fbpx

Post Tagged with: "《古惑仔》"

《古惑仔》版權唔屬於牛佬? 《龍虎門外傳》暫定八期完
by / on 15/10/2020 at 4:00 pm

《古惑仔》版權唔屬於牛佬? 《龍虎門外傳》暫定八期完

完了,《勝利人生李浩東》去到第11期正式完結,雖然落雨收柴,但總算有頭有尾。值得一提嘅係今期專欄「牛佬的話」,佢解釋點解重啟《古惑仔2.0》不可行,「……再寫《古惑仔2》,好難好過原有嘅銷路!」呢個Point好易理解,但之後佢補多句:「…….再講,《古惑仔》嘅版權出咗少少問題,唔放手唔得架嘞……」吓?《古惑仔》版權唔係百分百屬於牛佬嘅咩?有甚麼難言之隱呢,我唔係好明。另,嚟緊推出嘅《龍虎門外傳》,牛佬暫定用八期篇幅講慈雲山七鷹,即係話屬短篇。都支持嘅,只要寫得好,短一樣有短嘅好睇,到時做出口碑咯,咪再出荃灣十五狼、觀塘十一邪、柴灣七鱷囉。牛佬,加油呀,支持!

Read more ›

唔係地中海 《勝利人生李浩東》強人角色黃海蛟登場
by / on 03/09/2020 at 9:00 pm

唔係地中海 《勝利人生李浩東》強人角色黃海蛟登場

嗱,唔係亂入,地中海還地中海,黃海蛟還黃海蛟,兩個人嚟千其咪搞錯;And,是「黃」不是「王」,亦唔係《龍虎門》嗰個邪拳魔王王海蛟。雖則呢個《勝利人生李浩東》第五期新角色同《古惑仔》毒蛇幫副幫主地中海造型101%相似,即係一模一樣,但人家真實名字叫黃海蛟,性格同地中海嘅低調閃縮、刻意示弱天淵之別。黃海蛟自稱強人,單身匹馬闖江湖,愛招搖,亦唔介意俾人知道自己有一身好武功,手底功夫叫大海神拳。今期黃海蛟同李浩東單挑嗰頁跨版,唔知仲以為睇緊《古惑仔》洪興小春單挑地中海。牛佬出呢個角色嘅原因好簡單,純粹因為「鍾意」,唔好誤會會有甚麼穿越時空情節。牛佬鍾意,各位C-Hing又鍾唔鍾意?於我係OK的。

Read more ›
鐵定8月25日見街 疑似地中海亂入《勝利人生李浩東》
by / on 24/08/2020 at 4:45 pm

鐵定8月25日見街 疑似地中海亂入《勝利人生李浩東》

係有啲擔心嘅,上周日落書報攤唔見《勝利人生李浩東》,到今日周一都仲係未見,心諗唔通牛佬又身體抱恙?幸好,剛剛面書專頁「古惑仔Teddyboy」出咗廣告,話第四期將於8月25日即周二見街,咁都好啲。不過話時話,記得創刊號係周六推出嘅,跟住試過周日推出,第四期又改喺周二推出,咁搞法有啲亂喎,希望牛佬可以留意吓,Fix番出版日期好啲囉。另,第四期封面人物非常熟口熟面,面相髮型And造型都直頭係《古惑仔》毒蛇幫副幫主地中海嚟嘅,咁得意?Why?

Read more ›
牛佬抱恙《勝利人生李浩東》脫期 出集氣卡祝早日康復
by / on 02/07/2020 at 8:00 pm

牛佬抱恙《勝利人生李浩東》脫期 出集氣卡祝早日康復

喂?第二期就脫期?無辦法,因為病倒了。據面書專頁「古惑仔Teddyboy」透露,牛佬因喉嚨痛到三日食唔到嘢,食藥嘔藥,飲水嘔水,結果要入廠深入治療,到家陣先叫做病情稍稍穩定,所以呢個禮拜無《勝利人生李浩東》睇。為此,有關方面推出《勝利人生李浩東》集氣卡,每張$2,大家都不妨買番張,祝牛佬早日康復。

