劉萬梁師傅嘅「香港雙節棍總會」2019年招收會員，無論新加入抑或舊續會，都會送崔成安賀年利是封兩包，每包有10個利是封。而成為會員之後呢，更可以每包$20購買。好靚呀個利是封，有人送畀我就好咯。

頂住呀，今日係周四，返埋聽日工就可以放假喇。知你家陣悶悶哋，兼口擘擘，不如睇吓Coser醒醒神。呢位中國Coser叫賢兒Sherry，好火辣，幅幅相都有種逼爆Mon感覺，睇完相，我有啲Hot。

無聊瀏覽面書，驚覺袁家寶2019年做咗老闆，而所謂做老闆者，開網店割愛私人港漫珍藏是也。佢留言話「自己珍藏40年海量正版港漫」，既稱「海量」，即係大把貨啦。望相，珍藏反晒光包晒膠，袁家寶話有九成新，保證原裝正版，又謂「金報生報青報漫畫王乜都有」，睇嚟真係一個等住大家發掘嘅大寶藏。有興趣嘅，可以PM佢真接Deal，祝生意興隆呀喂。

「暗黑指紋」2019年第一砲，係聯乘扎染品牌「Physiojam」推出潮Tee，有紅黑同啡黑兩色選擇，Tee前面有指紋Logo，背面有「暗黑指紋」字樣。留意番，由於係逐件扎染，所以每件Tee都獨一無二，同埋經洗水處理，會有種淡淡古著味。講真望落都OK型，絕對可以著出街，每件$480，買Print買手藝，唔敢講話好抵，但合理。

留意番，今年Cuson係會繼續推出利是封嘅，圖案當然有怪叔叔本尊，同緊隻肥肥白白巨豬大覺訓中。大覺訓無嘢煩乜都唔使理，相信都係你我他2019年嘅共同願望，希望願望達成喇。每套20個$50，有興趣可以PM佢。

Good呀，「至Goal Club」秉承優良傳統，今年繼續派年曆卡，而年曆卡亦繼續搵甘小文賜圖印製，美少女戰士版肥婆四加哨牙珍賀2019年，醒神喇喂。一如以往，免費派發，咁當然，有幫襯的話成件事會更圓滿喇。

「鐵寶奇盒」推出嘅TinBot有得玩有得砌，係幾過癮嘅，我都買咗「老夫子」同「綠寶」呢兩款；而嚟緊，我打算買第三個「Golden Waffle」。照字面直譯，即係「黃金窩夫」，睇埋相，原來係疑似黃金俠聯乘格仔餅加雞仔蛋造型，配件有鐵Pan同一底已完成雞蛋仔，好鬼趣緻。黃金窩夫將會喺「Hong Kong Culture Exhibition」展出，展場叫「Streams Gallery」，同場仲有大把涉及香港文化嘅各類展品，大家有時間的話，不妨撐撐場。

之前報導話鄭健和乘住推新書《三國誌異》個勢，搞一葉賓館Fans Club，家陣會員證有辦睇喇。會員證都做得幾有心思，成條賓館房間鎖匙咁款，仲有大大個封先生Logo添。

呢本要買呀，我一定買呀，港漫2019年第一個重頭砲《司徒劍僑畫集》開訂呀喂！嚴選司徒劍僑入行35年以來十幾套作品，用今日畫風重新演繹一次，另加未曝光畫作，再送多張八仙道3D立體畫，每本$300，留意番，限量400本，要搶架。未講完，更更更重頭砲嘅有尊貴手繪版《司徒劍僑畫集》，附邱福龍聯乘司徒劍僑聯手繪畫印刷畫板一幅，每本有獨立編號，盛惠$2888，限畫35本，更加要搶。

家陣香港天氣仲係陰陰凍，極需要睇番啲Hot嘢暖暖身，DJ Soda幫到你。話說佢呢幾日去咗峇里Ayana嘅Kubu Beach Club，陽光海灘下戲水，大Sell激突身材，有相有片大家可以慢慢睇。人靚Body正，連食薯片都Sexy過人，好難唔畀個Like佢。

好明顯係大愛呀，日本畫師「ガンダム百景」真係好愛Gundam，鍾意到喪畫「高達之日常」。喺佢筆下，高達完全擬人化，會失戀、要做地盤工、會去旅行、會變成高高達一等嘅Celebity、要上堂、會凌霸、要行山劈柴、會踩單車、會犯罪坐監等等等等。畫作係幾過癮嘅，我貪心啲，如果有埋Bubble對白，成幅畫有Message帶到出嚟，會更好。

有無八達通迷喺呢度？嚟緊係農曆豬年，推出豬年大吉珍藏版八達通又好順理成章嘞，卡面印有0001至2000嘅發卡編號，即係話限量2000套囉，要搶架。點搶？1月9日7:00pm起港鐵沿線7仔有售，每套$288，報告完畢。

今日有請中國Coser「鬼畜瑤在不在」出場，顏值咁高，無嘢好講啦；事業心咁重，都無嘢好講喇；咁既然都無嘢好講咯，不如唔好嘥時間，直接睇相啦。Wow，家陣天氣仲係凍，但睇完相，我開始Feel到有少少Hot。

終於睇齊喇，今期第271期復刻《龍虎門》出咗個啟事，話將會由第275期開始加價至$20。區區三大元，相信大家都唔會Care，反而大家關心嘅係，究竟會復刻到幾時？「創造館」亦畀埋答案──「會繼續出版，最理想是出版至566期，亦即是王小虎手刃火雲邪神的最後一期為止」，咁就好咯，數手指仲有差唔多300期，亦即係仲有6年睇，安樂晒。

畢竟係三日刊，係有啲拖橋架嘞，但牛佬係好嘢嘅，喺適當時候抽水，再加一個估你唔到嘅三百六十度扭上扭上扭橋，成本公仔書即刻生猛番晒，追看性大大提高。今期第2197期《古惑仔》，我幾鍾意「洪興」白紙扇陳耀戙出嚟主持公道一幕，佢認為投票選老頂應該嚴肅處理，程序要均真，話：「最起碼，唔應該學似我哋特區選特首咁樣亂咁嚟，係咪咁講呀？」直頭係咁講喇，唔知「好打得」同一班高官睇完有無感想呢？又，最尾一格，十三妹居然調轉槍頭投陳浩南一票，激到韓賓死死吓，呢下真係估牛佬唔到，唔通十三妹、陳耀同陳浩南老早串通埋？為免被臥底浩然指證，夾硬扯韓賓下馬，由南哥一個人頂晒？