唔好拗，亦唔使拗，舊著《龍虎門》一定好睇過《新著龍虎門》，而初期嘅《新著龍虎門》亦一定好睇過近呢兩三百期嘅《新著龍虎門》。喺今期第1013期《新著龍虎門》「玉郎周記」裡面，黃玉郎透露打算推出《新著龍虎門》完全珍藏本，寫明「內容上會分為多輯推出，第一輯主題是《邪拳魔王》，故事截至新龍平裝本五十一期作一段落，故事續上第二輯，如此類推，做到每一輯完全珍藏本也有完整的結尾」，老實，大家會唔會撐？我呢……話我盲撐都好喇，如果唔太貴的話，我係會買嘅。

作為港漫死忠，對《新著龍虎門》實在又愛又恨，點講好呢，嗯……邊搖頭嘆息但又每期準時畀錢買書咁囉。Anyway，《新著龍虎門》1000期始終係個里程碑，點都值得慶賀嘅，希望之後可以提高質素，再創高峰。睇完今期，我係唔知好嬲定好笑嘅，打咗成百期嘅四大教主之戰，居然以「一個月後」形式收場，到底白蓮聖上同火雲邪神邊個贏？懶係有伏線吊讀者癮咁，如果之後又求求其其不清不楚，我諗又會俾廣大讀者圍插。講到插，第1000期第31頁都好唔妥，Full page一格過，公仔線條起晒狗牙，效果好似影咗張唔夠像素嘅相但又夾硬要拉大嚟刊登咁，斷估唔會特登啩？又斷估我無眼疾啩？定係我買嗰本係錯版？

忙到HiHi，搞到今日先有時間睇第993期《新著龍虎門》。睇書心情好跌宕，過程大致可分為四個階段，一，沉悶，繼續打打打打，勇哥繼續打極唔死，場交繼續打極唔完，聖上加鐵五郎加南傑加東奇勾心鬥角，勉強都叫做講得通喇，係劇情拖到有啲恰眼瞓啫；二，搞笑，睇到第五頁，聖上一連打出九個火球，係威係勢，以為又出九陽大霹靂喇，點知唔係，係「霹靂啪嘞」，斷估呢四粒字應該係等同平時「轟隆」、「砰」、「啪」之類嘅擬聲字，但用錯字款兼擺錯位，搞到好似招式名咁，笑咗；三，驚喜加安慰，埋尾喺地窿捐咗個忍者出嚟，救走勇哥兼自爆拒敵，我心底裡暗呼一聲：「好嘢！四大教主之戰應該完咯！」勇哥不死，俾人救走，收科，Good吖；四，失望，睇埋書末下期預告，寫住：「邪神命不該絕，最後關頭有人出手相護，而這個人……竟然是石黑龍」，頂，無端端又關石黑龍事，即係又要打番十期八期先可以離開呢個甚麼幽靈島？唔好咯啩？

搞乜？啲招式名真係咁難諗咩？堂堂通天教教主連波動拳都要出埋？今期第980期《新著龍虎門》，劇情繼續交代石黑龍同鐵五郎一戰，先唔講明明二揪一可以大增勝算，但石黑龍死都唔畀王小虎幫拖，仲單挑？家陣殺父大仇呀，切磋武藝咩。Anyway，隻揪就隻揪喇，咁石黑龍就繼續用第十一關金鐘罩應戰喇，好合理；但鐵五郎呢，噓，居然出一招──波動雷拳！懶諗招式對拆，算，但一嘢轟埋去都唔該改個靚仔啲嘅招式名吖。唔知仲以為鐵五郎練嘅係龜波氣功，甚麼神道經‧軒轅勁，不如掟埋一邊喇。

喺《新著龍虎門》裡面，四小將之一獨眼龍仲生勾勾，又鐵沙掌又打狗棒法，都算升Grade做咗一線尾高手，咁大家仲記唔記得喺舊著《龍虎門》裡面佢點死？無錯，就係俾超級大奸狗陳傲雲分肩爪加銘心爪所殺，茅山肚兜一破，獨眼龍魂歸天國，想當年睇到我好激動。點解無端端講起佢，事關書畫雙絕嘅陳笑洛兄，剛剛畫咗件港漫Tee，畫嘅正正係獨眼龍臨死一幕，畫得好似，好靚，好傳神，一睇就回憶返晒嚟，抵畀Like。

