Articles by: 尉遲一

Ric Tse《樂高迷你劇場x香港美食》 Lego人仔訓餅乾擔架床
by / on 18/04/2018 at 7:45 pm

Ric Tse《樂高迷你劇場x香港美食》 Lego人仔訓餅乾擔架床

是日推介「Legography」,即係利用Lego擺場景影靚相,Ric Tse本畫集《樂高迷你劇場x香港美食》就係圍繞呢個主題嘞。佢喺面書登咗幾張相,全部都好正,絕對係睇到人嘩嘩聲之作。當雞尾包變潛艇、蛋花大菜糕變溜冰場、餅乾變擔架床、鹽焗鵪鶉蛋變異形蛋、香腸變木筏等香港美食,配搭唔同表情同肢體動作嘅Lego Minifigure,效果竟出奇地有趣。呢本畫集,我想擁有。

Read more ›

海仔《萬能鉸剪》限量版 送親筆畫$50
by / on 18/04/2018 at 7:03 pm

海仔《萬能鉸剪》限量版 送親筆畫$50

報告,《漫畫Buddy》主筆之一嘅海仔,有本個人作品《萬能鉸剪》,有簡介云:「創作《萬能鉸剪》主要是寫給成年人看的童真漫畫,希望睇過《萬能鉸剪》的成年人能有共鳴,甚至推介給自己的小朋友!」有無共鳴,睇完就知,普通版$22,限量版送親筆油彩畫板一塊,售$50。本地創作有誠意在,支持吓啦喂。

Read more ›
邱福龍復刻元祖版《鐵將縱橫》 港漫迷開心到癲
by / on 18/04/2018 at 2:51 pm

邱福龍復刻元祖版《鐵將縱橫》 港漫迷開心到癲

好消息,邱福龍決定復刻《鐵將縱橫》,留意番,係三十年舊著嗰套元祖版,佢喺面書留言話只出自己編寫部份,清兒接手嗰Part無份:「原汁原味另加新封面,舊封面也會出,一本書有新舊封面」云云,仲登埋兩幅新創作草圖封面畀大家睇睇添。留言一出,港漫迷齊聲讚好,Stanley Yim咁話:「咪就係經典足廿幾三十年囉!龍哥!」、Wing Fung Wong又咁話:「新舊鐵縱橫對比,見證龍哥三十多年後的畫功精進不少。」、Ka Ka Chan咁話:「睇返舊,都應該幾過癮。」係,真係好過癮,呢單News,令我好興奮。

Read more ›
【有片】門小雷手繪電影系列  古天樂《尋秦記》+《殺破狼‧貪狼》
by / on 17/04/2018 at 8:52 pm

【有片】門小雷手繪電影系列 古天樂《尋秦記》+《殺破狼‧貪狼》

都唔記得嚟到第幾彈喇,總之就彈彈都咁正喇,門小雷聯乘FoolClub嘅手繪經典電影系列畫,今次畫新鮮出爐嘅金像獎最佳男主角古天樂。畫作裡面仲有兩個影帝添,左面係《尋秦記》,右面係《殺破狼.貪狼》,神髓出晒嚟。

Read more ›
買嚟儲 《第37屆香港電影金像獎特刊》$98
by / on 17/04/2018 at 6:30 pm

買嚟儲 《第37屆香港電影金像獎特刊》$98

香港電影金像獎曲終人散,古天樂封王,毛舜筠封后,唔知大家滿唔滿意賽果?我就無乜意見,杜汶澤講得啱,始終係小圈子選舉,好好Enjoy個Party咪算囉。而作為普通市民,如果想繼續Enjoy的話,可以買本《第37屆香港電影金像獎特刊》儲吓喎,個封面委實好靚,每本$98,齋買封面都抵,「至Goal Club」有售。

