fbpx

Author: 尉遲一

梅艷芳肖像巴士 不日啟航

梅艷芳肖像巴士 不日啟航

有「海報師」之稱嘅阮大勇之子阮繼增喺面書透露:「Under Construction……梅姐×珍寶×荔園」,可期待不久嘅將來,梅艷芳肖像會出現喺巴士車身,遊走港九。唔好心急,暫時睇住設計圖先,車身寫住「Salute to our legend」,向我們的傳奇人物致敬,嗯,香港女兒嘛,啱數!

Read more ›

邱福龍《山海逆戰》彩色珍藏本第3期 12月8日見街

邱福龍《山海逆戰》彩色珍藏本第3期 12月8日見街

家居淺窄,儲單行本不了,儲珍藏本方為正路。提一提大家,邱福龍《山海逆戰》彩色珍藏本第3期鐵定12月8日見街,內容輯錄第21至30期內文,普通燙銀版$128,限量鐳射硬皮特別版$168,隨書附送炎帝人形公仔名片,又係時候畀錢龍哥使嘞。

Read more ›
牛佬《古惑仔》復刻珍藏版(十九)第12期見街

牛佬《古惑仔》復刻珍藏版(十九)第12期見街

無辦法,不定期出版,真係好容易買漏。講緊嘅係牛佬《古惑仔》復刻珍藏版(十九)第12期,原來已經出咗幾日了,而隨書附送嘅「智勇仁義」合併雷射閃卡明信片都出到第三張,無理由唔儲齊一套架?廢話唔講,大家記得去買書。

Read more ›
邱瑞新報料! 賣定廣告寫鬼書?

邱瑞新報料! 賣定廣告寫鬼書?

《火武耀揚》就快大結局,邱瑞新繼續喺面書擠牙膏式露透新書資料。據佢講,新書場景設定喺「另一個平行時空」,一個名叫「夢都」嘅「烏托邦城市」,透過夢都嘅神鬼傳說來「刻畫人性,探討死亡,來回地獄,顛覆神山」。純種鬼書?望落唔多似,不過靠估,睇個勢似透過怪力亂神講恩怨情仇、人性險惡、賞善罰惡,苟如是,都好難歸類為某一傳統既定書種。Anyway,越神神秘秘我反而越有興趣,希望瑞新真係發掘到新題材以饗讀者,畀多啲驚喜。佢仲話:「下期,神秘驚喜書名正式公布,絕對震撼度爆L晒燈!」拭目以待。

Read more ›
Wow!鄺彬強《新著龍虎門》蚩尤回歸+群英集結!

Wow!鄺彬強《新著龍虎門》蚩尤回歸+群英集結!

今期第1124期《新著龍虎門》惹來好大迴響,書末一個拳頭,配大大個「轟」字,再加一句反問:「還有誰?」著實讓一眾讀者樂上半天。連專欄都見到Q版蚩尤,蚩尤回歸畫到出腸架喇,於我係非常開心的,係吖嘛,無理由一代戰神俾條蛋散白朗三兩下搞死,仲要死無全屍,對上嗰Part戲,我係萬二分接受唔到的。家陣蚩尤疑似翻生,very fine,但希望彬強可以搞得好好睇睇,雖然知道好難,但懇請盡量唔好咁多犯駁,翻生?孖生兄弟?易容替死鬼定鏡花水月?條橋希望可以兜得唔好咁突兀喇。 另一個睇到我嘩嘩聲嘅場面,係「龍虎群英陣營集結」嗰頁,除咗王小龍、玉兒同大水牛,基本上齊晒腳,我承認我係易滿足,呢一頁足夠睇到我啲血熱晒架喇;But,諗深一層,呢鋪龍虎門精銳盡出,咁神武英明嗰邊得幾件十戰夠唔夠打架?齋數人頭都預見得到係人多蝦人少。王小虎、王風雷、石黑龍加多個白仇已經係SSS級,如果神武英明背後無其他高手支持,呢場交會變得強弱懸殊,太過正強邪弱的話,好睇極有限。

Read more ›
邱福龍《山海逆戰》五週年 勾徹搪膠公仔11月29日有辦睇

邱福龍《山海逆戰》五週年 勾徹搪膠公仔11月29日有辦睇

五年,唔覺唔覺原來《山海逆戰》推出咗五年,而講咗唔知幾耐嘅勾徹搪膠人型公仔,亦成為五周年重點推介Product。邱福龍聯乘M3 Studio出品,唔知到時賣幾多錢呢?實物會喺11月29號喺「收藏家港漫專區」展覽。另,或者因為搪膠公仔本身Based on早期出場造型計,兼係Q版,當對比番呢幾期暴戾咗嘅勾徹,我即時有種怪怪感覺,唔知大家有無咁嘅感覺?

