Post Tagged with: "《火武耀揚》"

邱瑞新再送Wallpaper 葉知秋+雷耀揚登場
by / on 01/07/2020 at 6:45 pm

邱瑞新再送Wallpaper 葉知秋+雷耀揚登場

邱瑞新再來「失驚無神送贈你」啦,今次打孖送葉知秋同雷耀揚Wallpaper。兩個角色我都好Like,邊個唔想好似隻揪王咁好打?不過有得揀的話,我寧願做耀揚,不但個腦唔會裝屎,仲可以有兩個靚靚老婆,享齊人之福,諗吓都爽呀呵?忽發奇想,下次不如試吓送女角Wallpaper?海潮、彤彤同小雨都好正啫。

Read more ›

劉華變身火武大頭 瑞新爆最愛《火武耀揚》封面
by / on 12/05/2020 at 8:45 pm

劉華變身火武大頭 瑞新爆最愛《火武耀揚》封面

Goodest呀,同讀者多啲互動,咁先係路吖嘛。邱瑞新喺面書專頁分享佢最最最喜歡嘅《火武耀揚》封面,構圖簡單,只得一個火武大頭。瑞新評為「眼神流露住一種輕佻不羈,咀角藏有一份莫名傲氣,絕對係神來之筆」,咁講真呢個封面又係幾討好嘅,畫到劉華朕古惑仔味出晒嚟。瑞新話歡迎大家儲存嚟做電話屏慕背景圖喎,我已經Save低咗,你呢?

Read more ›
加瑞新做朋友仔 面書專頁「火武耀揚。邱瑞新」登場
by / on 06/05/2020 at 1:45 pm

加瑞新做朋友仔 面書專頁「火武耀揚。邱瑞新」登場

係喇,好喇,有平台同讀者互動先係正路嘛。遲到好過無到,邱瑞新終於開面書專頁「火武耀揚。邱瑞新」,為慶祝其事,仲特備1000期紀念號封面Wallpaper供免費下載,期間限定至5月8日,大家快啲Add佢做個朋友仔喇。

Read more ›
想吸納埋《古惑仔》讀者?瑞新回心轉意唔完結《火武耀揚》
by / on 23/01/2020 at 8:45 pm

想吸納埋《古惑仔》讀者?瑞新回心轉意唔完結《火武耀揚》

今期第1057加1058期合併號《火武耀揚》,封面右上角有大大隻字寫住六個大字──「重大消息公布」,消息確實重大,事關瑞新回心轉意,宣佈取消完結《火武耀揚》。佢喺週記咁話:「想不到寓意深遠的覺醒一戰竟然第一個覺醒了作者瑞新,瑞新將會更努力編寫一個個好故事,回饋愛戴敝刊的你!然後用實際行動回饋所有真‧香港人。」覺醒覺醒,究竟瑞新覺醒啲乜呢?我咁估:係咪因為知道《古惑仔》就快完結,所以有所覺醒,諗住繼續寫《火武耀揚》可以吸納埋《古惑仔》讀者?Anyway,總算每個禮拜保住多一本港漫睇,對於我呢個死忠港迷漫嚟講,係極極極極極開心嘅。瑞新!支持你呀!

Read more ›
「柒婆」突入《火武耀揚》 被割喉死不瞑目
by / on 05/12/2019 at 9:00 am

「柒婆」突入《火武耀揚》 被割喉死不瞑目

多謝邱瑞新,今期第1050期《火武耀揚》堪稱大快人心呀。話說劇情講到自石基慘死,長樂老頂文虎鐵了心挑戰華興元朗揸Fit人虎兒,爭取各鄉紳村長歸邊,人稱「柒婆」、性格寸寸貢牆頭草兩邊擺嘅嘅七姐成了爭奪對象。期間,暴風戰南京仔,暫時平手,各有損傷;小雨戰西人仔,各自拉住七姐一條手臂刀來拳往,亦係平手,但無損傷,因為unfortunately,混亂間一個唔小心,七姐俾小雨把一刀界喉,流到一頸血,成個頭幾乎界甩咁滯,死唔眼閉。呢個七姐面相似邊個?人物原型係邊個?我知邊個,我都知你知道係邊個,咁死法,有無人覺得便宜咗佢?

Read more ›
邱瑞新《火武耀揚》緊貼時事 石基變身火之魔法師
by / on 08/11/2019 at 9:29 pm

邱瑞新《火武耀揚》緊貼時事 石基變身火之魔法師

邱瑞新係好緊貼時事嘅,今期第1046期《火武耀揚》講石基俾洪興仔圍,一勇無懼誓保大佬圍頭佬地盤,喺貨Van掟出老早預備好嘅汽油彈,之後再瘋狂追殺對家。旁白說明直頭咁寫:「石基準繩命中不同位置,四散火頭唬得對方亡命逃奔,潰不成潰!石基如同香港傳說中出現的──火之魔法師!」古惑仔打交都識變身火之魔法師,間接向不屈不撓嘅抗爭者致敬,好嘢!

