面對住酷熱天氣，日本人開始變得瘋狂嘞。最近電視台嘅酷暑警告，個太陽伯伯公仔變咗樣，噴晒汗個樣好慘，網民見到忍唔住改圖，整咗好多個版本出嚟‥‥‥入嚟有回帶，睇得出佢哋真係熱到癲嘞！

蜘蛛俠大家見得多，呢隻日本網民發現嘅再老啲，係隻真蜘蛛，但就有個好似伯伯一樣嘅笑臉，得意得嚟又有啲詭異。其實佢嘅品種係ハナグモ(花蜘蛛)，出名個樣似人，不過今次呢隻就可愛啲，似一個笑緊嘅伯伯。有網民話佢似日本漫畫家「チャーリー野沢」，亦有人話似《薩爾達傳說》入面嘅金克爾。BTW，香港之前都出現過一隻人臉黃蜘蛛，入嚟回帶影片，睇到人心都寒埋。

傳說中九龍仔公園都曾經出現過轉到上天嘅隱世體操阿伯……日本方面，呢位日本網民就遇到一位，見到佢專業嘅起手式，最後落地嗰吓引嚟圍觀者歡呼同埋拍手，勁呀伯伯！不過都係小心啲好。

一講起徒手打熊就諗起電影《復仇勇者》嘅里安納度，戲入面佢俾隻熊傷到體無完膚，不過現實世界就有個63歲嘅日本阿伯成功擊退熊人，仲成為日本網民熱話。呢位身高170cm嘅伯伯係空手道高手，日前釣釣吓魚有黑熊出現襲擊，佢唔驚之餘仲好有計謀，出手插熊眼，最後成功擊退隻熊，而自己就受咗輕傷。警察呼籲民眾下次見到熊時唔好同佢戰鬥，應該要悄悄轍退然後報警。網民嘅留言好正，例如：「偷偷離開之前已經被襲擊了」、「如果係我，四目交投嗰吓就已經腳軟」，照咁睇，里安納度應該要學空手道。

好型，呢輯相值得一睇，尤其是睇埋Before & After之後。相中呢位85歲嘅伯伯打扮得好潮，加埋不經意嘅表情，好有時裝雜誌模特兒嘅風範，原來佢本身係廈門嘅一位農夫，網名「小野杰西」嘅孫仔係攝影師，最近帶爺爺出城市參觀，順便決定幫爺爺轉一轉look影輯靚相，點知效果出奇地好，唔止喺國內好多人熱傳，連外國網站都熱烈轉載。佢仲喺微博補充話爺爺好享受有佢陪伴嘅感覺，而家爺爺身體好、食得好瞓得好，多謝大家關心咁話，喺呢輯相睇到好強烈嘅溫情，

外國好多老人家都仲著得好型，執得好四正整整齊齊，有啲著衫仲大膽過你同我。外國一個時裝界後生仔Christina Belchere最近開咗個Instagram戶口，開宗明義叫@fashiongradpas，入面影咗好多喺佢公司樓下經過，著得好型嘅老伯snapshots，由於題材得意，吸引咗好多外國潮流網站例如refinery29報導，成功吸引好多人follow佢！邊個話老咗唔可以潮？我覺得佢哋型過好多o靚仔，例如天堂鳥。Sorry我唔應該咁比。

衷心佩服！你同我細過都一定試過用Windows嘅小畫家畫公仔，唔係講笑，難嘅程度爆晒燈，但呢個97歲仲有少少視障嘅伯伯Hal Lasko，居然可以每日花10個鐘用小畫家畫8-Bit圖畫，而且水準極高。事緣佢退休後好悠閒，屋企人於是教佢用電腦同埋小畫家，自此發掘咗佢嘅非凡天份。為咗慶祝佢嚟緊嘅生日，網站賣緊佢嘅畫作，部份會捐去退伍軍人基金(VFW)，佢個孫仔仲幫佢拍咗條短片放上YouTube，好好睇。