fbpx

Tag: 《新著龍虎門》

玉皇朝《春秋猛士》率先跑出 三月正式出版

玉皇朝《春秋猛士》率先跑出 三月正式出版

大抵已經試啱水溫,之前玉皇朝推出每本$10嘅《春秋猛士》、《靈‧狐‧劍》同《乾坤奇俠》,最後由《春秋猛士》率先跑出,喺今期第320期《春秋戰雄》同第823期《新著龍虎門》,《春秋猛士》正式出咗廣告,可以獨立成書,決定三月出版。至於係出普通$17單行本,定好似《皇者之路》咁推出類似$20潮華本,咁就暫時未有定案。Good吖,家陣報攤實在太少公仔書喇,有多一本新公仔書睇始終係好事,加上估計故事同即將完結嘅《春秋戰雄》有一定關係,話唔定係甚麼外傳前傳,有個底,相信讀者唔難受落。

Read more ›

《新著龍虎門》聯乘XM Studios 火雲邪神Figure未知價

《新著龍虎門》聯乘XM Studios 火雲邪神Figure未知價

同樣係《新著龍虎門》聯乘XM Studios出品,比上次介紹嗰個天下無敵老祖宗Figure要成$6090埋單,今次呢個火雲邪神Figure斷估都會平啲嘞掛,官方未定價,大家想買的話,可以先畀$1500落訂。純個人感覺,不喜勿插,火雲邪神無老祖宗咁型棍,肢體動作齋戙企,唔夠威勢,同埋,最重要係面相,個面具唔多似面具,太似真人五官,好似喺真人面頰加兩隻獠牙同對角咁,唔夠漫畫Feel囉,不過都屬高水準之作,如果唔太貴,都值得買嚟儲吓嘅。

Read more ›
《新著龍虎門》聯乘XM Studios 老祖宗Figure盛惠$6090

《新著龍虎門》聯乘XM Studios 老祖宗Figure盛惠$6090

《新著龍虎門》聯乘「XM Studios」出品,有呢個型到爆核嘅天下無敵老祖宗Figure,齋望相已經覺得好有霸氣,肢體動作好有飛仙Feel,又似祭起萬毒心經出緊萬毒劍芒,唔,好正,真係好正,不過價錢仲正,盛惠$6090……嗯,大拿拿拎六差嘢買隻Figure,嗯……家下我仲十五十六緊,嗯……就快過年,姑且睇吓逗到幾多利是錢再算,不過睇個勢我都係忍唔住落住$1500訂先架喇。

Read more ›
再推空氣淨化器,剩餘物資賀《新著龍虎門》800期?

再推空氣淨化器,剩餘物資賀《新著龍虎門》800期?

都要利申多次,我都係《新著龍虎門》死忠Fans嚟嘅,但呢次有少少睇唔過眼。仲記唔記得喺剛剛過去嘅動漫節,玉皇朝推出咗部空氣淨化器?睇個勢,賣唔晒喎!如果唔係,點會搞壇《新著龍虎門》超限定紀念珍藏版,隨刊附奉「新著龍虎門800期紀念精巧空氣淨化器」?仲要分「俠氣型」同「義氣型」任君選擇,各售$220。剩餘物資重新包裝再推出?我唔想咁諗……不過望過宣傳廣告,個包裝都尚算型仔嘅,至於值唔值,就真係見仁見智嘞。

Read more ›
大手筆 玉皇朝送盈量級簽名板

大手筆 玉皇朝送盈量級簽名板

黃玉郎呢次都算大手筆,旗下《春秋戰雄》、《新著龍虎門》、同《神掌》同《東方真龍》加價至$17,為答謝繼續支持,前三本漫畫會連續四期送盈量級簽名板,今個禮拜出咗第一彈,三張簽名板都好正斗,背面仲印埋2016年月曆,值得收藏。而《東方真龍》呢,就係咁意送番張拉頁海報,王小虎出招游龍戲水,都畫得幾有氣勢吓,收貨!

Read more ›
玉皇朝旗下漫畫 下期加價至$17

玉皇朝旗下漫畫 下期加價至$17

好嘞,玉皇朝終於同全世界睇齊嘞,黃玉郎喺今期第796期《新著龍虎門》專欄「玉郎周記x玉郎Mail」公告天下,旗下《春秋戰雄》、《新著龍虎門》、《神掌》同《東方真龍》將於下期開始一律加價至$17。加兩蚊,改凍飲都唔止,我諗港漫迷唔會肉赤,咁阿黃生都好識做,話會送番幅盈量級簽名板畀讀者,物輕情意重嗰隻喇,至於點送法,詳情會喺下期公佈。對於呢個消息,樓下相熟報攤老闆娘舉腳贊成:「全部公仔書賣$17咪好囉,本本唔同價錢,記都記死我呀。」哈哈。

