Tag: 《王小龍傳貳》

牛輝《王小龍傳貳》結局後 緊接推出《一代宗師》

牛輝《王小龍傳貳》結局後 緊接推出《一代宗師》

故事已經進入終極群揪打大Boss帝皇階段,《王小龍傳貳》仲有兩期大結局,今期「常公子專欄」透露新書進度:「……經過一番周詳考慮,大家都決定編寫一個全新作品,去試一試市場反應。」即係唔翻畫舊著又唔會推出啲乜傳物傳,有此雄心絕對好事來的,我舉腳贊成。至於新書種類,從書名都估到係打書,常公子話:「好!現在隆重宣佈,牛輝和我的新作品,暫名叫《一代宗師》!」並謂詳細內容會喺下周繼續披露。一代宗師……嗯,關唔關葉問事?希望唔關,我希望睇新嘢呀喂。

Read more ›

倒數中!《王小龍傳貳》第37期完結!

倒數中!《王小龍傳貳》第37期完結!

今期第33期《王小龍傳貳》「常公子專欄」咁寫:「天下無不散之筵席,《王小龍傳貳》將會正式在37期完結大結局,現在距離大結局還有四期時間,牛輝和我會盡力做到最好……」雖然我未曾有過棄書念頭,但得罪講,完咗佢都係一件好事來的,明就明唔明就家明。And,好彩地,常公子還透露:「我和牛輝、鄺生,正籌備一套全新作品之中,估計是12月尾或明年1月推出,有進一步消息在此跟大家分享。」雖然題材未知,係咪甚麼前中後左右傳都未知,但有新書出我舉腳贊成,有公仔書睇我就開心架嘞。希望鄺志德可以撚盡十二成功力,做本好書畀大家睇吓啦。

Read more ›
《王小龍傳貳》好多Bug 連「下期預告」都出錯

《王小龍傳貳》好多Bug 連「下期預告」都出錯

作為一個死忠港漫迷,我甚少投訴,但今期第28期《王小龍傳貳》實在有點不敢恭維。唔知係咪年紀大咗眼水無咁多,硬係覺得成期書都濛查查,線條好唔實淨,分色又偏暗啞,每格畫面都有啲凌亂污穢感。人物面相亦唔掂,有幾格玉兒同王小龍一孖眼珠好似唔係望住同一方向,有一格阿谷次郎直頭畫到高低大細眼添。今期Bug都有唔少,東野庸子同王苦海情侶互動無疑幾有趣,但第7頁尾二嗰格出事,「夠喇,咪痴住晒。」出自王苦海把口無錯,但頭髮分錯色,變成好似東野庸子講緊嘢咁;第9頁旁白寫「……小龍的一席話,教王苦海不禁熱淚盈眶。」但阿王苦海就畫到兩隻眼碌到大一大,一副驚愕表情,眼淚都唔見多滴,何來熱淚盈眶?第27頁都出事,旁白係咁寫:「神秘人右腳一屈一舒,如雷吞吐……」但畫面所見,阿神秘人係用左腳踢王小龍的;最最最最離譜係書末「下期預告」有這麼的兩句──「救世主彌賽亞終極夢想展現,拯救世人同時製造滅世巨」,滅世巨「乜」呢?無句號嘅?唔係嘛,居然寫寫吓斷咗,好明顯係就圖擺位走唔晒啲字,喂呀,內文構圖就話一個不小心容易走漏眼啫,要幾千多億個不小心,先可以令簡單如齋text都可以咁錯法?唉,雖然暫時我仲未有棄書念頭,但說實在,係睇到有啲無奈、氣餒、無癮。

Read more ›
影印道定出錯圖? 《王小龍傳貳》小Bug!

影印道定出錯圖? 《王小龍傳貳》小Bug!

勁忙,搞到今日先有時間睇番上周出版嘅港漫。睇今期第27期《王小龍傳貳》,我發現第28頁有個小Bug,第五格無厘頭畫咗隻手撳住玉兒頭殼頂,既無對白又無旁白,唔知想表達啲乜,再睇落去,發覺構圖明顯截圖自之後嘅第六格,頭依然係玉兒個頭,手始知係王小龍隻手。影印道定係出錯圖?斷估唔會專登畫成咁啩?乜都好喇,呢啲小Bug可免則免,希望製作團隊可以望多兩眼先出街喇。另,有個位真心頂唔順,阿西城聖畢竟係個BB,有乜可能「自行從玉兒的懷抱飄飛開去」?自行喎,即係自己識飛喎,你話佢老竇勇哥隔空取嬰都合理番少少吖,係咪咁講先?

Read more ›
打場交都咁複雜? 《王小龍傳貳》白仇又無厘頭斷臂!

打場交都咁複雜? 《王小龍傳貳》白仇又無厘頭斷臂!

身負N咁多種絕世武功,何解要咁無厘頭斷臂殺敵呢?會唔會多此一舉咗啲呢?今期第24期《王小龍傳貳》睇到我搖晒頭,早兩期先知米利暗預見白仇會爆臂碎劍,初頭仲估係火雲邪神復出搞局,原來唔係,係白仇自爆。過程是咁的──先谷脹右臂,再御劍飛行用天罪自插谷脹嘅右臂,再之後自己擊碎天罪打爆谷脹嘅右臂,谷脹嘅右臂先至爆出其中一條臂骨,而呢條由谷爆嘅右臂爆出嚟嘅尖尖臂骨又好巧妙地插入易天行鼻哥窿直達腦門,如此這般經過N咁多個程序,白仇補多唔知點解有個「仇」字氣勁嘅一掌,易天行嘅一身玄天大氣絕世功破了──噓!寫出嚟都覺得複雜,其實使唔使搞到咁複雜?話晒白仇又御劍飛行又穹蒼寶鑑又九死邪功又乜又七,正正經經打一場咪得囉,編劇們點解係要佢斷臂呢?話時話,白仇究竟斷過幾多次臂?有無人Count得出?

