今個星期都係HG當道, 黑色三連星版, 有砌過紅渣都知好有誠意, 所以絕對值得買! Reconguista in G都有新嘢返, 哎! 我唔知點形容, 呢個系列喺我心目中, 完全OUT出咗高達之系譜, 喜歡的可以繼續, 同麻煩閣下幫小弟進行再教育; 另外喺收銀櫃對出, 我發現咗一隻砌起非常正嘅坦克, 相信唔太多人留意, 值得望吓。

上個星期冇乜片到, 大家揀碟都應該幾辛苦, 今周好好多, 西人動作片有兩套, 分別係《皇家特工:間諜密令》同《黑海潛航：追擊20億》,最正係兩套都好夠份量! 《鄭秀文世界巡迴演唱會》都係話題, 話題點有二, 一係去碟非常勁, 全球首張杜比全景聲演唱會藍光, 真心要撐! 聽講好多碟舖都想補貨, 不過發行嗰邊已經冇晒貨, 如果市面上貨量賣晒, 就要等佢印第二批了, 第二點……我知fans們聽了會唔開心, 但sammi啲快歌真係比以前冇咁勁了, 希望係我隻耳仔聽錯啦!

泊車刮鈴呢家嘢, 真係好頭赤! 可能只係少少花, 不過個心硬係唔舒服; Indiegogo有件泊車利器推出, 佢叫SmartRim,只要將佢裝喺四條軚位, 佢就會透過超聲波訊號, 幫你檢測車軚邊有冇障礙物, 而且仲會即時透過手機App話你知, 同障礙物距離有幾遠; 不過電源幾麻煩, 每個Sensor要用一粒AA電, 使用時間大概泊到1,000次車。

其實人生真係好無奈! 新Macbook為咗偷輕偷薄, 所以全機只預留一個USB Type-C Port; 但現實係唔夠用喎! 所以好多人都要買個分線器, 幫佢接駁上唔同嘅邊配件, 但問題又嚟喇! 用新Macbook, 出街用時例必要帶多個仔……咁究竟係真心輕咗細咗, 定真心戇Q咗? 呢個問題, 我都唔識答!

KFC呢期感覺真係好IT, 雞肶手機殼/USB手指/Mouse、炸雞字粒大Keyboard、早幾個月爆炸哥已經話好想要……o依家又多一樣, 佢叫 KFC Tray Typer, 冇錯! 就係成日放喺個食物 Tray上面張廢紙, 依家變咗做藍牙Keyboard。呢個「Tray Typer」係德國KFC嘅推廣活動，可能山打士上校都明白, 啲炸雞咁油, 呢個時候揸部機上手, 即係找自己麻煩啫! 所以德國KFC竟然諗到出藍牙Keyboard盤墊，厚度只有0.4mm、而且行叉電設計, 撳on就可以同電話、平板Bluetooth連接, 有咗佢之後, 大家就可以繼續做鍵盤戰士喇，當然，要實行呢個計劃，首先大家都要自律，唔好諗住拎塊墊返屋企先……

麥田圈呢家嘢, 一般都係喺田度發生, 有人話佢係外星人搞出嚟, 亦有人話飲支藍妹都整到出嚟; 不過今次日本嗰邊離奇啲, 竟然喺冇田冇麥嘅海底度發現……似啫，據講係一種生物整出嚟嘅，唔通日本海真係有哥斯拉!?

有冇買或炒APPLE WATCH先? 個人嚟講, 真係非常唔睇好用佢嚟炒, 暫時大陸好多人接, 所以都幾好價, 但如果…… 總之成件事好被動, 小心損手啦! 至於用方面, 老實! 正常用、電量應該足夠, 但你如果鍾意周圍Show畀人睇, 應該玩半日就收工了! 外國有網有都發現呢個問題, 所以推出咗一款叫RESERVE STRAP嘅錶帶, 雖然睇樣比原廠錶帶醜樣好多, 不過佢有一個賣點, 就係錶帶內收藏有電池, 只要喺APPLE WATCH嘅「錶帶插口位」, 打開6-PIN PORT個檢查蓋, 佢就可以為手錶直接供電, 據稱電量可以增加125%, 暫時接受預訂當中, 有興趣可到下面網址昅昅。

日本人嘅暴力文化, 個人嚟講……真係好鍾意! 電影、漫畫都畀到我好大嘅發洩, 所現實生活中, 我仲可以做個正常人! 今次呢條頸鍊真係非常爆吓, 係鋸頸滲血頸鍊, 絕對係RPG中紫色稀有物品, 我感覺到佢股氣場非常強大, 戴佢出街, 隨時各項屬性都有+10嘅機率。

  呢個星期重點玩具, 都係RE GP04同RG 00 RASIER! RG都係一貫水準, RE GP04係不少人最愛, 不過開模都係RE粗線條嗰隻啦, 未至於全部左右夾, 而且機身分件都算OK合理, 但係刻線位就唔太精線, 如果想完美都有排執!

