fbpx

Tag: 《新著龍虎門》

網圖分享:阿傑多作畫致敬

網圖分享:阿傑多作畫致敬

黃玉郎因版權問題未能再主編《新著龍虎門》,唔少港漫迷Including me都好欷歔,同歎一個時代的終結云云。為此,阿傑多作畫兩幅致敬,其實佢講得啱,時間永遠向前走,舊嘅唔去新嘅唔嚟,相信佢都同我同一諗法,真心希望《龍虎5世3世仇》可以大賣。

Read more ›

有傳《新著龍虎門》摺書 黃玉郎將推出《龍虎3世》

有傳《新著龍虎門》摺書 黃玉郎將推出《龍虎3世》

今期第1044期《新著龍虎門》內文無甚驚喜,驚喜處在書末廣告,玉皇朝將出新書《龍虎3世》。有新書出,好事吖。驚喜完,我開始擔心,因為坊間有傳黃玉郎買唔番版權,摺埋《新著龍虎門》之說甚囂塵土,再睇埋「玉郎周記」咁寫:「……以前曾創作了好多款《龍虎門外傳》,將主要經典角色都發揮得甚為淋漓盡致,暫時沒有再可發揮的了……靈機一觸《龍虎5世》當中的《第3世》,是現在這個時空,正是最好發揮的時候……」唔係打算用《龍虎3世》延續《新著龍虎門》故事嘛,無鋪排點短期內完結《新著龍虎門》呀?又來多一次白光算數?拜託真係唔好咁。雖然我有時都會柴台,但我真係唔捨得龍虎群英呀,《古惑仔》已經收檔,再少多一本公仔書睇的話,人都癲!

Read more ›
網圖分享:Yeak Looi的《新著龍虎門》角色

網圖分享:Yeak Looi的《新著龍虎門》角色

唔使審,Yeak Looi肯肯定係《新著龍虎門》死忠Fans,其無相神功已臻化境,畫乜似乜。喺2019年底,佢一口氣畫咗龍虎三皇、王風雷同韋陀5個角色,幅幅都好有神髓。我最鍾意韋陀嗰幅,肢體動作流暢、衫花畫得好仔細,雖然係黑白鉛筆畫,但氣勢依然,如果表情可以畫得再兇狠啲,會更加正。

Read more ›
《新著龍虎門》下期加價至$23

《新著龍虎門》下期加價至$23

比想像中遲了,黃玉郎終於出手喇,喺今期第1022期《新著龍虎門》專欄「玉郎週記」透露,下期開始將會調整售價至$23,即係加$3。佢就當然大呼過癮喇,估計有唔少讀者都會大呼不值,而我呢,作為死忠,侷撐,我選擇繼續撐。

Read more ›
《新著龍虎門》出完全珍藏本 你撐唔撐?

《新著龍虎門》出完全珍藏本 你撐唔撐?

唔好拗,亦唔使拗,舊著《龍虎門》一定好睇過《新著龍虎門》,而初期嘅《新著龍虎門》亦一定好睇過近呢兩三百期嘅《新著龍虎門》。喺今期第1013期《新著龍虎門》「玉郎周記」裡面,黃玉郎透露打算推出《新著龍虎門》完全珍藏本,寫明「內容上會分為多輯推出,第一輯主題是《邪拳魔王》,故事截至新龍平裝本五十一期作一段落,故事續上第二輯,如此類推,做到每一輯完全珍藏本也有完整的結尾」,老實,大家會唔會撐?我呢……話我盲撐都好喇,如果唔太貴的話,我係會買嘅。

Read more ›
賀《新著龍虎門》1000期 因乜解究起狗牙?

賀《新著龍虎門》1000期 因乜解究起狗牙?

作為港漫死忠,對《新著龍虎門》實在又愛又恨,點講好呢,嗯……邊搖頭嘆息但又每期準時畀錢買書咁囉。Anyway,《新著龍虎門》1000期始終係個里程碑,點都值得慶賀嘅,希望之後可以提高質素,再創高峰。睇完今期,我係唔知好嬲定好笑嘅,打咗成百期嘅四大教主之戰,居然以「一個月後」形式收場,到底白蓮聖上同火雲邪神邊個贏?懶係有伏線吊讀者癮咁,如果之後又求求其其不清不楚,我諗又會俾廣大讀者圍插。講到插,第1000期第31頁都好唔妥,Full page一格過,公仔線條起晒狗牙,效果好似影咗張唔夠像素嘅相但又夾硬要拉大嚟刊登咁,斷估唔會特登啩?又斷估我無眼疾啩?定係我買嗰本係錯版?

