5/30香港實地喪玩 《Lollipop Chainsaw》Jessica C.搭陳七女 齊做索女啦啦隊

《Lollipop Chainsaw》仲有唔夠兩個星期,喺6月12日就推出,香港SCEH亦啱啱搞咗個試玩會,請嚟Jessica C.同陳七女Emily著短裙bra top扮女主角Juilet,齊齊做索女啦啦隊!我嚟講句公道說話,死嘅,又點只喪屍呢……   嘩!咁多喪屍個警鐘都唔響嘅?咁實在太危險喇!好彩有喪屍獵人家族嘅成員喺度,仲唔只一個……噚日(30日),喺尖沙咀某酒吧就舉行咗呢個《Lollipop Chainsaw》遊戲試玩會,焦點所在就梗係……不過我哋作為一個正直不偏嘅遊戲網站,我哋只會集中講隻遊戲…… 好喇,對唔住,我真係專心唔到打機。我夠膽講句,Jessica C.嘅神似同靚女程度,係比外國嗰個Jessica Nigri同日本個川本真由更強,殺傷力更大,如果我係喪屍,死喺香港會覺得甘心啲,值得啲,眼閉啲。緊接出場嘅仲有索模Gobby同JoJo,呢兩個青春靚女扮Juilet屬可勝不穩程度,以下奉上真人靚圖同精心製作影片一段(留意片尾後嘅隱藏片段,有實機試玩,仲有……),請慢用。 嘩,真係唔記得講隻game添!呢隻動作遊戲係以可愛女主角加血腥殺喪屍為賣點。女主角拎住把電鋸,會隨住遊戲發展變化,仲可以變成榴彈砲、大量滲入啦啦隊動作嘅連續技同必殺技,令人殺得心情開朗。而遊戲中嘅男主角就係因為救女主角而被感染,所以俾佢鋸咗個頭「保存」掛喺腰間…… 故仔講住咁多,試玩過後係動作夠流暢爽快,與到大量喪屍時極有「無雙」感覺,不過打佬時又會考你反應考你智慧,玩法尚算變化多。加上史上首次嘅雙重配音,PS3版係日笠陽子,Xbox360版就係喜多村英梨,兩個都係人氣聲優,Premium版本有兩把聲,仲有大量crossover性感服飾俾女主角換衫,買嚟準備考試又好,慶祝就快放暑假又好啦,唔係個人仲邊有目標呀? 《Lollipop Chainsaw》 主機:PS3/Xbox360 類型:動作 人數:1人 製作廠商:Grasshopper Manufacture 發行廠商:角川Games 發售日期:2012-06-14 官方網站:http://lolli.jp/   httpvh://www.youtube.com/watch?v=qhRtFeJamto