打街霸唔一定要用手掣開電視嘅，正牌大富翁Monopoly推出咗《街霸》版本大富翁，裏面有六個金屬製嘅棋仔，包括有Vega個面罩、波動拳、春麗個護腕，至於M. Bison、阿隆同Blanka就人形現身。而其他特別之處就係遊戲裏面會有22個經典格鬥場地，起樓起酒店就變成買格鬥場、修練場地同道場。Amazon有得買，不過可惜已經賣晒，仲話唔知幾時返貨……

問心，咩生化危機呀、咩刺客教條呀，甚至係Metal Gear蛇仔呀，拍真人版電影，係，係有少少興奮，但都有少少理所當然。咁咩叫震撼呢？《俄羅斯方塊》拍真人版電影夠勁喇啩！《Tetris》喎！一隻冇故事，只得一班唔同形狀嘅方塊主角嘅遊戲，點搞呀？如果呢套嘢真係拍得成，我一定入戲院睇！應該都係3D版o架啦！BTW，貪食蛇改篇真人版電影我都唔會咁激動，起碼蛇係生物吖。

玩完《Sleeping Dogs》，唔好忘記仲有隻PS3獨佔嘅日本黑道遊戲《人中之龍 5（龍が如く5 夢、叶えし者）》！呢隻由SEGA推出嘅遊戲搞作多多，之前又選靚女又盛，o依家仲出埋拉麵！呢幾款由拉麵公司「宅麵」推出嘅主題拉面，會喺日本五家拉麵舖推出，仲搵咗好似黑社會嘅製作人名越同橫山試食，睇佢哋個樣，食到嬲嬲哋咁喎！睇嚟今集遊戲都唔少得去食拉麵嘅場面喇。

仲有唔夠半個月到東京遊戲展，遊戲公司開始宣佈自己今年嘅出展作品，不過點都唔夠CAPCOM實際 ─ 公佈展台派發禮品！大家都知，日本好興參觀或試玩完遊戲之後，會有禮品派發比玩家，今年CAPCOM嘅禮品好重手，有MH4袋、BIOHAZARD 6毛巾、逆轉裁判5鎖匙扣、LOST PLANET3 ID盒、Devil May Cry袋、街霸x鐵拳PS Vita包等等。可惜有一樣大家就算去到都攞唔倒，就係艾路貓嘅扇嘞，因為只限派發比小學生，噢！

我諗過o架喇，如果EVA要乘百力滋，應該將每一支百力滋都變成EVA嘅駕駛艙，咁我買一盒，咪可以扮好多次初號機，「索」一聲啖斷支駕駛艙……我發唔到達咪就係咁解囉……你睇百力滋佢，由9月11日開始至12月31日，就同《Evangelion新劇場版：Q》合作搞活動，雖然得特別包裝同送唔同款式掛飾，每個長闊高4cm×16cm×4cm，仲要抽喎！係冇乜誠意，但fans見到，咪又係買！

《幽白》玩具一向唔多，出得靚０既就更少！今日新返浦飯幽助190cm Figure，人間界學生服Look，仲要係早期形態綠衫仔，真係幾扯ｘ０下！仲可以玩著衫除衫，相當Old School０下！

老婆大人再三警告！唔准我落深水步行模型舖，點知一行落福利就中！HG同RG係同一比例、1/144，不過有無諗過連價錢都可以同步？RG正義$168、綠渣$145，大膽講句，好多真HG都做唔到囉！兩盒一齊買$299 ，我買了！！老婆話屋企已經無位擺，返到屋企話開定檯畀我砌……夫妻一場，唔使咁０丫！

Toyota嘅多啦A夢系列廣告又嚟喇！今次係名為「技安與技安妹的藝術之秋(ジャイアンジャイ子の芸術の秋)」篇，以下呢段片有埋中文字幕，不過就算冇，你都一定睇得明，就係技安終於出佢嘅超必「音波攻擊」，仲要喺扮佢細妹技蘭嘅前田敦子面前唱AKB48嘅歌！最後，大雄逃離現場，靜香出嚟同佢講，再冇車河遊的話，等唔到佢好耐……

開箱原文： 之前答應過大家收到部初音Walkman之後會整個開箱文，小弟今日(6日)中午已經收到，即刻同大家分享。

又係周年，又係25周年，講緊嘅係《街霸(Street Fighter)》。今次勁咯，潮咯，乘A Bathing Ape喎！仲有勁可愛嘅Milo o氹水仔喎！今年會一次過推出六款短袖Tee，最正係阿隆對猿人，又有八大角色大集合，仲有阿隆出波Milo鬼鬼鼠鼠匿喺後面……東京遊戲展率先發售！雖然我唔鍾意Bape，唔係好想同錢家樂撞衫，不過7,140日元一件，都有少少心郁。

美漫迷都應該知道，Marvel近日重整Marvel世界，而復仇者聯盟呢本旗艦漫畫就將會大量加入X-Men嘅人物。讀者Billy指正話11月倒完，呢本就係12月見街嘅新書！宣傳就見到角色嘅新造型，雖然封面只睇到14個角色(合共18人)……12月推出，由Jonathan Hickman製作。

《超速変形ジャイロゼッター》街機遊戲喺日本推出咗一排，勁在集合賽車同動作遊戲於一身，部賽車機身仲識變型！到戰鬥場面識伸出幾個操控桿嗰吓，真係以為自己揸緊變型機械人呀！動畫方面，日本就定咗10月2日會開播，以下有動畫預告、日本嘅實機試玩片等等片段，對呢個作品有興趣嘅入嚟咩都睇晒呀！

預定下年6月上映嘅《Kick-Ass 2: Balls to the Wall》，即係《勁揪俠》呀！除咗導演Jeff Wadlow外，Aaron Taylor-Johnson、Chloë Moretz、Christopher Mintz-Plasse同Nicolas Cage等主要角色都會繼續參演。導演更啱啱喺Twitter透露：「仲有六日就開拍，我哋終於搵到合適嘅Colonel！」當中有演員留言問到係邊位，導演雖然冇開名，但就透露佢曾經係《神探飛機頭》主角，第一集都好睇啦！今集有埋占基利，正呀喂！  

《TIGER & BUNNY The Beginning》劇場版將會喺9/22日喺日本上映，今次香港動畫迷都有福了，因為會同日本同步上映之外，仲有戲院直播日本嘅首映禮連劇場版播放，睇埋真人英雄、聲優現場現身！再嚟UNIOSN SQUARE GARDEN、NOVELS、Rihaw LIVE即席演繹多首《Tiger and Bunny: The Beginning劇團版》電影主題曲同插曲！下個星期9月11日開始賣飛，入落行事曆啦，即撲呀！

一句！鍾唔鍾意踩車？鍾唔鍾意Tiger & Bunny？係就唔使講０野！買啦！我覺得我係睇緊《漫畫狂戰記》０羅！價錢15,800日圓，唔計郵費千六度，OK啦！不過老實！如果俾我出，我會整埋個頭盔０羅！