Articles by: 尉遲一

點解嘅?石黑龍罩門點解喺大髀內側?
by / on 22/06/2018 at 9:19 pm

點解嘅?石黑龍罩門點解喺大髀內側?

今期第945期《新著龍虎門》睇到我呆咗,石黑龍俾圍攻苦苦捱打,本來劇情係幾緊湊嘅,但膠在金鐘罩十一關原來可以流成咁,齋俾人睥兩眼都會暴露罩門所在。Fine,一個升Level軒轅神道經,一個升Level盤古魔道經,就當鐵五郎同蚩尤有X光眼,功力高到可以Scan到罩門所在,但點解罩門唔係「咽喉穴」而係甚麼「箕門穴」?喂,睇咗幾十年《龍虎門》,石黑龍罩門不嬲都係喺喉嚨,幾時去咗大髀內側?另,石黑龍一時話「要報仇就要把命留住」,諗住逃走;一時又話「我石黑龍就是不怕死」,諗住拼命,但拼命前又可以好得閒地浪費功力清場,費事令途人糟殃,前後不過幾頁啫,點解可以咁精神分裂架?

Read more ›

撐!帽子君阿堪網上條漫《給我記住香港》!
by / on 21/06/2018 at 9:56 pm

撐!帽子君阿堪網上條漫《給我記住香港》!

言簡意賅,內容簡介有云:「名字正被清洗;身分正被忘記,不久的將來,你還會記得這個地方嗎?」再睇埋漫畫名字云:《給我記住香港》,我諗大家都估到帽子君阿堪呢套作品大概講乜,雖則唔明點解同足球有關係。留意番,《給我記住香港》非實體書,係每周更新嘅網上條漫,喺PassionPrime網上平台連載,畀月費就有得睇。講咗一千次都要講,唔想港漫沒落,請多多課金,請多多支持本地創作。

Read more ›
鄺志德再報料 2018書展玉皇朝出《玉郎傳》
by / on 21/06/2018 at 9:35 pm

鄺志德再報料 2018書展玉皇朝出《玉郎傳》

書展將至,玉皇朝開始出招喇,鄺志德繼續喺面書報料,話今年玉皇朝打算推出《玉郎傳》,雖然封面未有得睇,但洋洋灑灑三幾百字有埋內容簡介。由60年代初涉畫壇開始,一路講到2018年動畫《神兵小將2》載譽重臨、玉郎巨星文化創意園正式動工等等,但好可惜,「有關多姿多彩的感情生活,原來是一個美麗的誤會。」噢!我最想睇嗰Part無影添。Anyway,黃玉郎一生咁多姿多彩,呢本文字書寫得越長越好,我期待嘅係一本厚厚磚頭書,無乜插圖都無所謂,最緊要多料爆。

Read more ›
鄺志德報料 玉皇朝出《龍神》完全版
by / on 20/06/2018 at 9:34 pm

鄺志德報料 玉皇朝出《龍神》完全版

鄺志德剛剛喺面書報料,玉皇朝將會喺2018動漫節推出邱福龍名作《龍神》完全版,上下兩冊,封面、內文、人設全輯錄,硬皮封面有埋皮盒收藏,每套附獨立編號,限500套。佢喺面書登咗幾幅內文稿相,依家隔住個Mon睇番,真係一啲都唔覺得Out,依舊靚到啪啪聲,如果唔太貴的話,絕對值得入手。

Read more ›
三上悠亞著日本波衫 晒長腿撐日本隊
by / on 19/06/2018 at 10:09 pm

三上悠亞著日本波衫 晒長腿撐日本隊

開心呀,世界盃日本隊旗開得勝,二比一勝晨早踢少一個嘅哥倫比亞,三分穩袋。班日本兵咁勁,唔知同三上悠亞有無關呢?佢喺Twitter登咗張著日本隊波衫嘅相,幫自己國家打氣,紮孖辮個Look真係好可愛,兩條長腿就更加誇啦啦。日本隊好嘢!三上悠亞好好嘢!

Read more ›
「獅子山羊」Tee不日推出
by / on 19/06/2018 at 9:45 pm

「獅子山羊」Tee不日推出

「獅子山羊」有精品就……快推出,Tee是也,阿傑多話暫時只印起小量,只會留俾自己同葉明發個女,如果質素無大問題就會正式量產同開訂。大家唔好心急,面相登咗相,有辦你睇可以止住咳先。我就覺得幾正嘞,個圖案好適合黑色Tee,唔知到時賣幾錢呢?

Read more ›

網圖分享:「盧渣古」踢比利時隊超勁
by / on 19/06/2018 at 9:17 pm

網圖分享:「盧渣古」踢比利時隊超勁

明明係同一個人,點解曼聯嘅盧卡古同比利時嘅盧卡古爭咁遠嘅?踢曼聯就成日失機,擒日對巴拿馬就好醒地梅開二度。為此,面書專頁「McDog麥狗體育台」即刻出惡搞圖,以盧渣古明寸呢個比利時國腳,但見佢一腳伸走高達,都不知幾威猛,好勁呀。

Read more ›
雙一+富江現身手機殼 伊藤潤二Fans留意
by / on 18/06/2018 at 8:15 pm

雙一+富江現身手機殼 伊藤潤二Fans留意

伊藤潤二Fans留意,澳門手機殼品牌Flame Macau推出四款手機殼,分別係「至死不渝的愛」、「雙一恣意的詛咒」、「富江」同「魔之斷片」,iPhone 7/8、iPhone 7+/8+同iPhone X適用,各限量100個。望過吓相,圖案同色水都唔錯,俾我揀會揀雙一嗰款,無他,我Like雙一嘅恐怖邪惡表情。