Read more ›
牛佬《古惑仔》大結局 遺憾伏線無收尾
by / on 01/05/2020 at 2:15 pm

牛佬《古惑仔》大結局 遺憾伏線無收尾

一個時代的終結,縱不捨,要完始終要完。28年歷史《古惑仔》喺第2335期正式完結,好難想像以後嘅周一同周四無《古惑仔》睇嘅日子,點都好,多謝牛佬帶畀我咁多年歡樂,真心的,很多謝……

Read more ›
《古惑仔》陳耀評洪興歷屆龍頭 陳浩南最佳?
by / on 22/04/2020 at 8:30 pm

《古惑仔》陳耀評洪興歷屆龍頭 陳浩南最佳?

就快完嘞,去到尾聲嘅尾聲嘞,今期第2332期《古惑仔》講到梁家仁正式成為洪興龍頭,喺登基大典上拉開布幕,背藏一張陳浩南大頭照,莫非遺照乎?唔通我其實係估啱,死嗰個係陳浩南,跌落海嘅立花正仁最後救得番?呢Part劇情要讚一讚牛佬,究竟邊個死?係好吊到讀者癮嘅,亦造就我同同事嘅一餐飯輸賭。But,陳耀評歷任洪興龍頭一幕,我卻不敢苟同,陳耀評蔣天生聰明但自私,合理;評韓賓淨係識得睇住盤數同發老脾,唔覺;評陳浩南咁多屆龍頭當中算係最好,十萬個不同意。係陳浩南黐埋Baby炒股兼揩粉,先搞到洪興沉淪,福田一役八壯士係俾佢直接累死嘅;聯同二代覆灼地中海,搞到伊文華盲眼;話保住二代,點知世飛俾金尊貴劈開兩半、李志高變跛仔;為咗個仔游子健安全,居然戇居居走去同韓賓爭龍頭,差啲令社團分裂;Last一劑就更加無厘頭,無端端傾盡社團之力挑戰江湖黑道一哥之位,又係害死唔少兄弟之舉,分分鐘搞到賽雅要守寡。如果咁都配稱好龍頭,無話可說。唔知大家又點睇?

Read more ›

《古惑仔》南哥殺好友! 立花之死講唔講得通?
by / on 10/04/2020 at 8:30 pm

《古惑仔》南哥殺好友! 立花之死講唔講得通?

隨住《古惑仔》完結倒數,陳浩南同立花正仁一戰大局已定。我係估錯咗嘅,我估陳浩南死,但死嘅睇個勢係立花正仁,除非再扭橋,否則立花正仁都好難翻生。睇完今期第2329期,對於牛佬呢條二必死其一戲碼,大家收唔收貨?老實,於我,只係叫做勉強講得通。原因有二,一,暗黑之門啲殺手家陣好強咩?立花正仁係神人,以一人之力?返轉頭滅佢門都仲得啦,驚唔夠抽,搵埋佐維、大梵幫手咪唔得咩?Fine,就算反咬不成,要自保都應該綽綽有餘啩?二,既然立花正仁老早洞悉黑澤村陰謀,點解唔可以事先同陳浩南單聲,兩人夾檔扮打生打死,合演一場好戲坤殺手博文上釣咪得囉,使唔使真係以命相搏先?BTW,牛佬營造生離死別嘅氣氛確有一手,大飛一句:「亞南!留手呀!」盡顯激動之情;而立花正仁遺言:「南……我點會殺你!」唉,更加睇到我好Sad。

