Articles by: 尉遲一

今明兩天 張暉派甘小文舊卡
by / on 24/07/2019 at 10:00 am

今明兩天 張暉派甘小文舊卡

係呀,又係「音樂屋」老闆張暉呀,又係甘小文呀。話說張暉有批馬會小文卡仔,全部搵咗甘員外簽名,家陣免費派畀大家,Like嘅,可以上去攞番一兩張,只限今明兩天派發。係,要親身上去舖頭攞,無得PM無得預留,攞完,順便幫襯吓囉。

Read more ›

CK Keung動漫節推出鐵章
by / on 24/07/2019 at 9:30 am

CK Keung動漫節推出鐵章

CK Keung喺面書留言曰:「一直想做的鐵章終於完成了!將會在動漫節發售。」賣幾錢、有幾多個款、現貨定落訂等等,暫時未有詳細資料。家陣齋望相,雖然無比例可依,但好似幾厚身應該幾墜手吓,圖案線條咁密顏色都可以咁搶,感覺甚高質也。

Read more ›
《漫畫Buddy》第六期動漫節開訂 買油畫布連木框送海報
by / on 24/07/2019 at 9:00 am

《漫畫Buddy》第六期動漫節開訂 買油畫布連木框送海報

《漫畫Buddy》出到第六期會完,出版日期大約喺11月,動漫節2019開訂,每本$78,追開嘅,應份買埋佢,有頭有尾吖嘛,想一次過睇晒一至六期嘅,亦得,漫漫行攤位(C23~06)有售。同場加映,Buddy油畫布連木框,小30cm x 40cm售$390、大40cm x 50cm售$450,參與漫畫家有袁家寶、Fai Cheng、李偉健、志筆在始、志恒x志祥、阿恩、鹿凡平同鄧俊棠,睇啱邊幅可以慢慢揀。送禮物,係基本嘢來的,所以但凡購買《漫畫Buddy》第六期或任何一幅油畫布木框,即送袁家寶操刀嘅海報一張,望吓相唔該,好高質架。

Read more ›
門小雷創剪紙公仔 黑定警歡迎Mix and Match
by / on 23/07/2019 at 10:45 pm

門小雷創剪紙公仔 黑定警歡迎Mix and Match

Be Water,就算唔敢走上前線衝,都可以用盡任何一個方法守護香港。唔知門小雷有無衝,但佢好窩心地創作咗一個剪紙公仔畀大家Mix and Match。公仔五官,一個字講晒──衰;身材,挺唔起胸膛挺唔直腰板;服飾,有白衫短褲有警察制服有波鞋有皮鞋有帽;武器,有警棍有開山刀有疊球棍,仲有埋個Bubble畀你填對白添。剪剪貼貼,二合為一後就可以同一個鼻哥窿出氣,擺明影射緊早兩日元朗無警時份兩班唔知黑定白、忠定奸嘅人形物體。唔好浪費門小雷一番心意,強烈建議認真Colour print出嚟慢慢玩,不妨當小人咁打,消消氣都好。

Read more ›
Pen So動漫節售複製原畫 捐款撐立場姐姐
by / on 23/07/2019 at 10:15 pm

Pen So動漫節售複製原畫 捐款撐立場姐姐

「我真係好嬲」、「十幾個男人打一個女仔」,相信Pen So完全講出所有有良知嘅香港人心聲。為支持喺西鐵站俾白衫暴徒圍毆嘅立場姐姐,Pen So決定將入圍「香港人權藝術奬2018」嘅作品製作成複製原畫,喺周五開皮嘅動漫節2019擺攤售賣,所得收入扣除大會手續費後,會全部捐畀「立場新聞」。撐!多謝Pen So!天佑香港,大家識做喇。

Read more ›
朱飛揚x梁偉家《地藏》特別版$80
by / on 23/07/2019 at 10:00 pm

朱飛揚x梁偉家《地藏》特別版$80

Fine,書展已過,動漫節2019緊接上場,之前介紹過嘅小說《地藏》有詳細資料嘞,作者朱飛揚,故事講天才科學家如何拯救地球、通靈少女煉性化空而得道,估計都係末日、災難、科幻、神怪一類題材,而封面同插畫,則由梁偉家負責。全書104頁,封面彩色,內文黑白,Size係125x184mm。老例,分普通版同特別版,前者小說+畫籤三張,$50;後者小說+書籤三張+過膠海報+3D立體卡,$80。故事如何要睇過至知,但封面真係好靚,請大家多多支持,報告完畢。

Read more ›

何志文取消動漫節簽名會 500%大龍飛舞公仔打卡
by / on 23/07/2019 at 9:05 pm

何志文取消動漫節簽名會 500%大龍飛舞公仔打卡

有少少Sad,因為「時間上安排有所改動」,所以何志文取消7月27日動漫節簽名會,不過都可以放心,佢事前會簽好晒99張《波動少女天若》畫板,依舊購物滿$700即送一張。另,屆時,攤位會擺放500%大龍飛舞公仔,大家記得打卡呀。

Read more ›
林祥焜x台北大茶飯餐廳 索女海報靚到犯規
by / on 22/07/2019 at 9:24 pm

林祥焜x台北大茶飯餐廳 索女海報靚到犯規

呢期無打算去台灣旅行,所以無得親自打卡,甚可惜,咁惟有睇咗相當朝咗聖喇。講緊係林祥焜幫台灣「台北大茶飯餐廳」畫嘅系列海報畫。一套八幅,個Form好簡單──靚女+食物+食物名字,我最鍾意「砵仔糕」同「火腿通粉」呢兩幅,女靚,構圖靚,顏色撞得靚。林祥焜畫女,真係得無得輸,又一鐵證也。