Read more ›

玉皇朝《神掌》 7月24日創刊

玉皇朝《神掌》 7月24日創刊

《春秋戰雄》,唉,又神又魔又妖又怪,睇到我根本分唔清邊個打邊個;《東方真龍》,唉唉唉畀足三個唉添,又強者又虛無又死而復生,唔知仲以為睇緊《龍珠》,依家剩係得番《新著龍虎門》尚叫做有啲睇頭。之所以我對7月24日創刊嘅《神掌》好有期望,為宣傳,玉皇朝特登喺《新著龍虎門》刊登幾頁《神掌》創刊號內文畀讀者睇辦,第一個感覺係──唔,OK!尚算對辦!畫功絕對見得人,黃玉郎仲話喺畫面構圖方面會落足十二成功力,有實牙實齒嘅招式對拆,唔會一味畫到成格又罡氣又光刀又氣勁就當出招咁話喎。真心Mode,非常拭目以待,唔好令我失望呀。

Read more ›
T.Dult x《龍虎門》夜光頭像Tee 書展發售

T.Dult x《龍虎門》夜光頭像Tee 書展發售

芸芸精品中,Tee係最令人十五十六唔知唔科水好嘅,明明衫一件,但又無理由著出街咁型架;放喺屋企咩,掛起佢驚佢封塵,擺入飾櫃有好難Show off。不過都唔理得咁多,鬼叫自己鍾意玉皇朝同T.Dult聯乘嘅《新著龍虎門》十五周年紀念T恤系列,Tee純黑色,心口有王小虎或心雲邪神頭像Logo,頭像有夜光效果,望落整體設計唔曳,硬盒包裝,各售$280,7月24日起動漫節玉皇朝出版社攤位發售。呢兩舊幾水,我就無得慳嘞,你又點睇?

Read more ›
至愛Nike眉 《新著龍虎門》15周年紀念人偶系列

至愛Nike眉 《新著龍虎門》15周年紀念人偶系列

動漫節就快到,玉皇朝一如以往推出大量精品,芸芸Item中,暫時最鍾意同本地玩具品牌「童夢工房」聯乘嘅《新著龍虎門》15周年紀念人偶系列,分別有著星星大紅背心嘅王小虎、著閃電暗藍背心嘅王小龍、著蠍子青綠背心嘅石黑龍,各8吋高,頭手腰關節可郁動,各附專屬武器,各售$399。搭多個火雲邪神一次過買,即成龍虎三皇決戰火雲邪神Package,內附永久珍藏限量紀念證書,售$1596。鍾意佢哋啲乜?鍾意佢哋對大眼睛同Nike眉囉,咁先有元祖味夠懷舊吖嘛。

Read more ›
ACG TOYS x《新著龍虎門》出王小虎人偶

ACG TOYS x《新著龍虎門》出王小虎人偶

好靚呀,真係好想擁有,齋睇相,都不難想像如果將呢個王小虎人偶放入飾櫃,再用射燈射住,到時真係要幾型有幾型,$1380,唔敢話勁抵,但絕對值得入貨。

Read more ›
有今生無來世 2014期《新著龍虎門》出特別版

有今生無來世 2014期《新著龍虎門》出特別版

為出特別版,可以去到幾盡?答案係可以去到好盡好盡,期數上百成千屬里程碑,出特別版慶祝理所當然,2014年出到第2014期都出特別版,係黃玉郎先諗得出,但叻在又講得通喎。

Read more ›

《新著龍虎門》超級紀念套裝 買一得八限量200套

《新著龍虎門》超級紀念套裝 買一得八限量200套

你買咗《新著龍虎門》2000期邊個版本呀?黃玉郎果然係食腦之人,再同收藏家港漫專區聯乘,推出限量200套嘅甚麼「龍迷圓滿收藏紀念套裝」,誓要榨唔乾你荷包咁話。

Read more ›
《新著龍虎門》2000期 出五個特別版

《新著龍虎門》2000期 出五個特別版

《新著龍虎門》唔覺唔覺去到2000期,又締造一個港漫里程碑,確實值得紀念。大好藉口,黃玉郎梗唔會放過賺錢機會,2000期會一口氣推出五個特別版,大家又會唔會買齊晒?

Read more ›
新春孖寶號《新著龍虎門》出特別版 送利是封食水深

新春孖寶號《新著龍虎門》出特別版 送利是封食水深

港漫傳統,農曆年例出新春孖寶號,兩期夾埋一期出,而又唔知幾時開始,新春孖寶號都推出特別版,好屈讀者利是錢,今年《新著龍虎門》都唔例外,特別版照出,仲食水好深添。

Read more ›
《石黑龍傳III》x《新著龍虎門》封面合併

《石黑龍傳III》x《新著龍虎門》封面合併

無獨有偶,玉皇朝呢期都學人玩封面合併號,玩得仲招積過人,由兩本唔同漫畫嘅兩個封面合併而成,一睇畫風大概都估到出自邱福龍手筆,一句講晒型到爆核。

Read more ›