Read more ›
余兒完全版《那年五月他和她遇上了》 書展見街
by / on 17/04/2018 at 9:45 am

余兒完全版《那年五月他和她遇上了》 書展見街

利申,認識余兒全因《九龍城寨》,跟住嘅《今晚打喪屍》就更加Like,黑社會與喪屍呢兩瓣,就係我認識余兒之全部。之所以當知道佢N年前原來寫過本《那年五月他和她遇上了》,我當堂打咗個突。喂?愛情小說呢瓣都寫得掂?呢本小說將會推出完全版,余兒話:「內文完全版內文超過50%修改,比2010年版更感人更精彩更細膩。」嗯,我真心想知佢寫成點,7月書展檔期出版,必撐。

Read more ›

葉明發x阿傑多《天戰.幻戰.超擊戰》係乜?
by / on 17/04/2018 at 9:00 am

葉明發x阿傑多《天戰.幻戰.超擊戰》係乜?

好一句「Coming soon」,真係好吊人胃口呀,講嘅係葉明發面書留言:「天戰.幻戰.超擊戰——IPMINGFATxAGITO 2018」,係得咁多個字架咋,葉明發聯乘阿傑多,究竟會出啲乜書呢?港漫已經買少見少,純個人意願,不過我相信都係好多港漫迷心聲,最好就出廿蚊薄裝啦,仲希望係長篇咁隻。拭目以待,加油呀。

Read more ›
《暗黑指紋》第二期不日出版 搞簽名會同首賣日
by / on 16/04/2018 at 10:21 pm

《暗黑指紋》第二期不日出版 搞簽名會同首賣日

係開心嘅,係好值得畀啲掌聲嘅,本地創作從來唔係易事,有創刊號已經難,出到第二期,難上加難。《暗黑指紋》鐵定會出第二期,仲打算開簽名會加首賣日添。日期定喺4月29日,時間地點未知。我呢,買就買梗架喇,不過畢竟相距創號刊已經好一段時間,要翻睇番,先接得番故事講乜。Anyway,請大家多多支持。

Read more ›
《火武耀揚》巨咪三頁高三吋 佳哥復出歸邊赤柱同盟
by / on 16/04/2018 at 9:49 pm

《火武耀揚》巨咪三頁高三吋 佳哥復出歸邊赤柱同盟

《火武耀揚》呢幾期劇情都好緊湊吓,隨住林國魂迫到一哥要放重犯出監,華興會同赤柱同盟啲大佬輩正式交鋒。不過可能連邱瑞新都緊張過頭,搞到今期第964期旁白出錯呀喂。第六頁第一格寫「六尺三寸巨霸身軀,力貫精鋼──橫掃千軍!」第九頁第一格卻寫「巨咪六尺六寸,比自己還要高大健碩的怪獸,連巨咪也震驚!」三頁之間,巨咪竟然高咗六吋?哈哈,當然係手民之誤喇,下次要小心啲喇。另,埋尾都有個高潮位,赤柱同盟有個光頭佬出場,無記錯的話,應該係以前拜鐵紅門下嘅光頭幫一員,叫佳哥,但衰乜入冊呢,我就真係唔記得咗咯。

Read more ›
恭喜晒!《新著龍虎門》金神魔君+極樂魔僧死得好!
by / on 16/04/2018 at 9:17 pm

恭喜晒!《新著龍虎門》金神魔君+極樂魔僧死得好!

忙,搞到今日先有時間睇上個禮拜啲公仔書,睇完今期第935期《新著龍虎門》,大有如釋重負之感,噓,好咯,隨住宇一航散功兼爆湧飛昇係騙局,啲乜乜飛仙物物元嬰睇怕都可以告一段落。慘只慘在兩個獵神者金神魔君同極樂魔僧,初初出場係威係勢,家陣一個俾易天行求其一爪爆頭,另一個做磨心俾白仇同易天行轟成肉醬。不過死得絕對好呀,佢兩個唔死,啲甚麼天羅呀地網呀山崩呀海嘯呀都唔知幾時完,舊著《龍虎門》一玩到老祖宗飛昇即失控,真係唔想新著都重蹈覆轍。真心的,希望偉大的編劇可以認真度番啲在地啲橋,唔好再玩長生不老、成仙成佛呢啲睇到人硬嘅劇情,乜硬?拳頭硬呀。