Read more ›

網圖分享:鄭伊健版華英雄

網圖分享:鄭伊健版華英雄

鄺志德加袁家寶推出《新著中華英雄》,港漫界瞬即掀起一股英雄熱。面書朋友仔Chang Chin Lim都來湊熱鬧,畫咗幅鄭伊健版華英雄。我覺得著實錯,值得畀讚。

Read more ›
低成本高誠意 肥良廣東話版《燃燒的夏》公演

低成本高誠意 肥良廣東話版《燃燒的夏》公演

漫畫改編成電影,廣告話版電影《燃燒的夏》喺北角滙ACX公演。個人認為,張電影海報幾靚,故事都係圍繞江湖情、兄弟情、黑幫仇殺之類,主角有彭敬慈、洪天照、林雪、陳觀泰同高天鷲……吖,唔係,係吳岱融至啱。家陣有預告片睇,短短一分鐘,呢六隻字最令我留下深刻印象──「低成本‧高誠意」,大家有無興趣撐吓肥良?

Read more ›
網圖分享:香港女兒《梅艷芳》

網圖分享:香港女兒《梅艷芳》

睇咗《梅艷芳》未?身邊朋友講到話非睇不可嗰隻,嗯,香港女兒,始終係我昔日偶像之一,所以都打算入場撐一撐的。戲未睇,睇住畫先。

Read more ›
《火武耀揚》仲有兩期完 送極惡戰紋賀富城回歸

《火武耀揚》仲有兩期完 送極惡戰紋賀富城回歸

冚家剷賣魚蛋、正邪同體、鍾意扭蛋買玩具……都估到會出番富城架喇,話晒係「華興」第一快刀手,《火武耀揚》仲有兩期就大結局,點會漏低富城唔畀佢出場吖,不過話時話,喺咁意係青山講兩句就疑似變番正常重出江湖,呢個位又確係交代得突兀啲。Anyway,邱瑞新喺面書話因為「熱烈慶賀富城回歸」,所以送番個「極惡戰紋」畀大家喎,都OK吖,我已經save as wallpaper,當留個紀念都好。

Read more ›
封面合番體 《新著中華英雄》補送李健良跨頁海報

封面合番體 《新著中華英雄》補送李健良跨頁海報

好哋哋一個封面一斬二實在有點兒那個,家陣從善如流補鑊又好,原本已經有咁嘅打算又好,今期第三期《新著中華英雄》送番李健良精心砲製嘅封面大作做跨頁海報,始終都係一件好事。睇網上留言,有師兄話海報加咗個框唔係咁好,破壞構圖云云,我又唔覺有乜大問題,反而我想講嘅係,如果張海報係獨立一張刊印,對褶夾喺書裡面,而唔係依家咁釘死喺書中間,會唔會更具收藏價值?

Read more ›

許景琛《龍虎門Z》第15期 11月12日見街

許景琛《龍虎門Z》第15期 11月12日見街

果然很勤力,許景琛《龍虎門Z》第15期11月12日又見街了,我上個禮拜先出MK買第14期,買完都仲未有時間睇!Anyway,老例,普通版分「正」、「邪」兩款,送人物卡一張,各售$68;特別版A,送一張閃卡同八張人物卡,售$118;特別版B,送3D打印白仇公仔一個、透明膠卡同簽繪包裝盒,售$380。報告完畢,記得買書。

Read more ›
文化保育 癲噹x藍屋迷你小花盆

文化保育 癲噹x藍屋迷你小花盆

係幾靚嘅,細細盆擺喺Office應該好合適。講緊嘅係癲噹聯乘「出走藍屋」推出嘅小花盆,靚靚包裝藍內藏花盆、貓燕麥草種子包、花泥包同土作坊有機花生糖50克,每盒$198。都係啲文化保育同社區活動嘢喇,有心嘅,咪支持吓囉。

Read more ›
咁快手?邱瑞新已完成新書創刊號!

咁快手?邱瑞新已完成新書創刊號!

邱瑞新《火武耀揚》仲有三期完,劇情講到道理哥施回馬槍、火武紮坐館、巨咪同富城現身,下期預告封面仲疑似見到世鋒身影添,主要角色相繼回歸,希望大結局搞得好好睇睇喇。至於之後有無新作,瑞新繼續擠牙膏式講啲唔講啲,不過喺今期第1151期「瑞新週記」肯肯定話:「瑞新全新巨鑄創刊號已經完成!《火武耀揚》大結局之時,正是另一本創新作品的開始!馬拉松的起跑槍聲快將響起喇!」講到咁實就好嘞,創刊號已經畫好,不但唔會甩拖,睇個勢新作仲要無縫緊接完書後即刻出版咁款喎,究竟係乜類型漫畫呢?我萬二分期待。

Read more ›
倒數中!《王小龍傳貳》第37期完結!

倒數中!《王小龍傳貳》第37期完結!

今期第33期《王小龍傳貳》「常公子專欄」咁寫:「天下無不散之筵席,《王小龍傳貳》將會正式在37期完結大結局,現在距離大結局還有四期時間,牛輝和我會盡力做到最好……」雖然我未曾有過棄書念頭,但得罪講,完咗佢都係一件好事來的,明就明唔明就家明。And,好彩地,常公子還透露:「我和牛輝、鄺生,正籌備一套全新作品之中,估計是12月尾或明年1月推出,有進一步消息在此跟大家分享。」雖然題材未知,係咪甚麼前中後左右傳都未知,但有新書出我舉腳贊成,有公仔書睇我就開心架嘞。希望鄺志德可以撚盡十二成功力,做本好書畀大家睇吓啦。

Read more ›