Read more ›
開心!牛佬開支票:「《古惑仔》永遠纏住你哋!」
by / on 20/03/2020 at 8:00 pm

開心!牛佬開支票:「《古惑仔》永遠纏住你哋!」

對於連汁都撈埋嘅我,每期《古惑仔》「Cowman Msg」都會好認真咁睇。喺剛過去嘅2322期,牛佬咁寫:「……真係唔駛太擔心!事關話就話敝刊完結,但係大家不妨諗深一層,只要牛佬、倫裕國And陳科琳呢三兜友,一日唔離開呢行,總會有日突然興之所致,攞返《古惑仔》出嚟玩!寫吓啲『後傳』又或者『外傳』嘅嘢……《古惑仔》將會永遠纏住你哋!」喺2323期又咁話:「…….距離敝刊『大結局』嘅日子越嚟越近……吁!自己刻意故作輕鬆都唔得,事關『大結局』迫在眉睫,『新作』亦會同時啟動……」有新作呀喂!收到呢個消息,我係開心不過又有少少矛盾嘅,開心係因為《古惑仔》係不能或缺嘅精神食糧,前傳後傳外傳內傳乜傳都好喇,有得睇我就OK架喇;矛盾係因為我真心希望牛佬口中嘅「新作」,可以完全脫離江湖書框框,試寫唔同題材吖,我相信好多讀者都Buy架。咁Of Course,兩者都有,可以出夠兩本唔同類型嘅新作的話,咁就最最最最最Goodest喇。

Read more ›
牛佬親證《古惑仔》4月中結束 咁多伏線點收科
by / on 05/03/2020 at 9:00 pm

牛佬親證《古惑仔》4月中結束 咁多伏線點收科

真正倒數喇,真係就快完嘞,今期第2320期《古惑仔》,牛佬咁寫:「呢一輪,周不時都有老友記追問敝刊幾時完結!之前,牛佬都唔敢肯定!但係去到依家,有少少眉目嘞──四月中之前,應該可以完結!」家陣係3月頭,即係話一個月多啲就完結,即係約10期左右。問題嚟嘞,10期書真係可以交代得晒咁多嘢咩?大飛殺唔殺到金尊貴同世飛報仇?丁瑤呢個老虔婆又點收科?方盛滿、大梵、梁小東、佐敦、李成克呢啲重量級角色去向如何?仲有最重要嘅陳浩南VS立花正仁二死一之戰,點都要預番三兩期慢慢打嘛?BTW,去到家陣,我覺得何小海會不自量力挑戰陳浩南而死,而佐維亦會壯烈犧牲,反而小馬唔使死,唔知我有無估錯?

Read more ›
《古惑仔》合併號$55 陳浩南半期做低戴軍堡咁快手?
by / on 23/01/2020 at 9:30 pm

《古惑仔》合併號$55 陳浩南半期做低戴軍堡咁快手?

自從牛佬宣佈完結後,《古惑仔》劇情去得火箭咁快,話晒老牌社團,但兩期唔夠洪興就搞掂和興和,蛇夫死咗都唔知自己衰乜;今期第2307加2308庚子孖寶合併號講到滅東英,梁小東熬底著草美國,堂堂東瀛虎戴軍堡仲弊,半期多少少就俾陳浩南拗斷頸陣亡,最尾嗰格交代到立花追殺雷霆,睇嚟呢隻狂雷虎下期都可以收工。心嗰句,去橋實在去得太快,角色死得實在太不明不白,作為死忠Fans幾乎對每個角色都有一定感情的我,有啲Bad feeling。急還急,還望牛佬可以撚盡十二成功力,讓所有要死嘅角色都死得有型啲、有頭有尾有啲。又,今期係合併號,兩期內容賣貴一倍合理,但$25開雙卻唔係賣$50,而係賣到$55,呢下好多讀者都覺得有少少太過。Anyway,下年都無機會再睇《古惑仔》合併號咯,我估好多讀者都唔介意畀多$5嘅。

Read more ›
想吸納埋《古惑仔》讀者?瑞新回心轉意唔完結《火武耀揚》
by / on 23/01/2020 at 8:45 pm

想吸納埋《古惑仔》讀者?瑞新回心轉意唔完結《火武耀揚》

今期第1057加1058期合併號《火武耀揚》,封面右上角有大大隻字寫住六個大字──「重大消息公布」,消息確實重大,事關瑞新回心轉意,宣佈取消完結《火武耀揚》。佢喺週記咁話:「想不到寓意深遠的覺醒一戰竟然第一個覺醒了作者瑞新,瑞新將會更努力編寫一個個好故事,回饋愛戴敝刊的你!然後用實際行動回饋所有真‧香港人。」覺醒覺醒,究竟瑞新覺醒啲乜呢?我咁估:係咪因為知道《古惑仔》就快完結,所以有所覺醒,諗住繼續寫《火武耀揚》可以吸納埋《古惑仔》讀者?Anyway,總算每個禮拜保住多一本港漫睇,對於我呢個死忠港迷漫嚟講,係極極極極極開心嘅。瑞新!支持你呀!

