又係呢位日本嘅神人「めーちっさい」(@meetissai)，最鍾意將動物meme實體化嘅佢，最近作品係呢隻喺電視前嘅主播貓，多咗隻人手，有手指架！

Very fine，林祥焜事先張揚，嚟緊會推出AV女優浜崎真緒雕像產品。啪啪啪啪啪，喂，唔好學嗰個民字頭區議員咁心邪，啪啪啪啪啪係掌聲嚟啫。好靚好高質，我講緊浜崎真緒真係好靚，我講緊張宣傳圖真係好高質。認同請廣傳。長棍，加油。

「螢點」有新作品推出了，張君豪創作嘅蛋散油占哥，落實推出實體Figure，家陣有「解剖」概念圖畀大家睇住先，棚哨牙好可愛呀喂。唔知幾高幾大賣幾多錢？上埋顏色效果又如何？我甚期待，支持，加油。

又係Bandai旗下嘅GASHAPON扭蛋，呢個等待中嘅動物系列嚟到第4彈，今次場地喺冰天雪地，一班動物包括北極熊、企鵝、海豹、雪橇、銀喉長尾山雀一齊放空發呆等待，好可愛。特別留意企鵝底部有隻小企鵝匿埋咗，預計下年1月推出，鍾意嘅記住留意返嘞。

日本嘅「錢湯」即係澡堂文化好深厚，冬天去浸個浴諗起都好爽，只可惜大家暫時都無得去旅行‥‥‥日本玩具公司「ケンエレファント」最近推出咗呢套「錢湯」迷你玩具，除咗有錢湯連富士山掛畫、大黑湯澡堂、按摩椅、體重計之外，仲有埋一堆沖涼小道具，例如沖涼嘅膠椅、水盤、花王番梘沖涼液等，全部都好迷你好懷舊，鍾意澡堂文化嘅一定好想儲。

Unbox Industries又再同伊藤潤二聯乘，今次繼續推出科學怪人Figure。搪膠製，頭、手、手腕及腳可轉動，皮膚顏色好有質感，肌肉紋好靚，我覺得最似係五官輪廓，咧嘴而笑瞪大眼睛睥住你，同漫畫有九成似。

DDED有新搞作，為電影《冥通銀行特約：翻生爭霸戰》推出宣傳品。一，可以自己摺嘅起格紙紮公仔，仲拍埋片教大家點摺添，大吉利是得嚟又好過癮，我都想要番個。二，保物袋，留意番，係「保」唔係「寶」，簡單嚟講即係一個Tote bag，設計到成個祭祖衣包咁，仲有黃色符咒封印添。都係買戲飛即送，送完即止咁喇。而為隆重其事，DDED仲推出網上雜誌添，不過屬創刊號連完結號一期完，封面極盡玩嘢之能事。係幾搞笑嘅，真心Mode，我笑咗，笑埋右。

日本人好重視浸浴，所以推出呢個動物扭蛋「ただいま入浴中でございます」都合理，有齊5款不同大細嘅動物，每隻浸嘅容器都唔同，仲有埋「入浴中」、「露天風呂」等嘅紙看板，設計上好有誠意。我最鍾意柴犬同埋海豹呢兩款，佢哋個樣好嘆，好想儲齊一套！11月推出，記住留意嘞。

日本扭蛋TAMA-KYU之前都出過大字型瞓覺動物，今次又有新嘢，就係「怕醜動物」系列扭蛋。一班動物包括貓、倉鼠、狐狸、兔仔同熊，全部都變晒怕醜仔，遮晒眼碌晒地超可愛，一式五款，今個月推出，鍾意嘅記住留意返呀。

呢個長假期，高達迷有必要去太古城一趟了，商場舉辦「Cityplaza x Bandai Spirits模型展」，焦點係為慶祝高達模型40週年而展出嘅3米高達半身像同全身像，咁梗唔少得搞埋間高達模型40週年期間限定店喇。㩒定錢先好去呀，實忍唔到手架，打卡，朝聖，買模型，確實係好節目來的。

日本雜誌《小學一年生》成日有好嘢送，最新11月號會送呢款多啦A夢道具「アンキパン」，係記憶麵包呀！個倒模可以印喺多士或者曲奇面，完成品就好似超經典嘅記憶麵包，好想買呀！

日本奇譚嘅扭蛋設計一向好有創意，最近呢款烏龜安全帽，就連唔係龜迷都想儲。龜殼變咗不同款式嘅安全帽，最正係啲手腳全部可以收埋入個「殼」，入嚟有片睇，預計一月發售，記住留意返。

仲記唔記得之前Twitter熱傳嘅呢隻「風中勁狗」？強風吹襲下都要散步，最近扭蛋公司stasto就造型師もんとみ合作，推出1式6款扭蛋，最搶眼一定係風中勁狗，其餘仲有拒否犬等等不同造型，下年1月推出，記住留意返。

有無人好鍾意手機遊戲《貓咪大作戰》？最近Bandai公佈下年1月會推出「にゃんこ大戦争キッズ2)」嘅食玩，一共14個款式，每款180円，全部都係銀白色造型，除咗基本嘅巨人貓、勇者貓、美腿貓之外，連罕見嘅銀貓、桃太郎貓、地藏貓都有，fans要儲。

外國呢個「Cosplaying Duck Collectible」系列專玩沖涼嘅黃色鴨仔，之前出過Metal Gear、Star Trek系列，最近作品係經典電影Back to the Future。有齊兩大主角博士Doc Brown同埋Marty McFly，博士一頭白髮加白袍，仲拎住個遙控器；拎住攝錄機嘅Marty McFly就著返佢套經典戰衣，可惜鴨仔無腳睇唔到佢最重點嗰對波鞋。每隻賣美金$13.99，預計10月推出，fans記住留意返。