而家啲Gel甲技術真係出神入化，有日本網民最近分享咗呢款生蠔指甲，像真度極高，其中一粒仲有埋蠔殼，靚唔靚就見仁見智，不過望住佢應該成日都想食蠔。樓主仲分享埋另一隻手嘅指甲，原來有杯啤酒，出街會唔會太浮誇？

全世界都講緊環保，最近見到墨西哥啤酒Corona嘅新方案，啤酒罐嘅底部有特別設計，扭一扭就可以同另一罐扣埋，可以減省包裝所用嘅紙同膠，而且想買幾多罐隨個人喜好組合，拎出街仲幾有型，越長就顯得你越強。

呢個小知識唔少人都知，不過嚟緊聖誕去朋友屋企開party都幾實用，當溫故知新啦。有日本網民分享佢嘅雪啤酒秘技，就係將張廚房紙整濕，然後包住罐啤酒雪入冷格，本來要4個鐘先雪得凍嘅啤酒，而家10分鐘就變冰凍！啤酒或者所有罐裝飲品都得，好實用。

如果遇到啲大型活動賣啤酒，尤其外國人飲得瘋狂，逐杯斟真係唔係辦法嚟。於是就有呢款Beerjet出現喇，7秒可以倒滿6杯。

日本人鍾意飲啤酒，又鍾意富士山，所以有呢隻叫「泡雲」嘅啤酒杯出現都好合理。杯邊有個富士山景，當你斟啤酒入去之後，就會好似見到喺雲中嘅富士山一樣，如果斟清酒落去，就會見到富士山嘅倒影。由高岡市專做「高岡銅器」嘅「銀雅堂」出品，用日本傳統工藝打造，勁在全隻杯都係用「錫」，唔易氧化同埋防腐蝕，仲可以放喺雪櫃雪凍先拎出嚟斟啤酒，即時有超凍效果，呎吋都有特別研究話有好手感，所以價錢都唔平，樂天網賣緊5940円，即係4百幾蚊港紙。

日本人好鍾意飲啤酒，如果返工都想飲點算好？之前都有唔少零酒精零卡路里嘅「啤酒」，不過一睇就知你飲緊，返緊工唔夠專業。最近Suntory就公佈推出呢款零酒精嘅「透明啤酒」，即係同之前嘅透明奶茶、透明檸檬茶一樣道理。廣告標榜可以喺辧公室甚至做完運動飲，透明色加埋膠樽設計，個樽寫住All-Free All Time，感覺似碳酸飲品，但係飲落就有啤酒嘅味道。嚟緊6月19日就會正式推出，唔知遲啲會唔會推出一個有酒精嘅版本呢？我想買喎。

距離櫻花開仲有一段時間，不過日本Asahi啤酒已經公佈2018年呢個春季櫻花系列嘞！全粉紅嘅罐裝，加埋櫻花設計，勁靚！總共有三個款式，最經典嘅Super Dry由銀色罐變成粉紅色，另外仲有Clear版「桜の宴」，兩款都係1月30日期間限定有得買，去開日本可以買俾你嘅酒鬼朋友。至於樽裝就2月20日開始推出，相信到賞櫻季節都會繼續有得賣。

喺日本無論係睇足球定棒球，都隨時可以買杯啤酒飲吓，而且唔駛自己去買，因為有呢班妹妹揹住啲啤酒跑上跑落，見到佢哋跑到身水身汗，真係好想幫佢哋攝毛巾，免得感親嘛。明治神宮野球場嘅Twitter就出咗條片，影住兩住妹妹補給啤酒嘅情況，據講一場波大約要補給15次，而裝滿啤酒嘅容器大約重13kg！仲有，其實早兩個月都有電視節目訪問過佢哋，拍佢哋工作情況，位妹妹仲好可愛喎！

喺東京板橋區役所前嘅呢間「麺屋はちどり」，夏季推出咗呢款「ビール麺」，杯啤酒入面有麵，仲要有埋3:7黃金比例嘅泡喺面，睇見都透心涼，不過食起上嚟……

喂，OK有新意喎，講緊嘅係「古惑仔」啤酒，招紙黑底黃字，仲有大大個大頭浩南剪影，整體感覺係幾型嘅。至於味道咯喎，Sorry未有機會試，牛佬只係喺今期第1972期《古惑仔》專欄「古式仔俱樂部」透露，呢支啤酒由加拿大嗰邊生產，仲話為咗控制質素，決定試到正一正先推出市面，所以暫時未有得飲，價錢亦未知，大家畀啲耐性等吓喇。計我話，好唔好飲係其次，最緊要個招紙做得穩穩陣陣，唔好咁易甩，咁靚仔，我打算放入飾櫃儲架嘛。

此之謂現代版酒池肉林也，池係啤酒池，肉係小鮮肉，用600磅啤酒浸浴究竟係乜嘢感覺呢？我英文一般過一般，如果無錯的話，隱約聽到片中人話：「It’s cold, it’s awesome!」但見佢口啖啖仲即攞個杯兜起啲啤酒飲，爽！不過如果真係有機會浸啤酒浴的話，我諗我會搵埋Partner一齊浸，咁當然係搵個靚女喇。

喺日本睇球賽，其中一樣最開心就係有啤酒飲，仲要係一班可愛女生揹住個啤酒桶即場斟比你飲。近日日本twitter就熱傳右上角呢張後台斟啤酒桶嘅相，仲引嚟網民無限聯想……話「將液體注入可愛嘅女生度」，好鬼衰。其實，睇見幾個瘦小嘅女仔要揹住咁重嘅酒桶就知辛苦，網民仲貼咗好多球場上啤酒女生嘅相，青春呀！有機會去日本睇球賽一定要幫襯吓！

男人的浪漫，有時候就係咁簡單。啱啱睇到條YouTube片，片中人做咗個實驗，就係一次過同一時間開5個啤酒樽蓋，靠嘅道具就係5把間尺，5個男人一人一隻手撳實支啤酒，間尺呈星形擺法，一撳，噗！5個樽蓋一齊打開晒，之後幾個男人又大叫又cheers，好high好浪漫！我都想試吓，如果有人陪我玩嘅話。

日本人飲啤酒有幾講究，睇佢出啲產品就知，之前都出過幫啤酒加泡嘅產品，今次就輪到官方，直情係喺廠直接入樽送貨俾你，而且仲要連埋部同餐廳相類近嘅啤酒機，即係可以斟啤酒再加泡嗰隻！夠凍，啲泡又啱啱好！暫時只限東京區，8月開始服務，每人一個月可以訂兩桶2公升啤一啤，而且之後仲可以訂季節限定版。呢個服務會陸續推廣到其他地區，如果香港有就好喇，我諗好多人會整番個喺屋企……

今個禮拜去開北海道嘅女士，可以試吓呢罐Suntory嘅Precious啤酒，因為佢有大家好鍾意嘅骨膠原！骨膠原(Collagen)即係膠原蛋白，可以令皮膚更加緊緻有彈性，貪靚嘅男仔都可以試。不過暫時只限北海道有得賣，一罐平均有2000mg骨膠原，咁想皮膚靚啲咪要飲多幾罐？