【感人】無私流浪漢拎全副身家幫人 好心有好報改變人生

係愛呀,呢件真人真事好感人,話說27歲嘅Kate McClure某日由新澤西揸車去費城,途中架車無晒油,四圍又無人,呢個時候佢遇到流浪漢Johnny。Johnny叫佢坐返喺車鎖埋門,因為附近好危險,幾分鐘後,Johnny帶咗啲汽油返嚟,原來佢將自己全副身家$20用嚟幫助呢位女士,確保Kate可以安全返屋企。之後Kate返去還錢俾Johnny,仲不時拎啲日常品俾佢,佢得知Johnny曾經做過彈藥技術員、消防員同埋救護人員,不過中途遇到挫折,令到佢成為流浪漢。Kate將呢個故事放咗上籌款網站GoFundMe,希望為Johnny籌一啲基本生活費,令佢可以租屋同埋搵工,重新做人。本來目標籌款10萬美金,由於好多人俾佢哋兩個嘅無私行為感動,而家已經籌到美金36萬。最新消息係Amazon嘅warehouse已經聯絡咗Johnny,提供一份倉務工作俾佢,而Johnny亦會將剩餘嘅善款捐俾慈善機構。其實每個人嘅人生都會遇到挫折,只要有人願意伸出援手,就可能令到對方嘅人生改寫。所以大家有能力嘅時候,記住幫助吓身邊有需要嘅人。

Read more ›