Read more ›

聽《火武耀揚》虎兒話 記得Fact Check咪信Fake News
by / on 10/10/2019 at 3:36 pm

聽《火武耀揚》虎兒話 記得Fact Check咪信Fake News

今期第1042期《火武耀揚》繼續密格,非常抵睇,亦繼續加入大量搞笑元素,長樂孖仔同文虎、失憶崩牙豹兩條線,啲對白笑到我Gap Gap聲。邱瑞新好貼地,書中虎兒寸串燒店老闆一幕,出現咗以下甚有教育意味嘅對白──「我Fact Check咗,唔係Fake News;Fake News即係假新聞,Fact Check就係驗證咗!」咁記住聽虎兒哥話,咪柒撚到上月球,因為家陣啲新聞有真有假有刪剪有帶風向,大家記得善用腦袋,先Fact Check再分析,慎防誤信Fake News呀。另,虎兒寸西人仔句對白又係正──「十足建制派議員啲九噏!」哈哈,諗深一層,其實建制派何只九噏,直頭無恥喇,所以咪無敵囉。

Read more ›
Happy伯突入《火武耀揚》 文虎廢老扮潮童
by / on 07/10/2019 at 4:08 pm

Happy伯突入《火武耀揚》 文虎廢老扮潮童

嗱,真心話,《火武耀揚》封面人物五官面相成日變,資深讀者如我有時都唔知邊個打邊個,今期第1041期個封面,如果唔係寫住「長樂文虎」,我真係唔知邱瑞新畫緊邊個。因乜畫到呢個老人家咁鬼潮?睇封面已經呱呱叫,睇埋內頁仲有幾啖笑,管家駝昌怒小文虎怯懦嗰幾格,對白異常啜核──「越講越火滾,你衰過老人院啲孤獨精!」、「你最仆街就係仲睇緊CCTVB!簡直罪撚大!惡撚極啦!X你!」──哈哈,CCTVB躺著也中槍,靚抽!精采到我拍手掌。故事繼續,翌日文虎廢老扮潮童相約屯門Peter仔一段,Peter仔一角擺明影射緊無限量派錢畀娜娜嘅Happy伯,仲畫埋佢如何表演絕招黃狗射尿添,文虎話:「YoYo!我都要學街舞!」呢句對白又係低能無極限。As a conclusion,呢期係睇得我開心嘅,而圍頭佬頭馬石基呢個角色,初頭我以為係兩三頁就收皮嘅二打六,搞搞吓家陣俾瑞新煲起咗,亦屬始料不及也。

Read more ›
睇《火武耀揚》有感 希望香港多幾個良心火武
by / on 19/09/2019 at 10:45 pm

睇《火武耀揚》有感 希望香港多幾個良心火武

今期第1039期《火武耀揚》好密格好抵睇,閱畢,若有所感。點解家陣香港咁撕裂?點解局面亂過亂世佳人?好大程度上係因為有啲人無咗一樣嘢──良心!今期講虎兒使橫手終於做到元朗揸Fit人,華興各大佬輩唔聽黑骨棠支笛,唔出席佢寶貝仔紮職大典以示抗議,火武更加同蝙蝠講:「我永遠企喺良心嗰邊!」說得擲地有聲,字字鏗鏘。佢仲話:「記住大佬呢句老實話!好多人個良心──一早俾狗擔撚咗喇!」回望番現實世界,你覺得邊啲人個良心已經俾狗擔走咗?有眼睇,係好好好好多人,尤其最大最乞人憎嗰個,如果香港多幾個火武就好咯。

Read more ›
《火武耀揚》加價至$23 邱瑞新講明100期內大結局
by / on 09/04/2019 at 8:52 pm

《火武耀揚》加價至$23 邱瑞新講明100期內大結局

曾經因《火武耀揚》1000期訪問過邱瑞新嘅面書專頁「卡卡多工作室」剛剛爆料,嚟緊《火武耀揚》會同《古惑仔》睇齊,加價至每本$23。加價唔係重點,講真三兩蚊有乜所謂吖,重點係瑞新決定會喺100期內End《火武耀揚》。嗚呼!100期,即係大約兩年後就大結局。慘了!兩年後又少一本公仔書睇,希望佢會開新書喇。

