都係嗰句，支持港漫唔係得個講字，要用實際行動，即係課金，難得有班有心人搞興個市，我哋係咪好應該擺低$88以示鼓勵呢。且看12月3日出版嘅《漫畫賓治2》陣容──陸志明、鄭少現、陳明、Yas、上官小威、上官小洪、張萬有、甘小文、謝志榮、少傑、鄧本邦、黃書慶、梁偉家、金城、郭小峰、Ah Wah、Cody、Joe Wong、李紅劍、周蔭龍、小魚毛等等，唔敢話個個都識，唔敢話個個手畫都啱你睇，但拎上手嗰種沉甸甸手感，正正係實體書先畀到你嘅睇公仔書味道。唔使諗，撐喇，好睇嘅，追買番第一期都唔過份。

有睇今期《鐵將縱橫》「福龍週記」，都知福龍同牛佬商討緊點樣打擊網上盜版漫畫，上網睇漫畫係賊仔所為，呢點無可置疑。要睇，一係真金白銀科水，一係就唔該睇啲講到明係免費嘅網上漫畫綜合雜誌，例如正在籌備當中嘅《漫畫賓治》，有問陣容？拿，照炒畀大家睇，包括Yas《笑傲光湖》、小魚毛《飯煲超人》、陳華《阿華說話》、陳明《三界》、黃書慶《動物武林》、Masterko《科學幻想劇場》，仲有少傑、鄧本邦未定名作品，同上官小洪《港漫回憶錄》、上官小威《小威隨筆》等等等等。老實，未知質素好壞，但咁多個古仔連載，斷估總有一個啱你睇啩？

即係咁，唔好成日話港漫無出路，只要質素高、古仔好，就一定有捧場客，大渡省靚招牌之作《欲望之翼》賣斷，依家加推第二版，仲話不計成本膠面印刷兼隨書附送封面原畫卡一張添，12月18日準時見街，未買嘅係時候入手喇。

係誇張，但絕不失實，《欲望之翼》創刊號堪稱「Masterpiece」，實在太完美，基本上無一格係可以挑剔嘅，花六個月時間先製作一本書，呢啲就係慢工出細貨嘞，質素非一般期期都打但又唔知為乜而打嘅流水作業式港漫可比，賣$78，係好貴，但真心Mode，值。

大渡搞一周年讀者交流會，真係Good到無可再Good，可以坐定定同司徒劍僑、袁家寶、曹志豪、鄺彬強、黃水斌同少傑六大主筆打番個老邊，食飽影靚相，影完相抽獎，抽完獎睇新書《欲望之翼》，諗吓都開心呀。

  擒日終於有時間過老尖參觀「足印──山月畫友聯展」，山月畫室歷代弟子嘅畫作固然值得欣賞，但作為港漫迷嘅我，鏡頭免不了聚焦喺香港漫畫家嘅畫作。