fbpx
主頁, 影音新聞, 電影 — 20/10/2013 at 9:00 am

新片速報:宇宙最強vs李三腳

by

4p

究竟人稱「宇宙最強」嘅甄子丹定有「李三腳」之稱嘅李小龍好揪啲?可惜兩人生喺唔同時空,無機會較量。而喺李晉呢位老兄心目中,兩人功夫喺伯仲之間,仲特登做咗條動漫向兩位功夫界巨星致敬添。

呢條原創動畫長3分18秒,真係每一秒都咁精采,先出場嘅係甄子丹,但見佢出盡力打沙包,朝天腿加膝撞加組合拳再加肘擊,成套動作都畫得好流暢。練練吓功,四個壞蛋出場,壞蛋有姿勢無實際,出埋刀仔都畀甄子丹瞬間KO。緊接終於到李小龍出場,兩來腳往互有攻守,大家都有中招,以甄子丹鬆頸骨握實拳頭怒睥對手、李小龍出招前彈彈吓嘅招牌步法,畫得最神似。到最後,兩一齊跳起出一招青龍出洞,比試完場,大家打成平手!隨住甄子丹望住李小龍遺照微笑,成條片亦正式玩完。一級正爆動漫,值得睇完再睇。