主頁, 偶像資訊, 潮玩新聞 — 30/08/2013 at 1:00 pm

新片速遞:巴塞x卡塔爾航空廣告 佩奧爾頂花盆解圍

by

aaa

未來三年,巴塞隆拿球衣心口位都會印住卡塔爾航空個Logo,贊助費高達9.8億港元。有錢賺,巴塞各大小球星都好識做,齊齊幫手拍番個廣告,當中以佩奧爾最搶鏡。

廣告由一個靚靚空姐嘅所見所聞串起,話說空姐所屬嘅卡塔爾航機準備降落「巴塞島」,喺機艙,佢叫醒戴住眼罩嘅乘客馬斯查蘭奴;落機後,遇見木口木面嘅海關碧基,正幫尼馬個護照打印;而尼馬呢,一時技癢表演腳法,將乘客行李挑番入手推車;搭的士途中,空姐見到恩尼斯達同柏度不斷對向住幅牆怒射,足球染滿油彩,原來係靠射波玩Graffiti;去到排舞室,佢見到美斯邊控球邊教人跳舞;之後又行到橫街小巷,見到佩奧爾英雄救美,天降花盆幾乎砸到人之際,佩奧爾一個箭步迎頂,姿勢似十足喺球場用頭槌解圍,分別係喺球場頂嘅係足球,依家頂嘅係花盆,搞到自己成面都係泥,你都咪話唔搞笑。廣告去到最後,當然係各球星已經齊集球場,而靚靚空姐都霸定好位,準備欣賞一場精采賽事,成條片既Sell到航空公司,又有球星睇,真真不俗。