有時同人嗌交，我哋會話：「俾你激到嘔幾升血。」現實世界有無人嬲到噴血呢？唔知，但公仔書世界裡面有。今期第2221期《古惑仔》解開洪興陳浩南如何過三聯佐敦一戙之謎，俾襯家起咗成N億毒品尾注，佐敦先借醉鬧事搵李成克掃人場，之後醉到嘔，嘔嘅係血，牛佬仲要有咁誇張畫到咁誇張，畫到啲血柱呈放射狀噴出嚟。平時打交就話會嘔血啫，估唔到牛佬夠膽死畫「激到嘔血」，睇到呢格，我真係笑咗出嚟。話時話，雖則大家都係龍頭，但陳浩南始終老奸巨滑，講出古惑，佐敦仔又點會夠南哥鬥吖？呢場文戲，我Like呀。

玩具品牌Fools Paradise出Michael Jordan人偶，名為「XL TWOTHREE」，可換添多對牛角嘅頭顱，50cm高，過癮在「起角」但又起唔晒，衫褲起角，手腳線條起角，眉起角，鬚起角，背脊同蘿柚彎彎哋，對波鞋做得超細緻，膚色做得好自然。限量398隻，358美金加30美金運費，我幾Like，唔知大家點睇？

睇完今期第2117期《古惑仔》，我眉頭有啲皺，劇情發展唔多對勁喎。上期先話牛姑親口講：「我想死。」今期就話牛姑答應佐敦代表三聯出戰「巨星之戰」，咁都算，但之前李建興挾持潘少枝對付洪興，搞到牛姑無端端同李志高打咗一鑊，事後陳浩南都講到明邊個從中搞鬼，牛姑咁就算數？咁都仲肯同佐敦賣命？牛佬試圖透過旁白說明「但最終因潘少枝認為──那是正確的。是以沒有向李建興追究」解畫，但著實牽強咗啲，唔係好合情理。我有個大膽假設，會唔會牛姑喺巨星之戰專登放水，打輸畀洪興跣番佐敦一鑊兼順便尋死？希望估錯啦。

呢排《古惑仔》啲劇情有啲《龍虎門》影子，昔有龍虎群英打甚麼羅剎堡、蓋世堡、電堡，今有佐敦加無常帶三聯同洪興兩大社團打東英堡。今輯古仔叫〈滅東英〉，死得人多預咗，但估唔到牛佬會派膠啫，話說今期第2024期講到佐敦入到東英堡大廳，失去後援成甕中之鱉，情急智生下一槍射熄……唔係直接射熄盞燈，係射爆個燈掣，眼界又唔會好成咁一槍命中燈掣呢下好嘢。先唔講佐敦點知道邊個燈掣屬於邊盞燈，就算知，射爆個燈掣外殼又等唔等於一定射熄盞燈呢？最膠係，點解明明有成盞燈吊喺天花板，咁大目標唔射係要射個目標咁細小嘅燈掣呢？睇完，真係笑咗。

好耐無試過睇一段新聞笑到流眼淚，中國最近有隻手機遊戲好正，紅到成為日本網友熱話，呢隻card game勁在世界觀超宏大，關羽、碧咸、米高佐敦、Mr.Bean可以存在喺同一個世界，尼古拉斯基治可以聯同Lady Gaga打Iron Man，一嘢攻擊扣55，而關羽呢？居然唔夠佐敦打！究竟佐敦係用籃球掟佢定跳過佢？至於戰爭力最高嘛，就係意大利嘅獨裁者墨索里尼，經常被惡搞嘅尼古拉斯基治，無論攻擊力同生命力都勁低，聽見呢堆資料已經好想玩！

我其實唔知呢堆iPhone殼出咗幾耐，不過話晒係iPhone 5，都唔會舊得去邊。話說有朋友終日聽見我痛罵波鞋炒家，搞到我買唔到佐敦11代紅黑復刻版，咁佢見到呢個新產品就即時share俾我喇。35蚊美金，唔駛捱炒，仲有4代、6代、7代多個特別版本鞋底揀，一解我身痕之苦。但係我想講，我用緊Sony手機，冇iPhone 5，咁即係點？

係，我o依家諗起佐敦發燒都落場，射入致勝一球一刻之後要柏賓扶佢離場一幕，我都仲毛管楝兼眼有淚光；係，我仲記得佢當年著45號復出嗰吓幾咁令fans亢奮。Enterbay呢次定價$2188，貴之前隻高比成倍，算！第一隻出45號唔出23號，都算！單頭雕，冇伸脷表情我點擺帶波入樽動作呀？長期企喺度呀？咁Fig咩ure呀？好好好，我有愛，我都算！26號開賣，晨早去旺角攞籌，1000個得200個有得買，下午等網站公佈，之後仲要仆出尖沙咀買？喂我想玩玩具呀，唔係俾你玩呀！o依家我唔買呀！有9折都唔買呀！Fine，你仲想買？想知詳情可以入嚟睇。