《勇者鬥惡龍》系列最搶眼嘅點少得史萊姆，最近Square Enix出咗呢款超可愛嘅史萊姆地毯，今次揀咗敵人金屬史萊姆，所以變咗灰色更加襟污糟。放喺屋企好似一灘水咁散喺地，坐上去應該好舒服，仲可以墊個頭去史萊姆頭頂！官網有得賣，售價17,380円，有興趣可以入去睇吓。

嚟緊下個月，暴雪就會有Blizzcon 2019舉行，再之後就有《Diablo》新Art Book推出，不過當中就有人發現喺本Art Book嘅宣傳中提到「featuring more than 500 artwork from Diablo, Diablo II, Diablo III and Diablo IV」。照咁講，即係Blizzcon 2019會公佈《Diablo 4》啦？另外亦有消息指同時仲會公佈埋《Diablo 2 Remastered》。我知大家都未必會有興趣買同玩，我都係，不過得個知字囉。

之前見過CG圖你未必信，見埋相會唔會信多啲啲？PS5新機預定下年年尾上市，網上流傳就有PlayStation5開發機嘅相，真係之前咁V字形？不過放心，睇番PS4，開發機同真機推出時都好唔同。

下年2月13日發售嘅Nintendo Switch用《初音ミク Project DIVA MEGA39’s（メガミックス）》，啱啱有新片，睇吓今次拆開兩邊Joy-Con嘅操控方法，有番啲新意喎！

唔想將星戰當射擊咁玩，而係想用光劍同原力制敵，呢隻應該啱。11月15日喺PS4、Xbox One、PC推出嘅《《星球大戰 絕地：組織殞落》，由Respawn Entertainment開發，故事設定在《Star Wars Episode III: Revenge of the Sith》之後。外國好多傳媒已經有試玩片，睇完覺得好對路喎。雖然星戰喺我心目中已經完咗，但就算唔睇戲，打機冇問題吖。

如果你玩咗《勇者鬥惡龍 10 Online》7年都仲玩緊，咁嚟緊有新嘢喇，就係10月24日發售嘅《ドラゴンクエストX　いばらの巫女と滅びの神　オンライン》。不過呢個唔係重點，重點係個TVCM，個好可愛嘅女經理人，係永田凜，即係之前《初めて恋をした日に読む話》做深田恭子「春見順子」高中時期嗰位。

《大神》出極都有，但出極都未有續作，終於，監督神谷英樹拍片話想製作續作……係囉，唔好再乜版物版喇，出2啦。不過，其實佢早兩年已經話想……

正喎，嚟緊10月25日發售嘅《Call of Duty : Modern Warfare》，搵嚟出名鍾意打機嘅本田翼嚟拍日本版CM，呢條3分幾鐘片就睇埋幕後製作！遊戲會有PS4/Xbox One/PC。

暴雪Blizzard變「共雪」大家都知咩事啦？世界各地都有人反對呢間公司，所以，原本上星期公佈聽日會喺紐約NintendoNYC舉行嘅發售活動，本來會有聲優同機迷見面，最後就宣佈取消。任天堂喺Twitter宣佈嘅時候，就話：「We apologize for any inconvenience this may cause.」但就冇講原因。

懷念Iron Man，點都想試吓自己做Tony啩？PS VR呢隻《Marvel Iron Man VR》終於有發售日期，就係2020年2月28日，而且都公布埋早期購入特典，賣4,900円＋税。

打機睇戲梗係要飲嘢食嘢，呢個Bauhutte(バウヒュッテ)出嘅活動零食架「エナジーワゴン BHS-430EW」似乎幾啱用，430×310×655mm，13,500円。

初音今日有横浜公演「初音ミクシンフォニー」，喺活動中就可以買到呢個「ゲームカセット型モバイルバッテリー」，外表係超級任天堂盒帶，實際係流動充電器，容量8000mph。有好多初音迷買咗開箱，仲有人真係插入去超任度，得喎！最後提一提，下年喺Switch會有《初音ミク Project DIVA MEGA39’s》推出。

嚟緊10月17日就會發售，講緊係Switch版嘅《Witcher 3》，有人就將佢同之前嘅PS4版比較番。其實如果要玩PS4版嘅一早都玩完，未玩嘅又想買番Switch版嘅總有理由，畫質應該唔係太重要考慮啦？尤其拎上手玩。

日本颱風19號好強勁，噚日睇過死城一樣空無一人嘅秋葉原，今日Twitter熱傳有呢輯相，成個新宿人影都無隻，只係剩返霓虹燈，樓主話好有「異世界感」，有網民話勁似遊戲《龍如》入面嘅神室町，有人話諗起動漫《Gantz》，感覺好奇妙。

機場有得試玩Switch，咁小朋友當然去玩兩手啦，不過有網民就發現小朋友旁邊嗰位雖然都只係18歲，但就唔係一般後生仔，而係電競選手MkLeo！佢15歲就進入電競世界，喺今年8月嘅「任天堂明星大亂鬥」世界大會「Super Smash Con 2019」中優勝……咁到底佢旁邊嘅小朋友最後會點？命運會唔會從此改變？