Read more ›
張君豪爛口乖x港漫系列畫板 爆粗都可以好過癮
by / on 18/06/2018 at 7:00 pm

張君豪爛口乖x港漫系列畫板 爆粗都可以好過癮

張君豪剛剛成立個人品牌「爛口乖」,品牌名好正,讀出嚟夠響,嗒落有玩味,「爛口」即係成日講粗口喇,但又好「乖」喎,係咪盞鬼先?爛口乖X港漫系列畫板都好過癮,甚麼「海虎!詐糊!」、「睇過小流氓,唔慌係好人」、「山雞浩南古惑仔,宜家市道無晒計」、「絕世無雙,飲西瓜霜」等等,爆粗爆得咁過癮,睇完應該會發出會心微笑,如果你係真心鍾意港漫的話。

Read more ›
Blackbrick Toys出張家輝1比6 Figure 每個$780
by / on 18/06/2018 at 5:26 pm

Blackbrick Toys出張家輝1比6 Figure 每個$780

Blackbrick Toys推出1比6張家輝Figure,西裝造型,有把槍有個酒樽揸吓。比例OK嘅,無話夾硬將手腳拉長,五官表情都尚算OK喇,唔算超級像真,但肯肯定一眼就認得出係邊個。不過純個人喜好,我就略嫌件老西唔多夠貼身,同埋膚色好似黑咗啲。每隻$780,價錢唔過份,張家輝Fans應該會收貨。

Read more ›
《山海逆戰》玩「鞭」 火將被兜鞭摑+傲嵐:「給我含吧!」
by / on 15/06/2018 at 10:03 pm

《山海逆戰》玩「鞭」 火將被兜鞭摑+傲嵐:「給我含吧!」

笑到我Gap Gap聲呀喂!今期第81期《山海逆戰》處處見「鞭」,這邊廂先有火將為保性命下跪清潔胯下巨鞭,姚星塵盛怒下腰肢一扭,兜鞭狠狠摑咗火將一大巴,火將無噴血但被摑到嘔火,畫面好搞笑。那邊廂傲嵐同子狂雷聯手鬥鹹濕異獸山魅,山魅胯下長鞭直鑽傲嵐褲管,企圖強姦,不過傲嵐都唔弱,成把寶劍插入山魅嘴巴,再加多句:「給我含吧!」哈哈,真係睇到我大呼過癮。

Read more ›

李志清贈封面題字四揀一 馬雲呼籲投票幫幫眼
by / on 15/06/2018 at 9:45 pm

李志清贈封面題字四揀一 馬雲呼籲投票幫幫眼

李志清水墨畫強,寫毛筆字一樣耍家,堪稱字畫雙絕。話說作家馬雲透露青雲工作室將會喺書展推出《黃飛鴻傳奇》,透請咗李志清幫手替封面題字,李志清不但無推卻,仲一口氣寫咗四個Version添。咁問題嚟嘞,四個墨寶都咁靚,用邊個好呢?馬雲揀唔到,惟有公開俾人投票,大家請用心望望,留言畀啲意見喇。

Read more ›
Felix Ip勁呀喂!《香港重機》系列出實體Figure!
by / on 15/06/2018 at 9:15 pm

Felix Ip勁呀喂!《香港重機》系列出實體Figure!

《香港重機》作品集尚未推出,Felix Ip已經透露會推出埋相關玩具。佢喺面書出咗張宣傳圖,從圖中所見,無估錯應該係垃圾蟲同垃圾桶造型Figure,好正!留意番,《香港重機》系列有N咁多幅畫作,如果全部變晒實體玩具的話,一字排開擺喺飾櫃,可以想像到有幾震撼。

Read more ›
有片:三上悠亞做世界盃宣傳大使 露腰波衫搭短裙
by / on 15/06/2018 at 8:57 pm

有片:三上悠亞做世界盃宣傳大使 露腰波衫搭短裙

擒晚2018世界盃開鑼戰,沙地阿拉伯簡直慘不忍睹,堪稱麥花臣水準,仲要係元老盃嗰隻,成班球員慢吞吞行行企企都唔知踢乜,輸俾俄羅斯五比零,真係無眼睇。輸波輸錢唔緊要,因為有三上悠亞哄番我,呢位澳門彩票有限公司MacauSLOT世界盃宣傳大使,剛剛喺Twitter放咗條片,著住件性感露腰波衫搭短裙仔,扭吓擰吓。雖然唔知佢講乜,但亦無需要知佢講乜,有靚女睇,我心情的確好番唔少。

Read more ›
練獨一無二嘅金鐘罩 石黑龍慘變肥仔
by / on 14/06/2018 at 10:17 pm

練獨一無二嘅金鐘罩 石黑龍慘變肥仔

話說今朝坐地鐵睇今期第944期《新著龍虎門》,笑咗出嚟,點解?因為到依家先知原來練金鐘罩會變肥仔。劇情講到身處泰國嘅石黑龍遇上蚩尤,大打出手,期間石黑龍谷金鐘罩上十一關,功力達至「剛如堅鋼,柔似棉絮」境界,咁畫面點表達呢?剛者,畫正常版石黑龍,柔者,畫肥仔版石黑龍,一堅一柔,一瘦一肥,畫面真係非常搞笑。睇咁多年港漫,一個角色忽然變肥變脹,只有兩個原因,一,中毒毒發;二,俾對手用功力谷爆中;今日,有第三個,就係練「獨一無二」嘅金鐘罩,問你服未?另,今期交代咗石武夫由鐵五郎所殺,石黑龍同蚩尤仲有偈傾,都係好事嚟嘅。

Read more ›