好似都過咗半年咯，之前報導過嘅《怪異集》改編網劇繼開拍第一個故事〈恐怖整容〉後，一直都無嚟聲氣，以為無下文添。好彩，最新消息已經開拍緊第二個故事〈鬼徵婚〉，有我非常欣賞嘅演員張松枝做男一，其他演員有葉暐、毛敏樺等等，飾演被強姦虐殺再化成厲鬼報仇嘅女一唐紫睿，OK靚女吓，身材亦唔錯，值得留意。不過講乜都假，究竟幾時播先？我有少少等到頸長。

高登神作最終篇三部曲最終篇《壹獄壹世界‧高登闊少踎監日記》，亮點一定係何家駒，呢部戲係佢遺作，角色雖為十二惡人之一，但實情係善良一族，睇大咪從良已經值回票價，因為印象中，大咪拍乜戲都未做過好人嘅。

HKTV被屈，王維基被坤，員工繼續喺政總集會，擒晚仲搞咗場港版《半澤直樹》，四位你未必叫得出胜甚名誰嘅演員，憑出色肢體動作同對白，博盡全場掌聲，搞笑之餘，我仲有少少感動。