Post Tagged with: "《九龍城寨》"

創造館優惠 $1000買全套14期《九龍城寨》珍藏本
by / on 06/07/2020 at 7:00 pm

創造館優惠 $1000買全套14期《九龍城寨》珍藏本

書展檔期,出版社「創造館」推出優惠,$1000就可以買晒全套1至14期《九龍城寨》珍藏本。面書專頁有此留言:「一次過排晒啲封面出嚟真係靚。」梗係靚喇,司徒劍僑手筆邊會唔靚,想像到一字排開何其壯觀,誇張啲講句當買封面都抵;又有此留言:「拎咗一皮嘢回水嘅你,拎10分1出嚟就可以擁有佢。」講得啱,有閒錢咪幫手振興經濟囉,買精神食糧唔過份啫。不過話時話,呢一皮嘢你收到未?

Read more ›

咁都得?Pen So出《九龍城寨》掛畫式喇叭組合!
by / on 24/01/2020 at 10:30 am

咁都得?Pen So出《九龍城寨》掛畫式喇叭組合!

厲害!呢鋪真係估Pen So唔到,點估到一幅《九龍城寨》畫作可以變成掛畫式無線喇叭組合?喇叭組合分兩個尺寸,分別係70cm x 30cm售$1800,70cm x 50cm售$2000,優點係唔使透過任何專用Apps或軟件,喺20米範圍以內透過一般藍牙連線就可以播放。齋望相,我覺得幾潮。

Read more ›
《九龍城寨》陳洛軍+《武道狂之詩》荊裂Lego化
by / on 09/03/2019 at 5:30 pm

《九龍城寨》陳洛軍+《武道狂之詩》荊裂Lego化

Wow,強!剛剛喺面書專頁睇到呢兩個港漫角色Lego,余兒《九龍城寨》陳洛軍同喬靖夫+葉偉青《武道狂之詩》荊裂是也,完成品都幾有角色神髓,我覺得幾正。創作者Dick仲話:「今日製作咗兩個港漫人物,為港漫從業員/小說家打打氣。」啱聽,大家都加油。

Read more ›
《九龍城寨》漫畫第二部典藏版封面曝光
by / on 11/06/2018 at 10:00 pm

《九龍城寨》漫畫第二部典藏版封面曝光

2018書展就快殺埋身,「創造館」今年會推出《九龍城寨》漫畫第二部典藏版,封面剛剛釋出,大大個陳洛軍,啱睇吖嘛。余兒露透話,屆時司徒劍僑「大有機會」現身到場簽名,大家識做喇。

Read more ›
余兒賣定一年廣告 2018年7月出《龍頭》
by / on 23/08/2017 at 4:01 pm

余兒賣定一年廣告 2018年7月出《龍頭》

啱架,早啲賣定廣告無衰,余兒將會喺7月推出《龍頭》,故事簡介──「以菩薩心腸行霹靂手段,梟雄之崛起,傳奇之誕生!一代神人龍捲風發跡史,龍城幫與青天會的鬥爭,始於那個狂吼的五十年代。」算唔算《九龍城寨》別傳?有啲期待。不過唔該留意番,係7月,係,你無睇錯我都無寫錯,係2018年7月,余兒喺面書好搞笑咁話:「咁快公布出版日期,係因為有時睇戲見到預告講定明年幾月幾日上映,感覺好型,所以又學下人。最重要係,公布咗日期就唔可以撻,可以迫自己快啲開工,一撻就好衰仔,雖然我唔怕做衰仔。」哈哈,加油呀余兒!支持你!