今期第975期《新著龍虎門》，我係有少少睇到火滾嘅。火滾之處有二，一，第四頁半至六頁半內容全屬「上期回顧」性質，譜過啲新旁白說明，將上期劇情重新演繹一次，使唔使呀？其實上期已經有類似情況出現，當讀者咁無記性乎？二，龍虎群英無端端參與四大教主之戰，本身已經唔多合理，OK，Fine，就當石黑龍急於報父仇搵鐵五郎算帳，拖累埋王小虎、天嬌同飛妖參戰，叫做勉強講得通，但飛妖都唔使搏晒老命保住火雲邪神條命仔嘛，依家陣局勢發展，我完全睇唔出有何「唇亡齒寒」嘅道理在，唔夠打最多咪閃囉；仲有，飛妖唔係晨早改邪歸正嘅咩？救完邪神之後又做乜笠晒水跪低成隻狗咁？叛教都已經叛咗九百幾期喇，到依家先識驚？邪神執行家法嗰陣仲唔敢還拖，堂堂羅剎雙妖之一，又玄冰掌又好輕功，使唔使驚到打冷震？諗極唔明係乜玩法。

今期第963期《新著龍虎門》四大教主之戰終於開打，臨兵鬥者皆陣列在前，各自Show吓強勁班底都好合理，又可以乘機出吓新角色，方便之後多幾場交打。But，造型方面呢就……騎呢咗啲囉，通天教兵部元帥刀君臨，個名講真係幾型，但一身盔甲著到成個聖鬥士咁，好唔知想點；仲有嗰個甚麼蚩尤心腹凶心菩薩，面相求其都算，至弊連肢體比例都畫到古古怪怪，第三頁第二格，明顯右腳同腰係唔銜接嘅，真係想學吳若希話齋：「點解嘅？點解嘅？」

睇完第961期《新著龍虎門》，唔知有無C-Hing同我一樣，覺得西狂裘百川死得好無厘頭？無厘頭之處有三，一，血影神功講到幾勁幾勁，點知連石黑龍嘅金鐘罩都打唔贏，初頭仲估佢至少同獵神者極樂魔僧、金神魔君同Grade，點知十期唔夠玩完，著實嘍囉咗啲；二，唔明南傑歐陽世傑為乜要趕盡殺絕，話晒之前都同一陣線打過天下無敵，墮四大奇隱威名好小事啫，斷估不至深仇大恨到要置西狂於死地啩？三，西狂仲戇居，東奇祈萬里明明話咗保持中立，兩不相幫，點解係都要將血煞三悔第三悔「玉石俱焚」打向東奇，而唔係打向南傑？咁同撩鬼攞命無乜分別。Anyway，下期四大教主之戰正式開皮，希望可以做番場好戲啦。

留意番，9月26日即係今晚十點，T-dult推出嘅《風雲》、《今晚打喪屍》同《新著龍虎門》Tee會上架。《今晚打喪屍》同《新著龍虎門》Tee係舊款，家陣優惠價發售；至於聶風Print嗰件，就算係新嘅，事關係Based on之前風雲結局畫展推出嘅同一款，不過今次就將雪飲刀換上冰藍色，都OK型，值得入手。

初頭睇第958期《新著龍虎門》唔多覺，但翻Loop後隱隱然覺得唔妥。唔妥在，一，點解阿廣法堂白朗個造型咁熟口熟面嘅？活脫脫就係死鬼陳傲雲，斗膽講，其實唔只似，係直頭五官面相加髮型倒模而出，分別只在有無眼罩，求其咗啲喎；二，石黑龍咬住西狂唔放，埋尾一頁出刻骨爪破腕式加爆脊式，破腕無問題，但爆脊嗰招明明係打心口，明明係刻骨銘心爪，點解會咁嘅？唔通西狂咁奇妙的人體，背脊生喺前面？睇嚟編劇們要做多啲校對了。