Read more ›
書迷聚會 傾伊藤潤二恐怖漫畫經
by / on 11/04/2018 at 10:00 pm

書迷聚會 傾伊藤潤二恐怖漫畫經

面書專頁「伊藤潤二香港書迷會」搞午間聚會呀,到時「有好多精彩活動,包括TV未放送OVA放映同抽獎環節等」咁話喎;日期定咗,係5月20日,費用就未定,話「只收成本價」喎。大家有無時間傾吓恐怖漫畫經?交流吓識多個朋友仔都無壞嘅。

Read more ›

江記《離騷幻覺‧刺秦篇》荊軻變歌奴匕首變錄音帶?
by / on 11/04/2018 at 9:15 pm

江記《離騷幻覺‧刺秦篇》荊軻變歌奴匕首變錄音帶?

呢兩日,江記為宣傳《離騷幻覺》接受咗好多唔同媒體訪問,證明大家都好關心呢套本土動畫創作,而最新嘅前導片《離騷幻覺‧刺秦篇》都剛剛有得睇嘞。好老實,畫面係正嘅,顏色同音效會好轟爆你腦袋,保證你留下深刻印象,不過可能因為無字幕,所以Cult就夠Cult嘞,但唔係好睇得明講乜。好彩,條片有埋簡介,如下「生與死,人與機械不分,如此一個混頓的世界裡,渴望擁有靈魂,會有甚麼代價?秦皇掌握永生科技,大地就在腳下,六國遺臣派出象徵死亡的刺客『歌奴』,手握命運的錄音帶,誓要終結不死傳說!」Wow,荊軻變歌奴,匕首變錄音帶,如此這般嘅刺秦行動,好似好吸引咁喎。Kickstarter眾籌在即,大家課金喇。

Read more ›
Felix Ip聯乘余兒 D2 Place講喪屍
by / on 11/04/2018 at 8:45 pm

Felix Ip聯乘余兒 D2 Place講喪屍

喺D2 Place舉行嘅「Toys Collector Market玩具收藏家販售展」,好似好多瓣數咁喎,有甚麼少女玩具專區喇,又有甚麼馬莎x沙生Gundam cosplay喇,又有珍藏玩具展喇,到時玩具原型師太歲又會接受訪問喇……講到訪問,我最Care嘅當然係余兒聯乘Felix Ip嘅「今晚講喪屍」環節,屆時兩人會大談創作喪屍題材之路,撐開《今晚打喪屍》同《香港感染‧旺角站》嘅我,一定會去捧場。

Read more ›
網圖分享:上官小洪的港足新畫速遞
by / on 11/04/2018 at 8:16 pm

網圖分享:上官小洪的港足新畫速遞

出賣年齡系列到,上官小洪推出「新畫速遞」,主題係六七八十年代香港足球員,暫時只推出咗尹志強、胡國雄、仇志強、林尚義、郭家明同張子岱。嗯,除咗仇志強之外,其他五人我全部都識,死喇,我係咪好老呀?

Read more ›
Exam Sum出大橋小橋膠板座 自娛咁話喎
by / on 04/04/2018 at 9:00 pm

Exam Sum出大橋小橋膠板座 自娛咁話喎

一向有留意Exam Sum面書,因為好鍾意佢為珠江橋牌創作嘅動漫廚娘小橋,早幾日佢出Post出圖話「動畫,廚娘小橋就快動起來了」,但早幾日係4月1日愚人節,斷估即係講笑喇。Fine,到今日4月4日兒童節,佢又整咗對大橋小橋立體人形膠板座,話純粹自娛喎。呢次唔係動起來,係真真正正豎起來了,有網友見到,即時勸佢出番一模一樣嘅精品,我贊成呀。

Read more ›