Post Tagged with: "《古惑仔》"

多謝牛佬!Show三本《古惑仔》送A3封面畫!
by / on 11/06/2019 at 8:45 pm

多謝牛佬!Show三本《古惑仔》送A3封面畫!

今期第2242期《古惑仔》,係值得大家一口氣買三本支持吓嘅,原因有二,一,封面實在係靚,好耐都無用陳浩南原型即鄭伊健面相出現嘞,抵讚;二,牛佬話只要讀者喺面書展示三本2242期《古惑仔》,就會送今期封面伊健A3畫,係咪正先?話時話,下期輪到剛剛退休嘅鄺志德操刀封面,又係好靚,又係要儲。

Read more ›

邱福龍操刀下期《古惑仔》封面 值得珍藏
by / on 03/06/2019 at 7:16 pm

邱福龍操刀下期《古惑仔》封面 值得珍藏

奉牛佬諭,下期第2241期《古惑仔》,記得買兩本,一本儲一本睇,事關封面由邱福龍操刀,值得珍藏。牛佬仲透露,嚟緊Man僧同鄺志德都會幫拖畫吓封面,久唔久搞吓呢類Crossover,絕對係好事吖。

Read more ›
呢格原本想畫札比,但畫錯咗迪文。
by / on 31/05/2019 at 9:39 pm

《古惑仔》札比畫錯迪文 方盛滿作反有理

作為死忠,我有必要提醒番牛佬,今期第2239期《古惑仔》有個小錯誤,第14頁頭一格畫迪文,啱,第二格諗住畫札比,但畫錯咗又畫番迪文,之後出珍藏本記得改番喇。講番劇情,今期終於講到方盛滿咁落力打造「一帶一路」嘅真正奸計,原來名為替毒蛇幫開拓香港勢力,實係想借助依依本身個招牌「老利」,正式喺香港戙番一支屬於自己嘅旗。咁先係路嘛,古惑仔打打殺殺為乜,梗係為實際利益喇,作反一啲都唔出奇。今次牛佬出呢個神人總算有理有據,啲伏線暫時都鋪得幾靚,希望方盛滿可以成為第二個車寶山喇。

Read more ›
《古惑仔》小改版出新專欄 印刷失誤旁白重疊咗?
by / on 10/05/2019 at 9:30 am

《古惑仔》小改版出新專欄 印刷失誤旁白重疊咗?

今期第2233期《古惑仔》來了一個迷你改版,個人觀感唔差。一,無咗「角色武值榜」同期期都寫差唔多嘢嘅「古惑俱樂部」,取而代之係新專欄「淡看世情」,牛佬寫做人心態同生活瑣事,著墨處雲淡風輕,內容唔太Heavy,幾好睇。書一開頭嗰個「毒蛇幫主要人物架構圖」都正,可以當角色Revision,喚醒吓記憶都好,不過我認為皇太后丁瑤畫得後生咗,唔係畫得唔靚,但唔知點解硬係覺得格格不入,可能唔夠老虔婆Feel。讚完,都有嘢彈,估計係印刷失誤,第20頁同第25頁,旁白說明明顯重疊咗,公仔線條走咗位同甩色。牛佬,他朝出珍藏本,記得執番靚佢呀。

Read more ›
《古惑仔》搞笑劇情!佐敦俾陳浩南激到嘔血!
by / on 29/03/2019 at 12:48 am

《古惑仔》搞笑劇情!佐敦俾陳浩南激到嘔血!

有時同人嗌交,我哋會話:「俾你激到嘔幾升血。」現實世界有無人嬲到噴血呢?唔知,但公仔書世界裡面有。今期第2221期《古惑仔》解開洪興陳浩南如何過三聯佐敦一戙之謎,俾襯家起咗成N億毒品尾注,佐敦先借醉鬧事搵李成克掃人場,之後醉到嘔,嘔嘅係血,牛佬仲要有咁誇張畫到咁誇張,畫到啲血柱呈放射狀噴出嚟。平時打交就話會嘔血啫,估唔到牛佬夠膽死畫「激到嘔血」,睇到呢格,我真係笑咗出嚟。話時話,雖則大家都係龍頭,但陳浩南始終老奸巨滑,講出古惑,佐敦仔又點會夠南哥鬥吖?呢場文戲,我Like呀。

