Barbie成日比人評擊身形比例違反自然定律，過瘦鼓吹減肥歪風。Facebook群組Plus Size Modelling最近舖咗呢張加大碼Barbie圖，叫人投票玩具公司應否量產呢件產品，一Like等於一贊成，唔夠10日已經有超過4萬個Like，不過有網民就留言肥啲無所謂，但可唔可以走咗個三下巴。嗱，如果贊成嗰啲要一人買一隻，係咪仲咁多人Like先？

IKEA隻路姆西差唔多講到水尾，不過可以想像聖誕party抽禮物應該好大機會抽中。講返正題，法國IKEA又有新嘢玩，早兩日喺巴黎Gare de Lyon車站整咗間Popup store，今次將平時嘅示範房放大晒，當大家入去參觀時就變晒小矮人，有超大型梳化、枕頭、牙刷、水杯，大人細路都玩得好開心，呢招宣傳技倆都幾醒，起碼吸引倒好多人影相，賺晒。

日本麥當勞推出加大碼薯條，有網民就自製蘋果薯條，除咗一條條蘋果似足肥版炸薯條之外，連個麥當勞盒都係用蘋果雕成，厲害！食晒成包都唔怕熱氣唔怕生暗瘡，最啱用嚟呃啲好鐘意食薯條嘅小朋友，不過可唔可以炸炸佢先，香口啲。