Read more ›
網圖分享:當Pepe the Frog變成名畫+名人+電影場景
by / on 22/07/2019 at 9:08 pm

網圖分享:當Pepe the Frog變成名畫+名人+電影場景

又唔係靚又唔係Cutie,老實講仲有啲樣衰衰添,但唔知點解,身邊好多朋友尤其女仔,都好鍾意Pepe the Frog。關於呢隻青蛙嘅二創,網絡世界大把,多到數唔晒,而於我印象最深者,非俄羅斯畫家Olga Vishnevsky嘅畫作莫屬,佢將Pepe融入名畫、名人同經典電影場景,效果出奇地好,好Draw到attention。咁調番轉頭講,當Pepe出現喺油畫裡面,我又覺得幾有藝術氣息喎。

Read more ›
想哭!牛佬都諗唔到嘅《古惑仔》情節上演!
by / on 22/07/2019 at 8:30 pm

想哭!牛佬都諗唔到嘅《古惑仔》情節上演!

擒晚嬲到訓唔著,不斷Loop面書Loop到凌晨四點,越Loop越激心,我差啲想哭。訓醒,落街買公仔書,擺低$23畀書報攤老闆娘後,我喺心裡面講咗一聲:「多謝牛佬。」多謝牛佬站喺雞蛋一邊,不過我諗牛佬點叻諗橋都好,都諗唔到現實世界會發生暴徒入港鐵車廂無差別打市民、細路、大肚婆咁荒謬嘅情節。今期第2254期《古惑仔》封面,好明顯係回應緊上個禮拜新城市廣場困獸鬥,But今日周一書見街,呢個封面已經Out。Out得很快,因為情況變得更壞。書裡面九紋龍對狐狸一戰,講皇氣借故推撞記者,喺現實世界係真嘅;東英同洪興兩瓣古惑仔驚皇氣作鳥獸散,喺現實世界卻係假嘅,因為……不解釋,亦唔使解釋,大家有眼睇。天佑香港,香港人加油。

Read more ›
《山海逆戰》特別版 一書一板一海報or貼紙$180
by / on 19/07/2019 at 9:47 pm

《山海逆戰》特別版 一書一板一海報or貼紙$180

身邊朋友話呢排《山海逆戰》劇情有啲拖,老實講我又唔覺,仲幾鍾意不棄添,隻大眼仔不知幾可愛,真心希望邱福龍可以出番隻不棄Figure。言歸正傳,今期第138期《山海逆戰》出特別版,細分勾徹同若蘭兩個版本,一書、一板、海報or貼紙二揀一,套餐價$180。塊閃彩畫板靚到犯規,各超限量100套,手快有手快無。

Read more ›

何志文《波動少女天若》畫板屬非賣品 限99張送完即止
by / on 19/07/2019 at 9:30 pm

何志文《波動少女天若》畫板屬非賣品 限99張送完即止

其實早兩日前瀏覽何志文面書,已經見到呢幅靚靚畫板,我仲多口問價錢添,去到今日瀏覽「快樂百貨」專頁,先知原來係唔公開發售嘅。想得到呢件非賣品,唔該喺動漫節買番隻龍飛舞搪膠Figure或波動少女天若單色指頭,消費滿$700即送呢塊《波動少女天若》畫板一張。提提你,限量99張,送完就無,即係要搶囉。

Read more ›
紙本分店開皮 撐門小雷《Sisterhood Little Thunder Art Book》
by / on 19/07/2019 at 9:15 pm

紙本分店開皮 撐門小雷《Sisterhood Little Thunder Art Book》

聽日,如無意外會去紙本分店Manga Pop-up Store掟個Round,入場費自由定價呢家嘢聞所未聞,真心想見識吓。入番正題,Pop-up Store會售賣門小雷《Sisterhood Little Thunder Art Book》,呢本畫集有超過100幅以女性為主題嘅插畫,有辦你睇,係畫得好靚嘅,唔知大家有無興趣入手?

Read more ›
Kaiju One搪膠石黑龍+火雲邪神+老祖宗 各售$580
by / on 19/07/2019 at 8:41 pm

Kaiju One搪膠石黑龍+火雲邪神+老祖宗 各售$580

終於有詳細資料,Kaiju One推出嘅三個《龍虎門》搪膠角色──石黑龍、火雲邪神同老祖宗,全部都賣$580,動漫節2019有售。面書專頁好搞笑咁話:「絕對充滿老中青三代嘅矛盾及世代之爭,亦完全反映現今香港社會嘅狀況,後生仔vs富二代vs呀爺式家長」,哈哈,言重了,玩玩具嘛,玩玩具就係想逃避現實嘛,千其唔好講到「反映現今香港社會嘅狀況」咁嚴重。老實,未真正摸過上手,賣五舊幾水我唔識評平定貴,但《龍虎門》始終陪住我哋大,加上又係本地創作,希望大家支持吓。而於我,就當買番個七八十年代屋村仔睇公仔書嘅美好回憶,都抵。

Read more ›
撐!張立人+黃天俊書展推出插圖小說《喪屍研究室》
by / on 18/07/2019 at 9:30 am

撐!張立人+黃天俊書展推出插圖小說《喪屍研究室》

正,係我鍾意嘅喪屍題材!今年書展有本插圖小說《喪屍研究室》,作者黃天俊,張立人負責插畫。故事講喪屍病毒爆發三年後,倖存市民聚集安全區域重新建立文明,可惜災難再次發生,市民墮入固守定搬離嘅兩難之中。老實講,估計都係嗰啲大路劇情同設定喇,不夠公仔畫得幾有味道,齋睇封面都好易令人投入故事。價錢方面,平裝版$88,特別版送多個喪屍人偶,$288。如果大家係喪屍迷的話,支持吓。

Read more ›