潮流嘅嘢好多時都係一個循環，最近有日本網民發現，日本品牌PAGEBOY出嘅彩色寛褲睇落熟口熟面，原來好似漫畫《幽遊白書》入面嘅主角嘅服飾呀！唔講唔覺，一講就好覺嘞。冨樫似乎都幾有潮流觸覺喎。

日本嘅設計真係好出色，好似最近Twitter熱傳嘅呢套書封套加書籤，由大阪嘅「正和堂書店」(Seiwado book store)設計兼出品，將書封面變成雪條、書籤變成雪條棒，唔睇書嘅都想買返套。佢哋之前嘅另一個project用嘅就係紙袋做書套再加法包嘅書籤，一樣好靚，入嚟有回帶！

係幾靚嘅，不過會唔會唔敢放入口？日本有網民喺精品店買咗呢隻水杯，杯底裝咗七色玻璃紙，倒滿水嘅時候就會見到好靚，隻杯只係賣370円，好抵。

自從進入咗Photoshop年代，好多人都放棄曾經叱吒一時嘅Windows「小畫家」。不過外國嘅Pat Hines就唔同，佢講明唔想用Photoshop，但就用咗超10年時間喺醫院嘅Reception枱度繼續鑽砌小畫家，仲出埋本e-book。本書主要講80年代一班年青人去宿營遇到嘅古怪事，不過最搶眼係入面嘅插畫，全部都係用小畫家製作，每幅都超高質，佢仲叫大家不妨去佢喺Deviantart嘅網頁下載再zoom近啲睇，就會發現解像度同細緻度都極高，入嚟有得慢慢研究，堅勁！

香港好多品牌嘅fans page出名抽水抽得快，不過講到敏感議題例如同性戀合法化呢啲，佢哋就好避忌唔敢表態，相比起外國品牌就有guts得多，好似好多人鍾意食嘅Doritos粟米片，最近就高調出咗款彩色粟米版版本，再加句標語：「There’s Nothing BOLDER Than Being Yourself」，撐大家做自己唔駛怕。入面嘅粟米片真係有唔同顏色，不過呢包嘢超級市場無得買，係同團體It Gets Better Project®合作嘅計劃，要買就要登入網址捐10蚊美金以上支持唔同團體先可以買倒，有意義！

之前都有好多人試過將舊嘅黑白相變彩色，不過今次全輯相片都係香港背景，由香港人Victor Liu製作，睇落特別有親切感。專輯名為「Colourised Hong Kong」，將40至60年代嘅舊香港，例如中環電車路、山頂風景、啟德機場嘅黑白相片重製成彩色相，效果好細緻自然，老實，我好懷念以前充滿人情味嘅舊香港。