睇咗咁多年，原來橋本環奈都仲係22歲啫。早前佢就幫雜誌影封面，啱啱佢就喺Twitter出咗拍攝時嘅相，成熟嘅秋季造型，襯唔襯呀？不過其中一張見到對腳仔好開心……

除咗瘋狂上封面外，日本一Coserえなこ嚟緊9月21日就會推出寫真集《OFF COSTUME》發售。由中村和孝攝影，被形容為「本人史上最大の露出に挑戦」，啱啱有幾張相睇吓，星期五真係特別亢奮呀！

成日聽見朋友講，砌咗模型或買咗玩具冇位放。咁如果善用空間嚟玩，似乎又有得諗喎。好似佢咁，將條大廈外嘅樓梯放喺雪櫃旁邊，幾有型，如果加埋燈應該仲正。

Cosplay彈琴嘅Pan Piano，俾到音樂你陶冶性情，又有埋Cosplay，啲衫又靚，個Body又fit，咁到底佢搵到幾多錢？有日本網民就推算出嚟，訂閱人數264萬，啲片合共有3億幾Views，年收入高達3267萬円，即係230幾萬港幣，以獨立早幾日一日計，收8萬幾円，即係5000幾港幣，都幾開心。

講起鶴野剛士，除咗因為鍾意ウルトラマンダイナ嘅兒時回憶外，香港人更加要撐佢去撳個心啦！24年前今日，1997年9月6日就係《超人帝拿》開播之日，於是鶴野剛士都喺Twitter出文出圖，記念呢個重要時刻，當中有佢儲落嘅戲服、劇本、玩具，仲有極珍貴嘅照片，連佢拍攝前接受特訓嘅照片都有！

一睇個片頭都諗起咸蛋超人啦？成個feel都好正！原來賣嘅係喺下星期9月13日推出嘅混合口味杯麵……

有冇買番部再版金田電單車？依家個價跌到最平見到$2500左右，真係心動嘅，加上個Figure又出埋喇……如果你兩樣都有，可以參考吓呢位日本高手，佢製作咗一段Stop Motion影片，當中仲有經典鏡頭！而且最正係製作Making嘅影片，原來啲音效都係自己製作埋，好正！至於段片，金田咁趕原來係因為要去……

又嚟模具，今次係《呪術廻戦》「宿儺の指」，咁可以整朱古力變成朱古力手指之外，仲可以整冰放飲品都得。呢個「呪術廻戦 宿儺の指のチョコレート型」，3780円，預定2022年1月出貨。

KOJIMA PRODUCTIONS自己本身都有出衫，不過就冇今次同GU合作嘅咁抵著喇。9月27日喺日本GU發售，2290円至3990円，件白色衛衣幾靚吖。不過呢啲衫嚟講，我都係諗起希哥件白背心，你的樣子如何啦……

之前有人用AI幫《Slam Dunk》嚟變真人版，效果都好唔錯，咁如果係《Street Fighter》呢？春麗同某啲女角都靚呀，不過有啲真係出事，好笑嘅，勁過《超級學校霸王》嘅……

唔開心嘅時候，睇吓家中小動物由細到大嘅成長照，都治癒到嘅。呢位日本貓奴就出咗10年前喺雨中同貓貓偶遇嘅相，再相比番依家貓貓又肥又可愛嘅相，睇見都覺得好有愛，之後仲引嚟其他貓奴出圖添，大家有冇呀？

雖然日本的確有好多雜誌，但不停上封面都真係幾勁。日本一Coser「えなこ」上月上咗合共15個封面，啱啱佢又出新圖，呢啲係咪叫馬甲線？

都明明哋嘅，有時啲嘢又真係幾無奈。話說有一間開喺中野ブロードウェイ嘅Vintage女性服裝、手造飾物店「Spank!」，有唔少十幾二十歲少女幫襯，有時又有一家大細嚟，店主返工有時都會帶埋個4歲仔，但喺今個月，對面就開咗間「まんだらけ」成人DVD店，咁店面就梗係好多姿多彩，又有唔少封面都係年輕女生……但呢個時候就尷尬喇，服裝店主於是就喺Twitter出文訴苦，話可能要關店轉專心網上賣嘢…..而呢個Tweet，仲有「碇真嗣」聲優緒方恵美分享，原來店主係佢朋友，佢都問大家點睇？

同之前嘅原創劇情系列唔同，Reboot嘅《Resident Evil: Welcome to Raccoon City》電影劇本會接近遊戲原著，啱啱有劇照曝光，見到Raccoon警署，導演、劇本係Johannes Roberts，據講電影會以遊戲首兩個作品為基本改編。不過上網查番演員陣容，Jill Valentine演員係Hannah John-Kamen……嗱我冇講咩呀，不過係覺得同原著幾大差距啫，膚色都唔同……而演Claire Redfield嘅Kaya Scodelario，之前演過《移動迷宮》，比較正路，但再嚟Leon S. Kennedy嘅Avan Jogia，唔係話佢唔靚仔，但係Leon喎，基本上係碧咸嚟喎……

年紀有番咁上下，開始記得遠嘅嘢，唔記得近嘅嘢，於是你同我都記得《飄零燕》OP入面，海迪喺山之間好離奇地打韆鞦飛嚟飛去一幕。喺現實中，如果有呢類韆鞦又會係點呢？以下真人示範。