一邊玩WhatsApp,坐喺後座嘅我覺得好驚險。紐約設計師Joey Cofone最近發明呢款手機專用嘅「駕駛模式」,類似搭飛機嘅「飛行模式」,一開著佢,除咗導航同埋hands free傾電話可以繼續用,其餘提示、訊息統統閂晒,有人打嚟會自動回覆話你揸緊車,當架車停低就會一次過報告返所有來電資料,聽落幾實用,不過一日無立法,司機大佬啋你都傻。其實我想有埋「坐車模式」當大家搭巴士或者地鐵時,講電話或者用speaker打機聽歌全部功能自動關閉,車廂即時清靜晒,諗起都爽。

Read more ›
日本Docomo出米奇老鼠手機   規格唔失禮
by / on 12/10/2013 at 7:09 am

日本Docomo出米奇老鼠手機 規格唔失禮

食飯搭車經常見倒小朋友拎住部手機篤篤篤,似乎手機使用者嘅平均年齡越嚟越細,日本DOCOMO都知,最近宣佈推出呢款DoCoMo F-03F嘅米奇老鼠手機,擺明主攻o靚仔市場。背面大大個老鼠嘜頭,規格唔失禮,行Android 4.2 Jellybean、2.2Ghz處理器、內置2GB RAM、4.7吋芒,仲有1300萬像素鏡頭,細路仔用我嫌浪費咗啲o忝!12月中有得賣,有藍、粉紅同埋白三隻色,差啲唔記得講,影相可以加埋迪士尼filters,唔好話細路,我估好多(心智未成熟)嘅女仔睇到都會尖叫:「好得意呀!」然後走去排隊出機。

Read more ›
手機都有DIY! 網上教學自砌$1500搞掂
by / on 30/09/2013 at 8:38 am

手機都有DIY! 網上教學自砌$1500搞掂

今個星期你有無換iPhone 5s或者Xperia Z1?不停出機人有我有,多多錢都唔夠駛。不過去到咁極端自己造一部電話出嚟又唔係人人都得。網上有神人自砌手機,完成品睇落嚟幾靚,手機基本功能例如發短訊、打電話甚至儲存老友電話號碼都做倒,不過就無得玩facebook、whatsapp。如果你有心,又有啲機械工程知識,可以上呢個網學整一部。網主好有心,有埋連結教你去邊度買底版同埋元件,大概$1500港幣買倒,但係手尾長有排搞。整完記住share比我哋睇。

Read more ›