今期第945期《新著龍虎門》睇到我呆咗，石黑龍俾圍攻苦苦捱打，本來劇情係幾緊湊嘅，但膠在金鐘罩十一關原來可以流成咁，齋俾人睥兩眼都會暴露罩門所在。Fine，一個升Level軒轅神道經，一個升Level盤古魔道經，就當鐵五郎同蚩尤有X光眼，功力高到可以Scan到罩門所在，但點解罩門唔係「咽喉穴」而係甚麼「箕門穴」？喂，睇咗幾十年《龍虎門》，石黑龍罩門不嬲都係喺喉嚨，幾時去咗大髀內側？另，石黑龍一時話「要報仇就要把命留住」，諗住逃走；一時又話「我石黑龍就是不怕死」，諗住拼命，但拼命前又可以好得閒地浪費功力清場，費事令途人糟殃，前後不過幾頁啫，點解可以咁精神分裂架？

話說今朝坐地鐵睇今期第944期《新著龍虎門》，笑咗出嚟，點解？因為到依家先知原來練金鐘罩會變肥仔。劇情講到身處泰國嘅石黑龍遇上蚩尤，大打出手，期間石黑龍谷金鐘罩上十一關，功力達至「剛如堅鋼，柔似棉絮」境界，咁畫面點表達呢？剛者，畫正常版石黑龍，柔者，畫肥仔版石黑龍，一堅一柔，一瘦一肥，畫面真係非常搞笑。睇咁多年港漫，一個角色忽然變肥變脹，只有兩個原因，一，中毒毒發；二，俾對手用功力谷爆中；今日，有第三個，就係練「獨一無二」嘅金鐘罩，問你服未？另，今期交代咗石武夫由鐵五郎所殺，石黑龍同蚩尤仲有偈傾，都係好事嚟嘅。

忙，搞到今日先有時間睇上個禮拜啲公仔書，睇完今期第935期《新著龍虎門》，大有如釋重負之感，噓，好咯，隨住宇一航散功兼爆湧飛昇係騙局，啲乜乜飛仙物物元嬰睇怕都可以告一段落。慘只慘在兩個獵神者金神魔君同極樂魔僧，初初出場係威係勢，家陣一個俾易天行求其一爪爆頭，另一個做磨心俾白仇同易天行轟成肉醬。不過死得絕對好呀，佢兩個唔死，啲甚麼天羅呀地網呀山崩呀海嘯呀都唔知幾時完，舊著《龍虎門》一玩到老祖宗飛昇即失控，真係唔想新著都重蹈覆轍。真心的，希望偉大的編劇可以認真度番啲在地啲橋，唔好再玩長生不老、成仙成佛呢啲睇到人硬嘅劇情，乜硬？拳頭硬呀。

今期第924期《新著龍虎門》，我睇到笑出聲。話說老妖惡鬥甚麼鷹爪門主，兵凶戰危間，老妖竟然話：「我有話說，雖然應該是白說的！我老妖是過來人，為錢為非作歹，沒好下場！」卻換來對手一句：「神經病！」梗係神經病啦大佬，劈緊友呀依家，打到一身血先嚟無端端說教，這是甚麼神邏輯？唔知仲以為佢係社工。另外，韋陀戰燕長空一戰，玩各打對手三招唔還手，韋陀先打，燕長空憑玄氣經捱得過，到燕長空打，韋陀憑九霄真經勉強頂得住，點知燕長空食言還拖。其實呢種打法之前舊著都玩過，無記錯的話，應該係蚩尤對龍貫天，一人一招輪流打對手，打打吓龍貫天笠水還拖，最後俾蚩尤一招雷霆擊鼓KO，不過講到嗰種血肉橫飛嘅畫面迫力同針鋒相對嘅對白咯喎，就真係新不如舊咯，舊著睇得人肉緊好多。

唔想成日掛喺口邊，但著實係新不如舊，《新著龍虎門》不及舊著《龍虎門》係鐵一般事實。想舊著陳傲雲俾王小虎一招裂頭腳踩死，當真大快人心，當年嘅我都不知睇得幾激動；新著陳傲雲之死呢，則劇力欠奉，死得兒戲兼無厘頭。Anyway，佢始終係一代奸仔，喺唔少港漫迷心目中有一定地位，所以都有人出圖悼念。都過咗頭七，啲悼圖都係得咁少，但總好過死咗丁點迴響都無。陳傲雲，一路好走喇。