fbpx
編輯Blog — 11/08/2013 at 7:34 pm

【編輯Blog】苦茶:網吧耆談 食煙定食杯麵好呢?

by

tf20130811_101p

 

都唔記得幾耐冇去網吧喇! 記得最火紅嘅年代, 一星期去五晚, 晚晚九點上樓, 第二朝七點同班機友去早餐完之後, 就換件衫沖個涼返工, 收工之後再去網吧, 簡直係一個地獄輪迴! 咁即係唔使瞓? 咁又唔係嘅, 返工咪大把時間你瞓囉!

當年網吧大國掘起嘅原因, 可以話由Rainbow 6CS帶起! 想當年上網冇所謂極速寛顏, 有嘅只係龜速, 你想玩網上對戰? 我仲記得再對上一隻Quake III, 俾鬼仔用激光槍爆完漿, 三秒後先見到自己條屍! 嗰種無力感覺……網上對戰唔得, 咁就惟用內聯網對戰啦! 再加上嗰個年頭, 電腦資源又唔似依家咁, 有過剩情況! 依家大家話:「我部機買嚟上吓網、打吓字, 唔使出咁靚喇!」 但我哋嗰個年頭, 個個月有新Game, 所以個個月要追Display卡、夾返先玩到! 去網吧其實係最慳錢嘅玩法!

仲記得當年網吧有免費汽水任飲、免費小食任食、靚爆收銀姐姐任昅……

點解我忽然囉返呢啲差唔多變成歷史灰燼嘅嘢出嚟講? 因為我屋企部電腦啱啱壞咗, 又冇地方打稿喎, 所以依家我係喺網吧打緊Blog……嗚嗚嗚嗚!

真係好辛苦! 唔係自己部電腦, 所有軟件要上網Download過先開得工, 外聯上網真係好狠慢, 令我想返起十九幾年前, 屋企仲用緊Pentium嘅年代, 留意! Pentium年代嘅上網速度!

至於人方面! 我差唔多係全場最老餅嗰件, 我唔知佢哋打緊乜, 我諗係WAR CRAFTSTAR CRAFT一類啩, 我睇見個畫面就已經眼花! 再翻查網吧內遊戲排名榜, 排得上號嘅我只打過其中一兩隻……

再細問之下, 原來已經冇免費汽水飲、冇免費小食, 全部唔該你自己俾錢買啦!

更人間慘事係唔可以食煙, 所以我要每15分鐘落樓一次, 去食支煙再返上嚟一開波時我唔知掟, 見前面枱有煙升起, 我咪即刻又點返支囉! 唔使半分種, 有能力角逐廣東省散打王嘅網吧姐姐就衝過嚟喪鬧, 我話:「對面都食啦! 點解你淨係嚟煩我呢?」「人哋對面係食杯麵呀!

! 完全入晒! 簡直有種疊球棒嘅感覺……

(我對得燈火講! 嗰吓磨菇雲煙, 可能係開杯麵頭嗰吓嘅煙, 我絕對冇弱視或者閱讀障礙呢類問題, 加上我又釣緊煙癮, 我都唔想犯規架!)

tf20130811_102p