Read more ›
虎兒唔識雷公+海潮事件 瑞新認錯有擔當
by / on 21/02/2019 at 10:30 am

虎兒唔識雷公+海潮事件 瑞新認錯有擔當

就前期《火武耀揚》講到虎兒初遇雷公,上期講虎兒唔識海潮兼寸海潮係老竇黑骨棠隻私家雞,好多讀者都大呼有無搞錯。事實上三人一早相識,有讀者甚至摷舊書開Post兼Cap埋圖,力證瑞新記錯云云。為此,瑞新喺今期第1009期《火武耀揚》出道歉啟示Say sorry,自認粗疏引致故事出錯。都好嘅,錯就要認打就企定,肯認錯總算有擔當,好過乜都唔做,當無事發生。另,講番劇情,今期崩牙豹翻生,我覺得有啲牽強,牽強位唔喺臭口柱放生崩牙豹條橋,牽強在無理由虎兒會單單因為「人有相似」而將佢收歸旗下,莫非有天大陰謀?希望呢條疑似「崩牙豹殺雷公」橋可以行得靚啲喇。

Read more ›

網圖分享:甘小文賜畫賀《火武耀揚》1000期
by / on 18/12/2018 at 9:00 pm

網圖分享:甘小文賜畫賀《火武耀揚》1000期

記住,聽日《火武耀揚》豪華珍藏本第二輯與薄裝第1000期《火武耀揚》同步出版,大家記得捧邱瑞新場。又原來,甘小文都係火武同耀揚兩兄弟Fans,作畫一幅畀「至Goal Club」賀一賀呢個里程碑。小文即係小文,畫慣Q版即係畫慣Q版,依舊唔畫鼻哥,但依舊知道佢畫緊邊個,呢份功力旁人難及,係不得不服嘅。

Read more ›
第二輯《火武耀揚》豪華珍藏本 至Goal Club開訂送親筆簽名
by / on 13/12/2018 at 7:28 pm

第二輯《火武耀揚》豪華珍藏本 至Goal Club開訂送親筆簽名

邱瑞新喺今期第999期《火武耀揚》專欄,登咗第二輯《火武耀揚》豪華珍藏本嘅首期封面相,依舊係男一火武掛帥,背托大大個「忠」字,係型嘅。提提你,此書一套九期完,每本$48,鐵定12月19日出版,家陣去「至Goal Club」落訂,可以有埋瑞新親筆簽名,係咪爽皮先?

Read more ›
賀《火武耀揚》1000期 瑞新出第二輯豪華珍藏本
by / on 06/12/2018 at 8:16 pm

賀《火武耀揚》1000期 瑞新出第二輯豪華珍藏本

過多兩週,《火武耀揚》就會昂然進入1000期,為慶祝呢個里程啤,邱瑞新決定出第二輯豪華珍藏本,講到明係終極一輯,唔會有第三輯。輯錄範圍方面,會講彤彤俾臍環色魔禁錮搞到變植物人嗰段,話時話,火武個仔紅日到家陣都仲未正式出場,究竟去咗邊?Anyway,我仲記得彤彤跪低食臍環食魔腳趾公上面啖飯嗰一格,呢段故事係幾緊張刺激嘅。另,今期故事都唔錯,文虎好低B,佢句對白:「打機可以活化機能,以前我三個月叫一次雞,打咗機──十二個星期先叫一次呀!(其實一樣)」真係睇到我笑咗。再另,虎兒正式回歸,呢個角色已經Miss咗唔知幾多百期,可以出番場,希望可以做齣好戲喇。

Read more ›
《火武耀揚》長樂孖仔對話有共鳴 做香港人真係好辛苦呀
by / on 08/11/2018 at 10:00 am

《火武耀揚》長樂孖仔對話有共鳴 做香港人真係好辛苦呀

今期第994期《火武耀揚》好密格足料,相信好多邱瑞新死忠讀者都同我一樣,覺得襟睇之餘亦睇到笑中有淚。笑者,長樂社孖仔出場,西人仔一貫九唔搭八作風激到火武紮紮跳,句句對白都好低B,喺地鐵我真係睇到架架聲笑咗出嚟。悲者,來自南京仔一大堆負面說話,好惹香港人共鳴──「兄弟……呢個年代邊有人同你講兄弟。」、「男人響香港地冇樓?同賤人廢柴冇分別;返工得雞碎咁多,仲要日日受氣,帶埋老母返工都唔掂。」、「女人要靚係唯一生存意義,買化妝品,買靚衫,狂做尖……嘥晒啲錢仲要人X港女。」結論呢,瑞新透過路人甲對白講咗出嚟:「哇!做香港人真係好辛苦呀!」雖殘酷,但確係事實。而最最最最最可悲係呢句──「真你鹵味!香港立撚咗例,唔俾講真話,講真話會俾人拉架。」簡直突破越位陷阱,一語中的,悲乎,刻下香港,敢講真話嘅仲有幾人?

Read more ›