Read more ›
海報輯錄成畫集 牛佬《百戰話當年》開訂$380
by / on 25/02/2019 at 7:58 pm

海報輯錄成畫集 牛佬《百戰話當年》開訂$380

身邊豬朋:「將每期海報輯錄成畫集,慳水慳力啲喎。」身邊狗友:「咁慳水慳力唔代質素差啫,牛佬係好嘢嘅。」無錯,呢鋪我都撐牛佬,好嘢輯錄成書,合理吖喂。之所以呢本《古惑仔》畫集《百戰話當年》,我係會捧場嘅。每本$380,無話貴唔貴,只有值唔值,仲要隨書附送《江湖巨人陳浩南》24×18吋巨型海報,有埋Bonus喇。我覺得值,係略嫌個封面簡單咗啲,唔夠搶眼啫。

Read more ›

《古惑仔》謎團!陳浩南同韓賓定大飛打躉?
by / on 22/02/2019 at 9:15 pm

《古惑仔》謎團!陳浩南同韓賓定大飛打躉?

今期第2211期《古惑仔》,主要交代毒蛇幫新貴方盛滿出場,方盛滿有型靚仔注重儀容,牛佬有心煲佢係文武兼備嘅厲害人物。我尤其鍾意白色頭髮嘅角色,昔日嘅太乙、羅心左,我Like,呢個方盛滿,亦好合我眼緣。入番正題,今期出咗個小錯誤,第31頁最尾一格,旁白說明係「這時,陳浩南正與韓賓茶聚……」,但畫面所見喺茶仔同南哥打躉嘅,卻係大飛背影,應該係手民之誤嘞。

Read more ›
牛佬《古惑仔》有感動位 韓賓陳浩南冰釋前嫌
by / on 15/02/2019 at 4:13 pm

牛佬《古惑仔》有感動位 韓賓陳浩南冰釋前嫌

話睇到喊就誇張咗,但睇完今期第2209期《古惑仔》,確實有少少感動,證明牛佬刻劃角色性格嘅功力寶刀未老。今期講韓賓終於知道陳浩南爭龍頭苦衷,韓賓打完陳浩南,質問對方有無當佢係好兄弟,陳浩南話有。韓賓臨尾補多句:「你陳浩南──永遠都係洪興嘅老頂。」兩兄弟冰釋前嫌。睇到呢個位,唔係吹水,我真係有少少起雞皮嘞,咁咪好囉,相信唔少讀者都同我同一個諗法,話晒做咗二千幾期兄弟,無理由咁樣反面架?家陣和好如初,一天光晒。

Read more ›
《古惑仔》新春孖寶號$50 送揮春+書籤+年卡
by / on 31/01/2019 at 9:30 pm

《古惑仔》新春孖寶號$50 送揮春+書籤+年卡

過農曆年,意味港漫又出新春孖寶號,三日刊《古惑仔》都唔例外,下期第2206+2207合併號喺2月3日見街,售價$50。係,係貴咗$4咁大把,但牛佬都好識做,送番套三合一揮春+書籤+年卡,以報答讀者。喂喂喂,新年大把利是錢喇,區區$4唔好詐型,我幫牛佬講嘅。

Read more ›
畀掌聲牛佬《古惑仔》 估佢唔到係賽雅開槍
by / on 25/01/2019 at 8:30 am

畀掌聲牛佬《古惑仔》 估佢唔到係賽雅開槍

  係值得畀番啲掌聲牛佬嘅,對比上一輯故事「巨星之戰」,今輯父子攤牌嘅戲碼敢講好睇十倍,以「高潮迭起」四字形容都唔過份。上期《古惑仔》最尾一格,多咗支槍介入陳浩南同游子健講數,我估過支槍係屬於大飛嘅,又估過十三妹或韓賓趕到幫拖,甚至估過無知會無知地啪低游子健。今期第2203期開估,我千估萬估都無諗過會係坐住輪椅嘅賽雅,如此這般搞到情況更複雜,呢鋪陳浩南真係唔知點算,一個係親生子,一個係自己女人,都唔知護邊個好。係囉,呢啲情節咪幾好睇囉,作為死忠Fans,我真心Mode同牛佬講句心底話,唔使下下都打打打唔知為乜打嘅,文場甚至呢類半文場,咪仲扣人心弦?