Read more ›

《古惑仔》紅白靚酒系列$1440開訂
by / on 23/12/2019 at 8:46 pm

《古惑仔》紅白靚酒系列$1440開訂

《古惑仔》紅白靚酒系列有正式價錢,一Set共6支$1440,酒標見有大頭仔、山雞、包皮、陳浩南同大天二等最最最最始祖角色。係喇,幫吓手喇,鍾意就入多幾Set喇,話唔定牛佬成功開源,可以暫緩甚至撒銷完結《古惑仔》呢個決定。一諗起之後無《古惑仔》睇,我就Sad。

Read more ›
牛佬完結《古惑仔》 陳浩南立花正仁死其一
by / on 19/12/2019 at 9:32 pm

牛佬完結《古惑仔》 陳浩南立花正仁死其一

年尾流流,做乜搵啲咁嘅嘢搞呀?完全唔明牛佬點解要下個咁嘅決定,讓我等《古惑仔》死忠Fans傷透心。佢喺今期第2297期透露最快三四個月、最遲六七個月後完結《古惑仔》,事先張揚以陳浩南對立花正仁一戰作最後戲碼,講到明其中一個一定要死,嗚……就算完結,都唔使整死佢哋是但一個呀?唉,一諗起以後逢星期一同四,落街第一件事買煙買《古惑仔》嘅日子就快消失,我就好擔心,我驚會好唔慣,我真係有啲唔知點算好。各位C-Hing,不如我哋一齊集氣,跪求牛佬收回成命好唔好?

Read more ›
牛佬《古惑仔》評價年輕人 立花正仁吹到啤一聲
by / on 11/12/2019 at 8:44 pm

牛佬《古惑仔》評價年輕人 立花正仁吹到啤一聲

今期第2294期《古惑仔》,牛佬透過立花正仁應承久野一郎擔當「暗黑之門」教練一幕,對時下年輕人作出評價,總結為「不太理會別人,只會埋首手機;不懂與人溝通,根本,連說話都不會;不會寫字;完全欠奉禮貌」。我認同牛佬睇法,實情我每日返工都見到一大班呢類廿零三十歲低頭族同事,佢哋唔算無禮貌,見面會點頭,但點完頭後會極速耷低頭閃開,寫字肉酸到震,唔多講嘢但講親嘢都一舊舊,無厘神氣淨係識Loop手機。面對佢哋,我覺得好應該學習吓立花正仁嘅思維:「世界既然變成這樣,我們就得適應,世界──是年輕人的嘛!」牛佬呢段寫文戲寫得好,好正面,無錯立花正仁俾班後輩吹到啤一聲,但世界確實係屬於年輕人,所以老屎忽們切忌敦起個食鹽多過你食米款,亦切忌阿芝阿佐將「呢一代好唔掂」、「一代不如一代」之類說話擺喺口邊,總之互相尊重就可以了。不過呢,有樣嘢我就真係一億個頂唔順,話說劇情提到尚未畢業嘅殺手重信同清隆,同檯食飯都要用WhatsApp溝通,好似啞咗咁。Sorry,你話我老土都係咁話,呢種所謂新一代溝通文化,我真係接受唔到。人都坐喺你側邊咯,都仲要篤篤篤溝通?把口不如用紅毛泥封咗佢喇。

Read more ›
《古惑仔》紅白酒系列 不日推出
by / on 26/11/2019 at 6:59 pm

《古惑仔》紅白酒系列 不日推出

牛佬喺面書專頁「古惑仔Teddyboy」報料,話將會推出百利達《古惑仔》紅白酒系列,暫時未知價錢。齋望酒標,無睇錯應該有陳浩南、山雞、包皮同大頭仔等四款。都係嗰句,我唔好酒,但鍾意個酒標,如果唔太貴的話,必定入手。

Read more ›