Read more ›
《九龍城寨》完結篇書展推出 加推連書盒Boxset版
by / on 09/07/2017 at 12:00 pm

《九龍城寨》完結篇書展推出 加推連書盒Boxset版

有始有終,《九龍城寨》小說終於畫上完美句號,第四期完結篇將會喺書展推出,售$70兼送海報,屆時大可以搵余兒簽名兼影相。後知後覺依家先知係好嘢?Fine,唔怕,有一至四期連書盒Boxset版,售$300,有買開頭三期嘅,齋買盒方便收藏都得,每個$80,限量100個。

Read more ›

余兒 x Pen So 《九龍城寨》2017年有新搞作
by / on 04/01/2017 at 7:15 pm

余兒 x Pen So 《九龍城寨》2017年有新搞作

好事!好嘢無理由俾佢停,雖然《九龍城寨》小說正式完結,但余兒喺面書咁話:「不過有關《城寨》嘅其他發展項目,而家先係正式開始。」開始乜呢?家陣尚在賣關子階段,淨係知新作會由余兒編劇,Pen So作畫。Pen So亦已經喺面書發放咗「2017第一張畫」,究竟呢個聯乘企劃係繪本?漫畫外傳?畫集?真真拭目以待。

Read more ›
余兒搞「我最喜愛的角色」選舉 撰文替筆下角色拉票
by / on 24/08/2016 at 9:30 pm

余兒搞「我最喜愛的角色」選舉 撰文替筆下角色拉票

有誠意!我鍾意!想谷書就要同讀者多啲互動,余兒就係好例子,《九龍城寨》典藏版第二經已經見街,佢決定再玩多個小遊戲谷書──投票選我最喜愛的角色,只要你唔係Click個掣都懶,肯投票就有機會得到司徒劍僑+余兒親筆簽名《九龍城寨》典藏版第二期一本,名額三名,8月31日截止。或者你會問:「送得嗰三大本有幾誠意呀?」非也,我講嘅誠意並非送書數量,而係余兒親自撰文為自己嘅角色拉票,洋洋灑灑幾百字,逐一形容角色特點、性格、創作歷程等等,化成「人物誌」,家陣「人物誌」已經寫到第六個,分別係──信一、狄秋、十二少、吉祥、忌廉哥同細寶,睇個勢,仲有排寫。

Read more ›
《九龍城寨》典藏版第二期8月底出版 番外短篇收錄AV隻揪信一
by / on 16/08/2016 at 10:45 pm

《九龍城寨》典藏版第二期8月底出版 番外短篇收錄AV隻揪信一

係擺明幫余兒賣廣告架嘞,鬼叫我真心鍾意《九龍城寨》。《九龍城寨》典藏版第二期疑似封面曝光,暫定八月底見街,余兒喺面書透露番外短篇內容──「原來信一同AV有一手……唔係,係交過手至真」,另登幾張靚靚彩色稿件,交代信一同十二少不打不相識嘅經過,依家睇番,都仲係覺得咁正。

Read more ›
有片:戥余兒開心!《九龍城寨》出電影宣傳片!
by / on 01/08/2016 at 9:45 pm

有片:戥余兒開心!《九龍城寨》出電影宣傳片!

陳洛軍、吉祥、大老闆、AV、信一、十二少、龍捲風……係好開心嘅,如果你同我一樣都係司徒劍僑Fans的話,我諗連小說原著者余兒都估唔到自己嘅作品《九龍城寨》可以拍成電影,而出任電影監製嘅,係監製過《無間道》系列、《頭文字D》同《志明與春嬌》嘅監製莊澄。雖然電影2017年先上映,但余兒已經急不及待掟咗條宣傳片上YouTube,雖然成條片都係由舊畫稿Edit而成,但一加咗幾句旁白──「恩怨,在血色之夜結下」、「反抗,就是唯一的出路」、「絕境,得到重生的機會」、「活著,讓我活得有希望」、「用鮮血用汗水,粉碎敵人的靈魂」、「建立屬於我們的新世界」,就霎時熱血唔少。依家睇番,司徒劍僑啲畫都仲係咁靚。