Read more ›
牛佬《古惑仔》又抽水 估唔到十三妹投陳浩南一票
by / on 04/01/2019 at 10:30 am

牛佬《古惑仔》又抽水 估唔到十三妹投陳浩南一票

畢竟係三日刊,係有啲拖橋架嘞,但牛佬係好嘢嘅,喺適當時候抽水,再加一個估你唔到嘅三百六十度扭上扭上扭橋,成本公仔書即刻生猛番晒,追看性大大提高。今期第2197期《古惑仔》,我幾鍾意「洪興」白紙扇陳耀戙出嚟主持公道一幕,佢認為投票選老頂應該嚴肅處理,程序要均真,話:「最起碼,唔應該學似我哋特區選特首咁樣亂咁嚟,係咪咁講呀?」直頭係咁講喇,唔知「好打得」同一班高官睇完有無感想呢?又,最尾一格,十三妹居然調轉槍頭投陳浩南一票,激到韓賓死死吓,呢下真係估牛佬唔到,唔通十三妹、陳耀同陳浩南老早串通埋?為免被臥底浩然指證,夾硬扯韓賓下馬,由南哥一個人頂晒?

Read more ›

《古惑仔》x Phoenix Dart出飛鏢卡
by / on 08/11/2018 at 8:27 pm

《古惑仔》x Phoenix Dart出飛鏢卡

我無乜掟鏢癮,但作為牛佬死忠Fans,都好想擁有呢套由《古惑仔》聯乘Phoenix Darts推出嘅飛鏢卡。鏢卡分兩款,一,套裝,限150套,每套包4張分別印有大飛、陳浩南、大梵同立花正仁頭像嘅鏢卡;二,散裝,都有四款,都係上述四位仁兄做主角,可以散買咁囉,但作為Fans,都可以一次過儲齊架喇。

Read more ›
正呀喂!《古惑仔》送性感丁瑤海報!
by / on 25/10/2018 at 8:58 pm

正呀喂!《古惑仔》送性感丁瑤海報!

唔關內文事,斷估都唔會有C-Hing詐型劇透,不過就算詐型都要開心Share架嘞,事關今期第2177期《古惑仔》中間拉頁海報著實係正,毒蛇幫皇太后丁瑤露點呀喂。畫到如此性感而不令人反感,負責彩稿嘅邱志加應記一功。And,牛佬喺專欄透露話下期會送多張陳浩南海報,唔係唔好,不過如果有得揀,我寧願畫女角囉,山下詩織、九尾狐、攀腳龍媚媚有無得諗?親愛的牛佬,認真度一度吖。

Read more ›
祝牛佬生日快樂 《古惑仔》陳浩南頭髮分錯色
by / on 16/10/2018 at 8:39 pm

祝牛佬生日快樂 《古惑仔》陳浩南頭髮分錯色

今期第2174期《古惑仔》,金尊貴同陳浩南之戰終於收皮,結果係一記頭槌拼膝頭後,前者符碌勝後者跌落海輸。對於呢個戰結果,我無異議,因為喺我心目中陳浩南已經贏咗,唔好忘記之前佢同牛姑打過一場,帶傷之身鍊多場僅敗畀毒蛇幫幫主,夠交代有餘。不過呢,今期第八頁疑似分色出錯喎,第二格明明畫緊向前衝嘅南哥大頭,但頭髮就分錯色變咗金尊貴嘅金黃色,少少瑕疵咁喇。另,牛佬喺專欄「牛佬的話」自爆生日,本網站祝牛佬身體健康,長命百歲,日日都過得開開心心。

Read more ›
牛佬宣佈《古惑仔》加價至$23 讀者有贊成有反對
by / on 23/07/2018 at 9:31 pm

牛佬宣佈《古惑仔》加價至$23 讀者有贊成有反對

牛佬喺今期第2150期《古惑仔》宣佈,下期正式調整售價至$23。為此,幾個港漫相關面書專頁都留言不絕,有人贊成,仲話牛佬加得遲,好應該加到$28甚至$30;但以反對聲音佔大多數,話誓要Cut書云云。我呢,加$3,一周兩本即係畀多$6,成個月計落都不過係畀多$24,絕對接受得到。惟一想牛佬改善嘅係──都係老問題──期期書都畫得太大格,唔多襟睇,如果格數畫得充實啲,內容紮實啲,橋行得好啲,畀多$3真係無乜所謂。或者正如牛佬自己所言:「鍾意睇,唔貴!唔鍾意睇嘅話,莫講加價,減價都嫌你貴。」此言甚是,我認同,並選擇繼續捧場。

Read more ›