之前同大家介紹過嘅動漫基地，嚟緊會辦「馬榮成漫畫作品展」，馬Sir仲會喺開學日搞簽名會，記得帶定相機向呢位即將畫壇大師影相留念呀。
馬Sir宣佈完結《風雲》，好多讀者都話唔捨得，想向佢致敬的話，就記得親臨動漫基地捧佢場。展期由8月22日至10月20日，長達兩個月，節目多多，8月21日5:00pm開幕禮，所有到場讀者送一套八張《風雲》明信片；9月1日，馬Sir親臨動漫基地同讀者見面，簽名之餘仲會向讀者派發禮物，係乜禮物暫時未知，不過可以同馬Sir合照，相信讀者一定開心死。咁展覽有乜睇呢？多咯，包括掟上網炒得起嘅絕版港漫、《風雲》原稿、《中華英雄》原稿、港漫製作流程示範、歷年《風雲》精品、同《風雲》有關嘅電影、電視劇、廣播劇回顧、漫畫工作間、同李志清合作舉辦嘅「大師班」等等等等，動漫基地裡面嘅皇后餐廳，屆時仲會推出特色《風雲》小食，肯定夠你Hea一日。是次展覽入場費全免，開學之前，大家又有一個好節目喇。
馬榮成漫畫作品展
展期：8月22日至10月20日(周一除外)
地點：動漫基地(灣仔茂蘿街7號/2582 0200)