fbpx
編輯Blog — 20/08/2013 at 8:43 pm

【苦茶Blog】 手機Wide Angle原來幾好玩

by

TF20130820_17P TF20130820_18P

 

做到悶悶哋, 買支Wide Angle俾自己開心吓! 百零蚊貨仔, 但估唔到咁好玩!

所講唔係一般相機鏡頭, 係手機用嘅Wide Angle外加式鏡頭, 百中價錢, 竟然有0.4X效果, 加裝後差唔多有160-170度廣闊視野, 成部手機完全唔同晒!

第一樣好玩處, 係偷拍! 唔係話影啲唔見得人嘅相, 反而係有時想影大圍環境人頭相, 由於一般人對手機鏡頭嘅認知, 都係人像鏡咁嘅相度, 根本無人意識到我部手機影到160-170度囉! 行埋成堆人隔籬, 差唔多鏡頭「側向一個身位」都影到, 而且完全冇警覺性, 表情自然, 正到呢!

近幾個月都出咗好多手機Crossover相機嘅物體, ! 其實我覺得係幾無謂(自從有咗個Wide Angle之後令我有呢個感覺), 你話變焦長Zoom……算把啦! 由第一日學影相, 老師就教Zoom鏡係懶人用嘅東西, 你要近影一件物體, 其實行埋去咪得喇(雖然唔係任何情況都得, 但一般生活相90%都得囉!), 反而Wide鏡好重要, 因為好多時環境條件所限, 例如後面有牆, 又或者向後行的話, 人群會遮住你嘅畫面, 所以我一直認為Wide係重要過Tele!

再講吖, Wide1mm , 就代表你多1mm, 你可以哄埋主體影相、拍埋周邊環境, 但其他人唔夠你Wide, 就要跟喺你後面, 等你影完, 再求你唔該借借, 係好霸道, 不過有時搶影新聞, 就係靠佢快啲影完、快啲收工!

真係完全冇缺點? 當然唔會啦! 由於係平價貨, 相片除咗中間40%位置係完全實淨之外, 離開中心嘅60% , 會逐漸有「散」出去嘅效果, 有辣有唔辣啦! 你話影Products當然係人間慘事啦(其實唔應該用Wide鏡吖!)! 不過你話好似影上面嘅夜景相或環境相, 其實都相當Mood!

對呢支Wide, 其實仲有一個期待, 就係用嚟拍片! 我覺得會相當有味道吓, 事關顏色明顯有啲淡咗, 仲要中間主體Sharp, 周圍散晒, 相信出嚟效果會係主體突出, 周邊變成散景, 大佬呀! 人哋用相機拍片都係要類似呢種效果, 依家百零蚊有相類效果喎! 你話係咪抵玩先?

仲有一樣估唔到嘅! 就係個變形情況, 老實! 變形情況相當輕微, 真係可媲美一般相機副廠鏡效果, 足足玩咗我幾晚, 而且輕到幾十克, 依家我差唔多日日袋喺身, 見得閒R啷啷就攞出嚟玩, 成件事真係賺晒!

如果你都想買, 可以去星際摷摷, 應該百六、七有得玩, 相當爽皮! 建議買啲C形扣上式設計, 咁你以後點換手機都可以用得返, 我知! 有啲係專For某型號手機Wide Angle! 係穩陣啲, 不過一換手機就冇得用, 我覺得唔抵囉!