大家Like咗由阿傑多同葉明發扯頭纜嘅面書專頁「獅子山羊」未？未就唔該快手支持吓。而創業第一砲呢，就係呢個「爆熱漫畫創作班」，保證「將整個漫畫製作過程完全教學」。學費？無言明。「爆熱」呀，你仲有無一顆投身或認識漫畫嘅爆熱之心？唔好咁多藉口，仲有嘅話，WhatsApp佢哋喇。

唔好成日顧住做低頭族打機，你有幾耐未玩過拎得上手嘅實體玩具？而實體玩具，係應該攞出街玩嘅，拎出街玩之餘，仲應該高層次啲，搵埋場景擺靚Pose影相。面書專頁「玩具外景拍攝樂」就有大把呢類靚相，主角係Lego minifigure、各式各樣人偶、模型等等，未必有實際Message，但大部份都構圖不俗兼喺香港取景，睇得份外有親切感吖嘛。

好嘞，支持唔係空口講白話嘅，實際課金先係王道，我好Like嘅面書專頁「另類漫畫」出2018年月曆，主題當然係籃球喇。A5 size，每個$120，即日起至12月1日早鳥價開訂一條紅衫魚。我必買當精品儲，支持本地創作，大家未買月曆的話，可以諗諗。

速遞員最好嘅朋友除咗office嘅接待員之外仲有邊個？就係狗狗嘞。外國好多人養狗，外國UPS嘅速遞員喺Facebook開咗個page，專門分享工作期間遇到嘅狗狗。大部份都係好熱情咁招呼佢哋，好多因為送貨送到熟晒，每次都等佢哋派零食，好溫馨。除咗狗狗之外仲會間中有貓。而UPS總公司就乘機抽抽水，話證明佢哋嘅員工同客人嘅關係好好，無論4隻腳定2隻腳嘅都一樣。鍾意狗狗嘅可以like埋佢哋嘅專頁「UUPS DOGS」。

黃水斌最新面書專頁「英雄本色鋼筆手繪漫畫」，大家一定要Add。呢個絕對係2017港漫界好消息，話說水斌同電影公司攞正牌，將會繪畫鋼筆電影漫畫系列《英雄本色》，水斌剛剛喺面書登咗幾幅作品，堪稱有聲Post，啲線密到呢，構圖準到呢，面相靚到呢，一睇就知佢畫緊邊個場景，幕幕經典回憶返晒嚟。睇Post，我仲睇到感動位，水斌留言曰：「做了這個行頭二十多年！一份手藝由被人尊重，到近幾年行業式微而不受重用！這感覺好難受，希望大家给我一個機會，支持我繼續畫落去！這幾年真的要多謝我的家人，尤其是媽媽！沒有她支持，我方向盡失，多謝你！沒有你支持我也不會實行這些夢想。」有媽的孩子像個寶，水斌媽媽真好。支持你呀水斌，努力幹下去呀！

外國警察一向有幽默感，最近網上好多人討論澳洲「新南威爾斯州」(NSW Police Force)警局嘅Facebook專頁。有網民放咗上Imgur討論，發現呢個Facebook專頁好有幽默感，仲好多動物睇。例如會影住隻狗仔喺警局入面，然後作啲對白出嚟，話佢要報案因為主人走失咗12秒。又例如影隻坐喺電腦枱前嘅狗狗，話佢hack入警局電腦搵緊好主人。除咗狗狗之外仲間中有貓客串，睇得出佢哋好有愛心。佢哋間中亦會講吓哲學性嘅道理，勸吓人唔好超速，又會影吓街頭嘅搞笑嘢，總之就同警察一向以嚟嘅形象好唔同，贏得好多網民讚賞。雖然成日有搞笑嘢，但係佢哋嘅FB都有尋人啟事、最新消息之類，並唔係只係玩嘅。

喺網絡嘅年代，經常會有人失驚無神爆紅，之前有個外國罪犯因為靚仔紅咗，最近又有個三藩市嘅警察Chris Kohrs爆紅，佢無好勁嘅戰績，純粹捉吓偷手機賊或者準備打劫便利店嘅笨賊，紅嘅原因好簡單，兩個字：靚仔！佢一張巡鑼時被偷拍嘅相喺網上瘋傳，紅到有人幫佢開埋Facebook粉絲專頁，而家有接近四萬個粉絲，啱啱專頁管理員Nathan Tatterson同發現靚仔Chris嘅Mark Abramson仲同型警一齊合照，估唔倒全部都係仔，滲出陣陣gay味。

有理由相信，10年後人口入面大部份都係近視仔女，無計，兩歲就開始對住個芒日篤夜篤，深近視是常識吧。外國4歲嘅Noah仔因為近視要戴眼鏡，但就令佢好無自信，為咗氹佢，媽咪就喺facebook開咗個專頁「glasses for noah」，呼籲哥哥姐姐將自己嘅四眼look放上去，鼓勵吓Noah仔，估唔倒吸引咗七萬幾人like，你有無四眼相？放上去呃吓like啦！

身在香港嘅台灣插畫家「爵爵」網上好紅，雖然係台灣人，但好緊貼香港新聞，之前串爆東張西望嘅四格插畫網上好多人熱傳，敢言亦有自己態度，難怪facebook專頁「爵爵港不停」有超過8萬粉絲。由於文化差異，佢畫咗一系列香港vs台灣嘅插畫，今次集合全個系列比大家重溫吓，香港壟斷企業TVBBQ當然榜上有名，另外，原來台灣招牌同日本一樣都係得打直款式，唔似香港又直又橫，又原來喺佢眼中，香港嘅古惑仔個個都好似浩南哥咁有型‥‥‥

仲記唔記得內地爆紅嘅流浪漢犀利哥？原來除咗犀利哥，內地仲有好多「潮」人衣著好大膽，啱啱上網發現一個Facebook專頁叫「Accidental Chinese Hipsters」，入面有好多「唔覺意潮咗嘅中國人」，有紅衫紅褲花領呔嘅伯伯、露腰配吊帶超大膽著法嘅大叔‥‥‥只可以話地大物博，大開眼界，不過我懷疑有啲係日本人嚟嘅，自己入嚟評吓理，順手學吓潮著之道。