Read more ›

《新著龍虎門》聖上出招「霹靂啪嘞」? 四大教主之戰幾時完?

《新著龍虎門》聖上出招「霹靂啪嘞」? 四大教主之戰幾時完?

忙到HiHi,搞到今日先有時間睇第993期《新著龍虎門》。睇書心情好跌宕,過程大致可分為四個階段,一,沉悶,繼續打打打打,勇哥繼續打極唔死,場交繼續打極唔完,聖上加鐵五郎加南傑加東奇勾心鬥角,勉強都叫做講得通喇,係劇情拖到有啲恰眼瞓啫;二,搞笑,睇到第五頁,聖上一連打出九個火球,係威係勢,以為又出九陽大霹靂喇,點知唔係,係「霹靂啪嘞」,斷估呢四粒字應該係等同平時「轟隆」、「砰」、「啪」之類嘅擬聲字,但用錯字款兼擺錯位,搞到好似招式名咁,笑咗;三,驚喜加安慰,埋尾喺地窿捐咗個忍者出嚟,救走勇哥兼自爆拒敵,我心底裡暗呼一聲:「好嘢!四大教主之戰應該完咯!」勇哥不死,俾人救走,收科,Good吖;四,失望,睇埋書末下期預告,寫住:「邪神命不該絕,最後關頭有人出手相護,而這個人……竟然是石黑龍」,頂,無端端又關石黑龍事,即係又要打番十期八期先可以離開呢個甚麼幽靈島?唔好咯啩?

Read more ›
《新著龍虎門》鐵五郎識龜波氣功? 因乜解究出波動雷拳?

《新著龍虎門》鐵五郎識龜波氣功? 因乜解究出波動雷拳?

搞乜?啲招式名真係咁難諗咩?堂堂通天教教主連波動拳都要出埋?今期第980期《新著龍虎門》,劇情繼續交代石黑龍同鐵五郎一戰,先唔講明明二揪一可以大增勝算,但石黑龍死都唔畀王小虎幫拖,仲單挑?家陣殺父大仇呀,切磋武藝咩。Anyway,隻揪就隻揪喇,咁石黑龍就繼續用第十一關金鐘罩應戰喇,好合理;但鐵五郎呢,噓,居然出一招──波動雷拳!懶諗招式對拆,算,但一嘢轟埋去都唔該改個靚仔啲嘅招式名吖。唔知仲以為鐵五郎練嘅係龜波氣功,甚麼神道經‧軒轅勁,不如掟埋一邊喇。

Read more ›
書畫雙絕陳笑洛畫Tee 重現獨眼龍之死

書畫雙絕陳笑洛畫Tee 重現獨眼龍之死

喺《新著龍虎門》裡面,四小將之一獨眼龍仲生勾勾,又鐵沙掌又打狗棒法,都算升Grade做咗一線尾高手,咁大家仲記唔記得喺舊著《龍虎門》裡面佢點死?無錯,就係俾超級大奸狗陳傲雲分肩爪加銘心爪所殺,茅山肚兜一破,獨眼龍魂歸天國,想當年睇到我好激動。點解無端端講起佢,事關書畫雙絕嘅陳笑洛兄,剛剛畫咗件港漫Tee,畫嘅正正係獨眼龍臨死一幕,畫得好似,好靚,好傳神,一睇就回憶返晒嚟,抵畀Like。

Read more ›
《新著龍虎門》驚讀者無記性? 飛妖叛咗九百幾期教先識驚?

《新著龍虎門》驚讀者無記性? 飛妖叛咗九百幾期教先識驚?

今期第975期《新著龍虎門》,我係有少少睇到火滾嘅。火滾之處有二,一,第四頁半至六頁半內容全屬「上期回顧」性質,譜過啲新旁白說明,將上期劇情重新演繹一次,使唔使呀?其實上期已經有類似情況出現,當讀者咁無記性乎?二,龍虎群英無端端參與四大教主之戰,本身已經唔多合理,OK,Fine,就當石黑龍急於報父仇搵鐵五郎算帳,拖累埋王小虎、天嬌同飛妖參戰,叫做勉強講得通,但飛妖都唔使搏晒老命保住火雲邪神條命仔嘛,依家陣局勢發展,我完全睇唔出有何「唇亡齒寒」嘅道理在,唔夠打最多咪閃囉;仲有,飛妖唔係晨早改邪歸正嘅咩?救完邪神之後又做乜笠晒水跪低成隻狗咁?叛教都已經叛咗九百幾期喇,到依家先識驚?邪神執行家法嗰陣仲唔敢還拖,堂堂羅剎雙妖之一,又玄冰掌又好輕功,使唔使驚到打冷震?諗極唔明係乜玩法。

