fbpx
主頁, 動漫資訊, 潮玩新聞 — 16/08/2013 at 6:41 pm

新片速報:熱血對談 瑞新眼中的色情暴力

by

1p

呢期好興「熱血」呢個詞,先有網台熱血時報,再有綜合性漫畫《熱血少年》,家陣仲有熱血對談。邊個同邊個對談?瑞新與Gary是也。

呢條片叫《瑞新和GaryMan熱血對談二──色情暴力》,瑞新,《火紅年代黑骨棠》同《火武耀揚》作者;Gary,香煙精品品牌Smokerhood話事人,兩人因合作推出金句火機成為好友,Gary因利乘便訪問埋瑞新添。早兩個月其實已經有得睇《瑞新和GaryMan熱血對談──預告篇!》,不過因為實在太過「預告」,無乜爆炸性內容,所以無推介畀大家睇,家陣嚟到對談二,確實好睇得多。

Gary問驚唔驚江湖書會教壞細路,瑞新咁答:「本書十八歲以上人士先買得,無乜問題吖……凡事相對,如果你認為我有能力教壞一個人,其實你都係歌頌緊我有能力教好一個人……要睇一個人嘅本質,我睇超能力片,唔會認為自己會有超能力,我睇完一個殺人犯故事,我都唔會走去殺人……」Gary又問點解書中做愛場面咁唔寫實,女主角點解做親愛都要戴Bra,瑞新又咁答:「一來,咁樣畫面會靚啲,可以畫啲衫褲首飾;二來,我覺得唔需要咁樣做,雖然封咗膠袋可以露三點,但我唔使咁做,因為我係賣劇情。」都差唔多十年咯,新帝國創立之初,我訪問過瑞新,好記得佢同我講過:「我想畫嘅係暴力色情美學,唔係一般江湖書。」果然貫徹始終,立場到依家都無變過。