《古惑仔》賀年海報點解釘埋一齊?《同擔日月天》又關甘尚武事?

1995-1996期丁酉孖寶版《古惑仔》送賀年海報,我等鍾意儲海報嘅港漫迷原本開心到拍手掌,但點知海報原來係跨頁釘喺書中間,咁撕唔撕佢落嚟好呢?呢鑊考起嘞。挑剔?或者喇,但唔只得我一個有呢個諗法,烏龜喺面書留言曰:「點解張海報釘埋係書到,唔係分開,有得換嗎?」Lau Chi Whai又咁話:「海報釘住嫁?」係喇,牛佬,點解唔分番開佢獨立一張呢?以前不嬲都係咁架。另,海報順便Sell埋倫裕國唱嘅《同擔日月天》,左起亦龍、大飛、伊健、甘尚武、陳浩南、大天二、立花正仁、生蕃同灰狗……唔,係咪覺得有啲問題呢?斷估應該係畫福田八大壯士赴死救南哥一役,但甘尚武屬第二代喎,應該無佢份喎,係咪原本想畫太子,但唔小心畫咗甘尚武呀?定係我意會錯?BTW,真心Mode,呢張海報畫得好靚。

Read more ›