fbpx
主頁, 動漫資訊, 潮玩新聞, 編輯Blog — 13/08/2013 at 3:39 pm

【編輯Blog】Reika:劉雲傑情意結《FACELOOK 02》讀後感

by

好耐無睇過劉雲傑嘅作品,上一次已經係好多好多年前嘅《Feel 100%》,某日睇編輯尉遲一嘅報導,先知今年書展推出咗新書《FACELOOK 02》,書名真係要扣分,不過基於情意結我都去漫畫店訂咗一本。

DSC_2892R

漫畫店話無貨,要訂,問我叫咩名,我怕醜無答,只係話劉雲傑本新書,跟住佢打咗個電話,問我:「哦,《FACELOOK》,係咪?」我點點頭,放低咗$138 等電話,認真,我真係講唔出:「幫我訂本《FACELOOK》吖!」呢句完整句子,本書名真係好尷尬,我認我無膽。

講返本書,拎返屋企睇完個序先知,原來我買呢本係《FACELOOK 02》,即係之前已經出咗一本,但我居然完全唔知,仲夠膽喺度介紹呢本書‥‥‥又原來,呢本書係結集劉雲傑喺《晴報》嘅每日專欄而推出嘅,我自問無睇免費報嘅習慣,《晴報》更係從未拎過上手,如果你都有興趣,可以bookmark呢個網址,作者好勤力,除咗週六日,每日都有更新。

劉雲傑@晴報:SKYPOST

 

DSC_2884R

劉雲傑畫女仔的確比畫男仔出色

 

 

DSC_2887R

 

 

DSC_2888R

 

 

至於書嘅內容,主要係有不同插畫,每張畫旁邊都有一段同愛情或生活有關嘅散文,都係作者嘅所思所想,有部份幾精警 (都有部份有啲老土嘅)。全書分為五個部份,其中最尾部份「愛說話」,估計節錄自網絡對話,呢部份我麻麻哋,有好多句都唔係好明點解作者會揀。講返畫,今時今日睇都有同一種感覺,就係劉雲傑畫女仔的確比畫男仔出色得多,好多女角色都有清新脫俗嘅感覺,好pure。而好傷心地,呢類型女仔喺現實中幾乎唔存在。以前嘅Cherry、許樂,依然令人懷念。喺書入面,你唔會見倒作品有好大嘅進步,(甚至有幾張因為趕稿嘅關係,質素麻麻哋),不過買得嘅人都係講feel,應該唔會介意。

 

DSC_2885R

我口中「質素麻麻哋」嘅作品

 

DSC_2889R

我睇唔明嘅「愛說話」系列

 

 

最後補充一點,無冒犯之意,就係後記有大量錯字,希望《LOOKBOOK 3》推出時,負責校對嘅編輯再嚴謹啲,亦證明劉雲傑嘅長處係畫圖,文字都係易出錯漏。睇完成本書,我好想買返套《FEEL 100%》重溫。

 

DSC_2886R

有無人可以話我知,佢哋係咪丁子高同楊千嬅?