《葉問4》過兩日正式上映，宇宙最強甄子丹有一定吸引力，砰零碰隆打番兩粒鐘應該幾過癮，如無意外我會入戲院捧場。食住個勢，EnterBay都推出番隻1:6葉問人偶。樣似，應份；全身有超過30個關節，擺Pose自然；手有五對，出日字衝拳無難度；個布景紙板就削咗啲，有好過無咁喇，其他配件有曲棍球棒、木椅、木樁、地板、旅行箱、地台、人偶支架、黑色唐裝衫褲、黑色唐裝長衫、色襪同黑鞋等等。望一望價錢，$1,888，我猶豫中，但心思思想買。

好佩服Youtube頻道「capTV」，咁抵死過癮嘅惡搞都諗得出，《葉問4》喎，打完日本人打完洪金寶打完拳王泰臣之後打羅莽喎，淨係呢個戲碼已經夠好笑，夾硬幫「最難捉摸導演」同Wilson Yip同「宇宙最強」Donnie Yen改對白簡直癲喪，而泰臣一句：「My name is Tyson，Tiger個Ty，神仙個son。」九唔搭八程度亦達十粒星。最最最最最攞命係招式名，甚麼羅莽360、羅莽280、羅莽旋風腿、羅氏迴旋、羅莽連彈、羅氏世界……大佬呀，搞到我真係想《葉問4》搵羅莽做主角呀。

係咯，係嗰瓣就係嗰瓣，學乜嘢人拍甚麼賀歲片吖，既稱「宇宙最強」就好應該賣弄拳腳展露身手，講緊嘅係甄子丹，好好地拍番《一個人的武林》呢類打餐懵嘅功夫片，成件事咪妥晒囉。

究竟人稱「宇宙最強」嘅甄子丹定有「李三腳」之稱嘅李小龍好揪啲？可惜兩人生喺唔同時空，無機會較量。而喺李晉呢位老兄心目中，兩人功夫喺伯仲之間，仲特登做咗條動漫向兩位功夫界巨星致敬添。