fbpx
主頁, 動漫資訊, 潮玩新聞 — 17/08/2013 at 5:10 pm

福龍現身《火武耀揚》 變身口水佬

by

1p

港漫圈子越來越細,做漫畫嘅又來來去去都係嗰班人,大家都分緊同一個餅仔食,所以彼此之間好熟絡,熟絡到可以將人哋個嘜頭,放入自己本漫畫裡面搞搞笑添。

港漫製作人有幾團結?最新鮮滾熱辣有《火武耀揚》,瑞新喺今期第721期〈千人斬〉裡面,福龍化身「華富村靚仔街坊客串演出」,故事講到金羅漢金盤洗手消息一出,排四仔即刻借故挑釁,劈到華興仔七個一皮,而福龍呢個八卦吹水佬,就負責將劈友過程話番畀富城知。客串還客串,福龍好多對白講架,例如──「點知!突然之間一大炸車飛嚟,衝落車班公仔佬,個個昂床六呎,人人揸住把二呎四,十足十──阿諾豬華辛力加第三集,賤怪獸大戰惡異形!」、「賤怪獸同惡異形!爹咗兩句竟然散Band!攪到等睇大戰嘅我,響最興奮一刻,竟然無處發洩──非常之膠咁企咗響度!陰功到你唔信呀! 」對白講足兩頁,仲非常風趣抵死。久唔久玩吓呢啲Crossover都OK吖,成本書無咁悶,等讀者又多個話題吹吹水,好事嚟嘅。