  RE GP04同RG 00 RASIER呢啲熱賣嘢, 今個星期精品呢邊一隻都冇少, 不過比較搶眼係隔籬小朋友舖嗰邊, 佢哋返咗大量妖怪手錶新貨, 公仔、朱古力機、牛咁大嘅手錶……同我最愛嘅微型扭蛋機!!! 同步到貨仲有微縮版扭蛋, 一SET 一SET賣, 而且做得非常仔細, 喜歡呢套卡通嘅, 真係見者即死!

  今個星期啲碟, 大部份都係二線片, 熱榜首係《親愛的》、《四非》同《解凍人生》, 不過個人最愛都係《賭神》, 佢都可算係發哥經典作, 裏面嘅經典對白, 可以話喺當年潮語嘅典範, 返印度食蕉、唔好意思大打咗少少、立體顯影眼鏡……最重要係復修版! 畫質唔講得美輪美奐, 不過咁舊嘅戲, 佢都已經做得好盡喇! 需知當年DVD版畫質差到好似VCD, 但今次BD版居然可以睇到畫面景深, 而且仲間唔中發現對焦位, 會走咗去主體側邊, $145我真係非常感恩喇!

紙紥嘢係中國傳統藝術, 拜神、祭祖, 簡直居家旅行必備良藥, 代表作如iPhone、iPad、MacBook Air, 甚至一定會到貨嘅Apple Watch, 由此看出「大陸」紙紥廠嘅高工藝、同向錢看能力! 不過日本有位B. B. Korry決定要挑機 ,不過佢真係幾強, 以針孔鏡頭原理, 做出咗呢部高仿DSLR嘅紙紥相機, 全程都有影相做紀錄, 由馬屎紙造底, 到機身包黑紙, 再加膠紙、加補鞋膠防漏光, 睇完我都有股衝動, 想郁手自己整返部!

  打字上網用電腦時, 你隻貓會跳上keyboard嘛!? 用Desktop機感受未必咁深, 但如果係Notebook, 咁係九死一生, 尤其是冬天! 以我經驗, 我覺得切忌開住文書軟件走入廁所, 因為我試過出嚟之後, 家中喵星人幫我打咗14大板鬼劃符, 相信就算交畀有幾十年經驗嘅校對老先生, 都冇法破解到當中文意!

妖怪手錶係今年BANDAI重點項目, 玩具、模型、景品、超合金出到唔停手, 今次就特別啲, 玩和菓子—食べマス 妖怪ウォッチ! 睇SAMPLE賣相真係可愛到冇朋友, 分別有ジバニャン、コマさん同ウィスパー, 而味道分別係蛋奶豆、牛奶豆同朱古力豆沙味, 預計會喺4月29至5月5日、好似話係兒童節限定咁話; 真心! 如果出到好似呢堆SAMPLE咁靚仔, 食佢落肚, 真係有種罪惡感, 如果你話好似其它肉包咁, 個樣變成妖怪多過似手錶, 食佢落肚, 我覺得係對自己最惡毒嘅懲罰囉! 不過估計和菓子有機會好樣啲, 起碼整好個樣後, 唔使再過火嘛! 應該會易控制啲。

早幾日睇完新聞透視, 原來香港樓價貴絕全球, 睇住法國回流嗰兩母女, 話為成萬蚊租過豆腐潤咁細單位而流淚……你都住過HOUSE屎、享受過人生吖! 我哋呢啲香港仔, 用流血不止嚟形容都仲得囉! 好喇! 鬼頭露營友好似都想話感受吓港式生活, 所以發明咗呢個TRILLIUM HAMMOCK, 玩三層人肉巨無霸式吊床, 4.4×4.4×4.4米, 閒閒哋可以住到6個人, 上面有六角形防水幕遮風擋兩, 最樓下一層仲可以放背囊雜物, 最正係天熱時可以齋用網, 等佢透風, 天冷時有防風防水墊, 感覺相當OK喎! 價錢都只係要250美金。