【憤怒鳥】美國Donald Trump影《TIME》封面出事 大鷹摧毀神聖的頭

美國共和黨總統候選人兼富商Donald Trump好有戲劇性,網民最鍾意笑佢個自創遮禿髮型,而佢最近口出狂言建議美國為反恐要「全面禁止穆斯林入境」,即刻被評擊為有希特拉影子嘅種族主義者,網民一面倒鬧爆。最近佢入選雜誌《TIME》嘅「年度風雲人物」八強,仲走咗去影封面相,不過過程就好好笑。當時《TIME》安排佢同隻鷹合照,點知隻鷹太投入,影影吓相居然拍翼整亂Donald Trump個神聖的頭!Donald Trump同旁邊嘅助手都勁緊張,即時狂撥頭髮,之後坐低訪問影相,佢又手多多搞隻鷹,搞到隻鷹還擊又拍翼,嚇到佢花容失色。TIME啱啱將條片放咗上網,睇一次笑一次。而網民嘅留言就絕大多數負皮:「隻鷹都知佢唔適合美國」、「嚟緊佢就嚟要禁埋啲鷹入美國」,BTW,隻鷹叫Uncle Sam,今年27歲,可能自此一炮而紅。

Read more ›