fbpx
主頁, 動漫資訊, 潮玩新聞 — 23/08/2013 at 12:00 pm

《新著中華英雄2013》創刊 久違了的無量神掌

by
《新著中華英雄2013》膠片特別版$38

《新著中華英雄2013》膠片特別版$38

擒日朝早返工,書報攤未返書,我同相熟老闆娘講:「《新著中華英雄2013》,我要特別版,同我留一本,今晚收工攞。」放工,畀錢,拎書,一揭,噓,真係久違了的無量神掌,未至於好感動,但真係好好好好興奮。

我知我咁講,等於出賣自己年齡,我承我係麻甩佬,相信好多七十後都同我一樣,一拎起呢本《新著中華英雄2013》,就會諗番起十幾年前三更半夜哺喺書報攤等買最新一期《中華英雄》嘅美好日子。

作為大渡出版有限公司創業作,《新著中華英雄2013》都算響到頭砲,夾啱馬Sir引退創刊,有Noise有Voice,成功惹到港漫迷注意。除附送龍泉寶劍嘅普通版同草圖版之外,仲有我買嘅呢本膠片特別版,送赤劍連盒,赤劍有劍穗,仲可以插入劍鞘,製作好精緻,搞咁多花臣,相信或多或少都可以敲到鍾意儲精品嘅港漫迷一筆。故事方面,先來一頁密密麻麻純文字,簡單回顧原著《中華英雄》嘅故事脈絡,等新讀者可以盡快入局,舊讀者可以溫故知新,呢樣嘢確實要讚。純文字過後,入正題,一開波就嚟一場司徒無量大戰華英雄,你一招大海無量,我一招海量汪涵,無量神掌互拼較量,拳腳交畫得好細緻。打打吓,服部千軍出場,東方斬龍刀挑戰赤劍,劍影縱橫打生打死,為嘅不過係一條插喺屋頂嘅斷臂,斷臂掌紋關乎一個重大秘密,華英雄能唔能夠以一敵二,力保斷臂不失呢?有勞追看嘞老友。

收得我$38,無理由一把劍仔就值$23架,所以賣大包附送多本《新著中華英雄2013》人物介紹特刊,底面四人司徒無量、服部千軍、火鳥同赤煉鷹王唔係重點,內頁個祈文傑專訪先係好嘢,原來祈文傑當年差啲俾黃玉郎炒魷,黃玉郎仲鬧過祈文傑反骨仔添,呢啲昔日畫壇秘聞勁有趣,又係唔可以唔睇。總括嚟講,創刊號值90分,唯一要挑剔嘅係,新著封面何解用番原著《中華英雄》封面,向馬Sir致敬?想吸引番已經放棄港漫嘅朋友注意?諗唔明,個人認為──話明新書嘛,重新畫過一個新封面就基本嘢嚟架啦,扣嗰10分,就係喺呢度嘞。

隨書附送人物介紹特刊,信我一定要睇,逐粒字睇晒佢。

隨書附送人物介紹特刊,信我一定要睇,逐粒字睇晒佢。

赤劍可以插回劍鞘,製作好精美。

赤劍可以插回劍鞘,製作好精美。

ddd