去開日本可以試吓呢間壽司店，最近有日本網民推介，2小時任食放題價錢2999円，睇落啲壽司好新鮮，而且塊魚生刺身大大件，嚿飯又細細件，性價比似乎幾高，地點係秋葉原嘅「すし酒場　フジヤマ」，入嚟有地址。

和牛祭就聽得多，雞蛋祭都係第一次聽。日本出產嘅雞蛋出名高質，有日本網民最近就去咗池袋一個雞蛋祭，入場費500円，有多款不同產地嘅雞蛋可以試食，現場有白飯提供，打隻蛋落去就可以試到原味，仲可以加少少豉油，我又諗起六師弟嘞！

又係呢隻Suica咭上嘅黑企鵝，去開日本搭JR嘅朋友對佢應該好熟悉。最新池袋嘅 Hotel Metropolitan有佢嘅主題Halloween秋季甜品自助餐，有約20種時令提子、粟子同無花果製成嘅甜品，其中有幾款仲有Suica嘅可愛樣，只限10月20日、26日同27日，大人每位4050円，可以食盡幾款Suica企鵝嘅食品，有興趣嘅可以預約定。

去開東京又想平平哋任食嘅話，日本網民最近推介淺草嘅「浅草むぎとろ本店」，1000円可以任食6款料理，限時90分鐘，逢星期一至五11am-1:30pm嘅首100名入場人士可以享用，去開淺草可以試吓。

作為KFC炸雞fans，可能都知日本有自助餐，不過通常係期間限定，而且只限一兩間店。最近有日本網民去咗名古屋間KFC挑機，除咗有無限炸雞，仲有好邪惡嘅「鬆餅」都係無限供應，入嚟有地址。午餐限時70分鐘任食，成人每位1780円；晚餐90分鐘2380円，去開可以留意吓。不過去親日本，其實我會揀Family Mart或者Lawson便利店炸雞多啲，你呢？

好吸引呀！鍾意食魚子嘅朋友，見到呢幾張相應該會好肚餓。日本漫畫家分享咗佢住嘅酒店嘅早餐，可以自製「海鮮丼」，材料有大大量嘅魚子、三文魚同吞拿魚蓉等等，啲魚子好似唔洗錢咁可以任裝，好吸引！地點係北海道函館嘅酒店「ラビスタ函館ベイ」，有網民話呢度嘅風呂都超正，睇返資料，呢到嘅早餐好出名，有大量刺身任選，入嚟有回帶。下次去開附近可以考慮住呢間。

迴轉壽司食得多，迴轉甜品未試過？最近有日本網民去咗原宿呢間甜品迴轉甜品店Cafe Ron Ron，仲話好好味。呢間餐廳有甜品任食放題，限時40分鐘，每位1800円，樓主挑戰成功，一口氣食咗30碟！去開日本嘅甜品迷可以試吓，入嚟有地址。

覺唔覺得日本嘅炸雞特別好食？呢間渋谷嘅居酒屋「宵の空」最近喺Twitter好多人RT，因為佢推出咗100円任食炸雞放題！仲平過Family Mart塊雞扒！可以喺8款炸雞入面任選兩款，仲有特別醬汁點，睇見都肚餓。不過有網民留言話嗌咗要等好耐先到，應該係防止大家食到佢執笠。

有無鍾意食冬甩嘅朋友？香港無晒冬甩專門店，日本就唔同，唔止大把，仲有放題！呢間Jack in the donuts喺日本有大量分店，今次放題限時60分鐘，每次500円，好抵！你覺得自己可以食幾多個？快啲tag你鍾意食冬甩嘅朋友入嚟。

最近有日本網民推介呢間喺大阪梅田嘅「麵牛」，入面嘅任食放題每位1350円，可以食足90分鐘，又牛又雞又腸，食量大嘅都一定飽。樓主話好高質，咁其實睇相都真係流晒口水。入嚟有地址，去開大阪嘅食肉獸可以試吓。

海膽、拖羅、魚子‥‥‥齋睇相都覺得肚餓，日本有網民推介呢間任食高級壽司，放咗啲相上Twitter後好多人RT。地點喺新宿歌舞技町附近，成人4000円任食，即係3百蚊港紙左右，佢話最推介中拖羅，自問大食嘅去到應該可以回本嘞。

覺唔覺得日本嘅抹茶食物特別好味？抹茶控嚟緊去開大阪，可以去食呢個抹茶自助餐，由9月2日開始逢週末有得食，大量抹茶甜品包括招牌菜式 ─ 好似車胎形狀嘅法式甜品Paris-Brest，今年仲會加入甜薯、粟子同日本南瓜配抹茶嘅食物。如果想食啲咸嘅食物，佢哋都有南瓜忌廉湯、沙律等，食完仲可以嘆返杯抹茶，成人4200円，想試嘅抹茶控記住要預約。

鍾意食壽司嘅嚟緊去日本有新選擇嘞！呢間「かっぱ寿司」喺日本各地都有分店，由即日起到7月14日會喺20間店舖做任食放題， 男嘅每位1580円，女仔就1380円，加埋稅即係港幣100蚊多啲，80款壽司任食，加680円仲可以有埋飲品放題！平日限下午2點至5點，每次食70分鐘，有唔少網民留言話自己可以食20碟甚至25碟，我預自己15碟應該無問題。

呢度有無餃子控？日本東京「高円寺」JR站附近嘅「餃子処 たちばな」有「0円餃子」提供，一直都keep住大人氣。最近又有日本網民去咗食，仲影埋相放上Twitter，話嗌嘢飲就可以任食餃子，好爽。睇見啲餃子仲要用鐵板上熱辣辣，真係有啲肚餓。有另一位日本網民兩個男人去食，每杯飲品350円起，佢哋飲咗兩個鐘，食咗三客鐵板餃子，埋單2350円，每人唔駛港幣100蚊，超抵！飲食網站食べログ嘅評分都唔錯，下次去開東京記住試吓嘞！

各位食肉獸齌睇相應該已經好興奮！呢間日本東京嘅餐廳「肉塊UNO」最近推出任食放題，每位3500円。睇見嚿咁大嘅肉已經飽咗一半？其實佢總共有7種肉提供，牛肉都有「イチボ」同「ランプ肉」，另外仲有雞腿串、肉腸、漢堡扒、豬肋骨等等，一定滿足到食肉獸嘅慾望。食到最後都有道甜品燒菠蘿清清腸胃嘅。去開東京記住試吓嘞！