Read more ›
Pen So x《九龍城寨》Postcard $60。
by / on 20/07/2016 at 9:00 pm

必搶Pen So x《九龍城寨》Postcard 一套七卡$60

使唔使畫到咁仔細?就係要!Pen So聯乘《九龍城寨》推出嘅Postcard,張張都可以用「精雕細琢」四個字嚟形容,一套七卡各有名堂,分別為兩張合併為一嘅「拆城」、「魔窟」、「冰室」、「天台」、「花籠」同「龍跡」,無錯,就係畫番《九龍城寨》漫畫版出現過嘅場景,限量150套,每套$60,書展必搶之選。另外,書展期間,幫襯余兒買番本《九龍城寨》小說第三期即送吉祥Postcard,買典藏版《九龍城寨》創刊號即送AV Postcard,送晒就無,都係嗰句,有買趁手。

Read more ›

《九龍城寨》典藏版封面曝光 2017年電影化
by / on 07/07/2016 at 9:00 am

《九龍城寨》典藏版封面曝光 2017年電影化

司徒劍僑Fans留意,嚟緊喺書展推出嘅《九龍城寨》典藏版第一期封面正式曝光,7月20日準時課金喇。另外,「創造館」阿頭余兒搞作多多,繼《今晚打喪屍》將會改編成電影後,《九龍城寨》亦宣佈喺2017年電影化,余兒喺面書標出兩句好威猛嘅Slogan──「暗黑王道話題作,熱血衝擊大銀幕」,此言一出,讀者紛紛讚好,仲就選角問題提供意見,有人話搵徐錦江做大老闆,有人話搵張耀揚做信一,聽落都OK喎。

Read more ›
《九龍城寨》小說第三期 十二少吉祥HeHe味濃
by / on 23/06/2016 at 11:30 pm

《九龍城寨》小說第三期 十二少吉祥HeHe味濃

臨近書展,出版社「創造館」有新書推出,作為阿頭嘅魚兒將會推出《九龍城寨》小說第三期〈想忘於江湖〉,相比第二期〈龍城第一刀〉,封面畫風簡直南轅北轍。第三期封面由十二少搭吉祥掛帥,落色予人好陰沉嘅感覺,十二少差不多隱沒黑暗之中,而吉祥把紅色頭髮卻異常搶眼,對比都好強烈吓。我幾Like呢隻畫風,不過身邊朋友就話兩人面相女咗啲,HeHe味都幾濃喎。

Read more ›
余兒出《九龍城寨》典藏版 附番外篇有司徒劍僑新稿件
by / on 18/05/2016 at 8:45 pm

余兒出《九龍城寨》典藏版 附番外篇有司徒劍僑新稿件

之前報導過話余兒打算重出《九龍城寨》,形式未定,家陣有進一步消息嘞,唔係小說,唔係畫集,亦唔係《九龍城寨3》,係出典藏版,即係重新輯錄原裝故事珍藏版。余兒仲喺面書透露話每期有接近300頁,求嘅係「重量感」,希望讀者拎上手感覺份量十足,而最最最最最重要嘅係,每期都會有劍僑親自繪畫從未曝光嘅番外短篇,即係有新稿睇囉,正呀老友,未睇過嘅必買,睇過如我者必定入手。唔好心急,依家睇住第一期封面草圖先喇。

Read more ›
小說/畫集/漫畫?《九龍城寨》大復活!
by / on 11/05/2016 at 9:45 pm

小說/畫集/漫畫?《九龍城寨》大復活!

唔多,真係得兩句咁大把啫,「創造館」阿頭余兒喺面書留言曰:「絕對係劍僑新稿!7月盛夏,《九龍城寨》大復活!」此言一出,人人都舉手讚好,仲估以乜嘢形式推出,有人估係《九龍城寨3》,有人估會推出畫集,有人估出小說。而余兒呢?並無交代進一步詳細資料,只係登咗兩幅司徒劍僑新稿畀大家止吓咳,一幅係陳洛軍,一幅係藍男。咁好吊癮啫,嗯……「7月盛夏」?撞啱書展檔期,我就估出小說嘞,唔知有無估錯呢?

Read more ›