之前日本都有位「空箱職人」，專用啲零食包裝製作唔同紙模型。不過今次唔係佢，而呢位高手就用咗一個麥記套餐嚟整咗隻馬沙！但係有咁多黃色咩……？

玩《動物森友會》，睇吓其他玩家嘅作品都係幾個嘅節目，好似呢位日本玩家咁，佢就整咗間英式酒吧，當然佢啲酒樽背景都係有提供俾大家嘅。

之前日本各地地標都因為疫情變咗色，例如大阪太陽之塔、通天閣都係紅色警戒狀態。不過隨住東京解除緊急狀態，彩虹橋同東京都都廳都用咗彩虹色，萬一每日新增感染者多過50人先會轉番紅色。其中7點到8點會亮起藍色，對醫護人員表示感謝！希望快啲好番晒，大家可以去日本玩啦。

如果你鍾意玩《牧場物語》、《閃乱カグラ》，咁就要留意番喇,因為騰訊將透過附屬公司香港Image Frame Investment以約5億元收購日本遊戲開發商Marvelous約20%股權，成為最大股東。其實之前兩間公司都已經宣佈合作製作電話遊戲《牧場物語OL》，估唔到依家仲……咦？咁大陸機迷會唔會多番少少遊戲玩咁呢？

似乎好多人都鍾意喺《動物森友會》入面加入吉卜力元素，今次呢位日本玩家嘅「千と千尋の神隠しinあつ森」系列已經去到Part 10，有「湯婆婆」，又有「鍋爐爺爺」嘅工作間！

咁嘅天氣，講起燒烤都覺得熱，不過如果喺日本又唔同。呢位網民就發現自己爺爺燒烤時個動作有啲熟口面，之後搵到幅圖拼一拼，原來自己係《One Piece》「路飛」個孫呀！之後當然被網民改圖啦！

GameoverHK網店 https://shop.gameover.com.hk/

筍工喎，話說有網民留意到日本SIE請人，6月3日前接受申請，工作就係測試系統同埋遊戲，其中測試系統嘅仲唔駛經驗都得，只要對遊戲業界有興趣。雖然只係part time工作，但似乎可以率先玩到PS5，都幾吸引。

近日有「sailormoonredraw」熱潮，而呢位喺日本發展嘅鬍鬚女Ladybeard都有玩埋一份，不過佢就唔係用畫嚟參與，而係玩Cos……講開講埋，近日佢都鍾意玩唔同人物、角色嘅髮型，都值得一睇。

疫情緩和，不過都要保持警覺，咁好多人排排坐玩嘅日本柏青哥店可以有咩對策？打麻雀又可以點？只要夠爛賭，仲有方法……

《Evangelion》新劇場版最終作本下個月就有得睇，不過因為疫情延期啦。咁監督庵野秀明呢，噚日5月22日就係60歲生日，佢仲著咗件Tee扮超人，係咪已經開工製作《真‧Ultraman》喇？佢仲話雖然已經60歲但依然會努力，支持，生日快樂。

近排成日叫外賣，見到個名嘅配色，有冇諗起Uber Eat，不過呢個叫「Vber Macho」。試諗吓，如果每次送外賣嚟你門口嘅都係一班肌肉男會點？唔好意思，前設係先試諗吓你係好鍾意肌肉或者好鍾意男人。喺日本名古屋，就因為一間壽司店嘅老闆同時有搞健身室，於是就創立咗呢個服務喇！  

屋企有養貓嘅，都知道就咁放個杯喺枱面係幾咁危險嘅事情。於是，呢位日本漫畫家蛇蔵就喺100円店買咗個木盒再加工，以為咁就萬無一失啦？

好多人包括我都好鍾意著動漫Tee，但如果可以著動漫Tee又著得唔毒你話幾好？呢位日本隱性宅仔就試過著《JoJo奇妙冒險》嘅Tee，咁本身JoJo啲嘢個樣都唔太毒，可能因為咁，有唔識JoJo嘅人就讚佢件Tee好靚喎，咩牌子呀？

日本好多羊毛氈高手，呢位不時都喺Twitter上載自己作品相片，早前就有《寄生獸》「米奇」啦，再早啲又有《鬼滅之刃》，啱啱呢個仲正，係《Hunter x Hunter》「基路亞」阿哥「イルミ ゾルディック」，記唔記得佢曾經用針拮呢個造型出場，所以今次用嚟拮大頭針，無違和又極實用。