Read more ›
《新著龍虎門》刀君臨似聖鬥士 凶心菩薩奇妙的右腳

《新著龍虎門》刀君臨似聖鬥士 凶心菩薩奇妙的右腳

今期第963期《新著龍虎門》四大教主之戰終於開打,臨兵鬥者皆陣列在前,各自Show吓強勁班底都好合理,又可以乘機出吓新角色,方便之後多幾場交打。But,造型方面呢就……騎呢咗啲囉,通天教兵部元帥刀君臨,個名講真係幾型,但一身盔甲著到成個聖鬥士咁,好唔知想點;仲有嗰個甚麼蚩尤心腹凶心菩薩,面相求其都算,至弊連肢體比例都畫到古古怪怪,第三頁第二格,明顯右腳同腰係唔銜接嘅,真係想學吳若希話齋:「點解嘅?點解嘅?」

Read more ›

《新著龍虎門》西狂死得無厘頭 四大教主之戰開打

《新著龍虎門》西狂死得無厘頭 四大教主之戰開打

睇完第961期《新著龍虎門》,唔知有無C-Hing同我一樣,覺得西狂裘百川死得好無厘頭?無厘頭之處有三,一,血影神功講到幾勁幾勁,點知連石黑龍嘅金鐘罩都打唔贏,初頭仲估佢至少同獵神者極樂魔僧、金神魔君同Grade,點知十期唔夠玩完,著實嘍囉咗啲;二,唔明南傑歐陽世傑為乜要趕盡殺絕,話晒之前都同一陣線打過天下無敵,墮四大奇隱威名好小事啫,斷估不至深仇大恨到要置西狂於死地啩?三,西狂仲戇居,東奇祈萬里明明話咗保持中立,兩不相幫,點解係都要將血煞三悔第三悔「玉石俱焚」打向東奇,而唔係打向南傑?咁同撩鬼攞命無乜分別。Anyway,下期四大教主之戰正式開皮,希望可以做番場好戲啦。

Read more ›
T-dult《風雲》Tee別注色 聶風握冰藍色雪飲刀

T-dult《風雲》Tee別注色 聶風握冰藍色雪飲刀

留意番,9月26日即係今晚十點,T-dult推出嘅《風雲》、《今晚打喪屍》同《新著龍虎門》Tee會上架。《今晚打喪屍》同《新著龍虎門》Tee係舊款,家陣優惠價發售;至於聶風Print嗰件,就算係新嘅,事關係Based on之前風雲結局畫展推出嘅同一款,不過今次就將雪飲刀換上冰藍色,都OK型,值得入手。

Read more ›
《新著龍虎門》不思議事件 銘心爪變爆脊+白朗翻版Owen?

《新著龍虎門》不思議事件 銘心爪變爆脊+白朗翻版Owen?

初頭睇第958期《新著龍虎門》唔多覺,但翻Loop後隱隱然覺得唔妥。唔妥在,一,點解阿廣法堂白朗個造型咁熟口熟面嘅?活脫脫就係死鬼陳傲雲,斗膽講,其實唔只似,係直頭五官面相加髮型倒模而出,分別只在有無眼罩,求其咗啲喎;二,石黑龍咬住西狂唔放,埋尾一頁出刻骨爪破腕式加爆脊式,破腕無問題,但爆脊嗰招明明係打心口,明明係刻骨銘心爪,點解會咁嘅?唔通西狂咁奇妙的人體,背脊生喺前面?睇嚟編劇們要做多啲校對了。

Read more ›
點解嘅?石黑龍罩門點解喺大髀內側?

點解嘅?石黑龍罩門點解喺大髀內側?

今期第945期《新著龍虎門》睇到我呆咗,石黑龍俾圍攻苦苦捱打,本來劇情係幾緊湊嘅,但膠在金鐘罩十一關原來可以流成咁,齋俾人睥兩眼都會暴露罩門所在。Fine,一個升Level軒轅神道經,一個升Level盤古魔道經,就當鐵五郎同蚩尤有X光眼,功力高到可以Scan到罩門所在,但點解罩門唔係「咽喉穴」而係甚麼「箕門穴」?喂,睇咗幾十年《龍虎門》,石黑龍罩門不嬲都係喺喉嚨,幾時去咗大髀內側?另,石黑龍一時話「要報仇就要把命留住」,諗住逃走;一時又話「我石黑龍就是不怕死」,諗住拼命,但拼命前又可以好得閒地浪費功力清場,費事令途人糟殃,前後不過幾頁啫,點解可以咁精神分裂架?

Read more ›