呢張相真係好治癒，唔分享唔得。啱啱喺Twitter見到，由於太得意，好快已經超多人RT。呢隻柴犬抑睡已經好得意，仲要攬住個同佢一樣樣嘅咕臣，好處係可以遮吓肚仔唔怕凍親。睇返佢嘅Twitter，主人經常都同佢試新造型，屋企仲有兩隻狗狗陪佢食玩瞓。入嚟有回帶。

貓奴最怕嘅畫面出現嘞！日本有位貓奴最近返屋企就見到呢個慘況 ─ 屋企嘅咕臣(比隻貓抓)爛晒，入面嘅白色粒粒散滿一地，而隻喵星人就樂在其中玩得好開心，仲搞到一頭都係！輯連環圖放上Twitter後火速熱傳，貓奴除咗要掃餐死之外，仲要驚隻喵唔覺意吞咗啲粒粒入肚。不過睇隻喵星人個樣，似乎想講：「哦，原來落雪就係咁，幾浪漫喎。」

邊個貓奴唔想左擁右抱，有成班喵星人圍住你瞓？好喇以後唔駛FF，因為日本「フェリシモ猫部」將會推出呢款喵星人咕臣，長條形，而且一個咕臣有5隻喵，買齊4個款，就可以營造倒有20隻喵星人陪瞓嘅奇景！開價5600円(未連稅)，第一個款預計2016年1月到返，唔知買返去屋企隻喵星人會唔會呷醋呢？

你最常用嘅Emoji公仔係邊款？左下角嘅戚嘴同埋頂層嘅屎屎笑臉都係賣飛佛，日日開Whatsapp都用幾次。見得多自然有感情，所以知道呢啲emoji公仔出咕臣我都有啲心郁想買返個放喺梳化，開價$160港幣左右一個。除咗emoji公仔，網絡常用語例如「LOL」、「OMG」、「BFF」等都有出咕臣，不過嗰款就求其咗啲‥‥‥唔駛客氣喇。

坐喺梳化開tablet或者手機時，經常會發現唔夠電，呢個時候附近無插頭或者叉電器，但係又唔想郁‥‥‥呢個叫Power Pillow嘅咕臣針對懶人問題，內置12000mAh電量，平時當咕臣挨吓攤吓，緊急時就用嚟叉電，而家喺Kickstarter集資中，起標價港幣5百蚊左右，仲可以買多嚿電，加埋1千蚊唔駛，到時你就可以過hea爆生活。