Read more ›
《新著龍虎門》And《王小龍傳貳》 下期加價至$25

《新著龍虎門》And《王小龍傳貳》 下期加價至$25

要來始終要來,據今期第1110期《新著龍虎門》專欄「編後感」同第20期《王小龍傳貳》專欄「主編手記」透露,嚟緊兩書將加價兩大元,即係每本各售$25。加價喎,大家點睇呀?我就無乜點睇,反正都會繼續撐,不過真心Mode希望有關方面可以提高畫面、旁白、人物面相同最重要嘅橋段質素,回饋番我哋呢班仲肯真金白銀買實體書嘅老讀者吧。

Read more ›

《王小龍傳貳》3月31日創刊 四版本任擇

《王小龍傳貳》3月31日創刊 四版本任擇

終於推出正式廣告了,喺今期第1090期《新著龍虎門》書末有個跨版《王小龍傳貳》廣告,創刊日為3月31日,有四個版本,一,原作紫龍版$23;二,特別金龍版$23;三,創刊紀念精裝收藏本$48;四,黑白原稿尺寸版$180。乜版本都好,真心Mode希望呢本書可以做得精彩啲,少啲Bug,千萬不要如《王風雷傳奇》般狂派膠兼犯駁。作為一個無港漫睇會蘿蘿攣嘅死忠,不得不支持,鄺志德,加油呀。

Read more ›
疑似釋出! 《王小龍傳貳》創號刊封面!

疑似釋出! 《王小龍傳貳》創號刊封面!

瀏覽鄺志德面書,見到佢疑似釋出《王小龍傳貳》創號刊封面,無論構圖、氣氛、人體比例、肢體動作都係上佳質素,連條龍擺位都好講究,書名字體亦有型有款,係有啲睇唔慣王小龍著功鞋啫。於我,呢個封面絕對收貨,畀心機呀,加油。

Read more ›
網圖分享:《王小龍傳貳》廣告二創 王小龍+玉兒九頭身

網圖分享:《王小龍傳貳》廣告二創 王小龍+玉兒九頭身

自《王小龍傳貳》廣告推出後,坊間迴響甚大,最多人討論者莫過於新廣告好有《賭神》Feel。面書朋友仔雷永順都來玩二創,先來一幅Key圖重現《賭俠》一幕,再來揶揄王小龍同玉兒畫到九頭身,由上至下Key頭頭頭頭頭頭頭頭頭,真係足九個頭喎,同《足球小將》有得Fight呀喂,確實人體比例又係誇張地修長咗嘅,我笑咗。

Read more ›
《王小龍傳貳》出廣告 王小龍賭神上身玉兒大露背

《王小龍傳貳》出廣告 王小龍賭神上身玉兒大露背

《王小龍傳貳》喺今期第1088期《新著龍虎門》正式出廣告了,唔錯吖,畀我感覺幾新鮮,鮮見王小龍一身高貴禮服出場,玉兒仲要高衩低胸大露背添,加埋啲籌碼同四條煙做襯托,非常有《賭神》Feel,切合到新書主題「贖罪籌碼,仇恨底牌」,希望到時搞得好好睇睇喇。另,今期嗰幾格Q版石黑龍,我係有少少睇到笑的,Fine喇,切合到佢樂天活潑性格,不過偶一為之好了,期期都Q版大頭盞睇到悶。仲有想講嘅係,今期交代偽真弓遊說石黑龍撐甲賀,呢Part無問題,但諗唔明嘅係,真弓明明都死咗咯,點解唔考慮出過另一個新角色呢?係要搞到疑似死人翻生咁為乜?成個甲賀派咁多人,求其安排另一個女忍者出場唔得咩?

Read more ›
Rodman靚圖為《王風雷傳奇》作結 《王小龍傳貳》不日推出

Rodman靚圖為《王風雷傳奇》作結 《王小龍傳貳》不日推出

12期了,足足12期,每次睇完《王風雷傳奇》,我都會問自己:「究竟我睇咗啲乜?」好了,家陣完結了,冚埋本書,扯啖煙,我長長吁出一口氣,呼出來的煙霧終於冒出了輕鬆。穿越來穿越去,最後竟然係返去1945年二次大戰掟三神器,用原子彈消滅八岐大蛇,搞來搞去嘅結論係:「就且讓這一趟穿越,如鏡花水月,不去干擾大家心裡,龍虎門的歷史吧。」唉,Nothing to say,果真鏡花水月,去到結局我都仲係無一期睇得明嘅,唯一能夠逗我一笑嘅係專欄「講漫兄弟幫」有幅〈奔走未來的風雷〉,出自經常帶畀網民無窮歡樂嘅面書朋友仔Rodman之手,佢畫風之獨特自成一派,每次睇到佢嘅作品,我都好開心。點都好喇,鄺志德、袁家寶加鍾英偉之後會推出嘅《新著龍虎門》外傳之《王小龍傳貳》,我係會繼續捧場嘅,希望到時會有一本正正常常嘅公仔書睇吓喇,係,無錯,唔使搞咁多花臣,真係正正常常得架喇。

Read more ›