Fake晒！真係俾牛佬玩死，又二呎四度頸對峙，又疑似中流彈，又甚麼「後腦附近拖出一條血水，頭部似是無力的往左方一側」，原來統統都係為製造高潮而設，今期第2087期《古惑仔》揭盅嘞，結果係因為「好彩」子彈射唔中，佐維呢個「永遠第一」今鋪唔使死。相信呢兩三個禮拜，一眾讀者包括我個個都心如鉛墜兼鬼殺咁嘈，全拜如此有壓迫感劇情所賜，計落牛佬係好嘢嘅，抵讚。這邊廂執番身彩，那邊廂趙繼邦睇個勢都係要死，我估計係死喺丁瑤呢個老虔婆手上，不過就由金尊貴落手，唔知有無估錯呢？

無喇，呢次真係無交嗌喇，牛佬喺今期第2085期《古惑仔》出埋下期預告圖，佐維同趙繼邦一齊攤屍成地血，仲定埋下期書名叫〈一起「上路」〉，佐維真係要向閻羅王報到喇。今期雖然唔算打得好燦爛，但都算好精采，係有少少估唔到映姐一個斧頭劈中天靈蓋就收皮，之前唔係有伏線略略講過佢打算投靠洪興嘅咩，點解咁快整死佢？另外，斷估我諗有好多讀者都同我一樣，唔捨得佐維死，但一本公仔書無理由唔死重要角色嘅，所以縱依依不捨，我都係支持牛佬決定嘅，還望下期佐維死得轟烈啲、有型啲Or有情懷啲，兼可以的話，留立花正仁一條生路喇，我好驚連立花都打柴呀……驚驚！

牛佬喺今期第2082期《古惑仔》搞Gag，今次唔係畫Q版，而係用一格畫讀者，透過讀者把口話：「呀，呢個天川秀，居然係佐維嘅徒弟？」係OK好笑嘅，不過呢，天川秀同佐維係師徒關係，我諗好多讀者都同我同一樣，上期已經係咁估喇。另，睇到「牛佬的話」，我有啲驚，事關牛佬咁寫：「……佐維And立花正仁呢兩大神人，今勻真係紮紮地嘞！」猶記得早十期八期兩大神人交心對話，大家都好欣賞對方兼視對方為知心友云云……如此這般，好似有晒伏線咁嘅？牛佬，你唔係真係想整死兩大神人呀？

無記錯的話，應該前後不過四期貨仔，我們的暗黑之門殺手Tommy，喺今期第2074期《古惑仔》亦步紅魔女後塵陣亡，同樣係死無全屍，仲俾佐維用刀拮住個頭揈揈吓添，好慘呀，之後個死人頭仲要俾鬼子快刀當菠蘿咁削開三四截，好無陰功呀。拿，牛佬，我在此替廣大讀者跪求，話晒係有頭有臉嘅殺手，懇請畫番十頁八頁，交代番Tommy點樣俾佐維KO，否則，我們的Tommy Lin會唔開心架，嗚嗚~

親愛的牛佬，唔好嬲嬲豬呀，睇完今期第2069期《古惑仔》，我真係有少少嘢想講，其實呢……究竟呢……佐維同立花正仁仲要打幾耐先殺到入大廳呢？粗略計都好似四五期咯喎，兩大神人都仲未見到趙繼邦，又何來行刺呢？會唔會耐咗啲呢？劇情推進係慢咗少少，不過好彩，有由讀者變身而成嘅暗黑之門第六名殺手Tommy Lin未死，彈吓彈吓間吓場，用有毒餐刀做武器呢個鋪排亦唔錯，而今期最尾一頁出嘅女殺手，未知名，但面相非常教師Look，好鬼萌吓，造型幾討好，總算有啲驚喜。

唔知大家有無發覺，牛佬好鍾意設定啲女角一頭白髮，胭脂虎謝佩芝如是、九尾狐如是，連最近擔正戲份嘅毒蛇幫春寶山堂映姐亦如是，咁當然，當中梗係以我哋《古惑仔》死忠Fans九姐最索喇。點解咁鍾意白色頭髮呢？照計白色應該最難表達頭髮層次感架，真係想問問牛佬。另今期第2064期《古惑仔》嘅下期預告，居然寫住「佐維And立花正仁各持木刀，預算藉此直搗趙家山莊」，唔係嘛，劈友居然擸木刀？我知兩個都係神人級殺手，但都唔係諗住老牛都無把就可以成功行刺趙繼邦呀？

繼「武神太子」同「地中海」之後，今期第2063期《古惑仔》又送《立花正仁And佐維》海報，多謝牛佬！海報底頁係古惑仔俱樂部網聚相片圖輯，望相發覺都幾人才鼎盛吓，場面好熱鬧，下次再有機會，睇怕我都要參加。至於主角咯喎，立花正仁就畫得一貫地靚仔；至於佐維咯喂，造型好有新鮮感，佢不嬲著開運動衫任由一隻衫袖飄飄吓架嘛，印象中未見過佢著老西打呔，依家登時斯文咗唔少！

當真光陰似箭，日月如梭……我檯頭仲擺住隨《古惑仔》奉送嘅2012年聖誕卡，陳浩南加大飛做主角擺《Gangnam Style》Pose，唔覺唔覺話咁快又一年，過兩Day又聖誕節，人又老多一年嘞。