主頁, 其他相機, 相機新聞 — 20/05/2012 at 4:25 pm

紙紥DC仔 IKEA亂入!

by

 

KNAPPA(價格/發售日期未定)

 

講到紙紥嘢,舊時人最愛係阿金阿銀,甚至集齊三個再加多幅麻雀!近代人愛iPad同iPhone,報紙都推到佢上A1,人未死、先俾佢笑死!不過最近連ikea都加入紙紥大軍,出數碼相機,不過佢真係影得,問你死未!

ikea呢部紙板數位相機,個朵叫KNAPPA,佢號稱最抵玩數位相機,係由斯德哥爾摩工程師Jesper Kouthoofd設計;不過實在無辦法唔平,無芒、無相睇、插唔到卡、觀影器仲流到係紙板上拙個窿,真係RAW到你唔信!

操作都幾得意!快門唔係最常見嘅機頂,因為機身由三塊紙板摺埋,跟本無厚度俾佢放,所以順利成章放在鏡頭邊嘅機面,據稱由按掣至成像,大家要屏息靜氣3秒鐘,加上佢又無腳架位,我諗大家要練定元神出竅,張相先唔會鬆郁朦。

機身採用內置式記憶體,不過未講幾多MB內存?電池要拆開機面膠螺絲先入到,不過夾住夾住,兩粒電池玩外露設計,真係型到爆燈;相要入電腦都好型,因為佢採用外露薄版USB插口,幾有格調。

不過又話時話,佢個鏡頭……,同大家手機所用鏡頭真係差無機喎,點解佢又無芒、又無Preview,仲要帶多嚿嘢出機,仲要小心佢機身紙板濕咗又整爛,我都要特登帶佢出街?……有時身活品味嘢,真係好難講!

至於香港ikea好似仲未有得賣,不過官網已經有中文PDF說明書了,大家有心嘅,我諗快0架喇,唔使驚等唔到喎!

 

機身大小,同錄音帶差唔多,但你見過錄音帶未?

 

成部嘢打開,就係簡單得一塊電路板。

 

機背乜都無,就係得個窿做觀景器。

 

機身厚度……只要換張薄卡紙,就可以號稱全宇宙最薄,你話係咪俾張好牌你,都唔識上吖?

 

呢個就係出相USB位,磨花咗唔好喊呀!

 

DEL相要好似iPhone咁,搵支針拮個窿,唔好問我有無揀相DEL!

 

堅似手機鏡頭!

 

說明書有中文繁簡體,香港一定有貨到!我估!